De conformidade co disposto no artigo 83 e seguintes da Lei 11/2021, do 14 de maio, de recuperación da terra agraria de Galicia, publícase a resolución de arquivamento do procedemento de aprobación do polígono agroforestal ao terse constancia da imposibilidade de acadar os requisitos exixidos, en particular, o requisito de que o proxecto represente un mínimo do 70 % do total da superficie das parcelas do perímetro do polígono.

Santiago de Compostela, 11 de marzo de 2025

María Paz Rodríguez Rivera
Directora xeral da Axencia Galega de Desenvolvemento Rural

ANEXO

Proposta de resolución do presidente da Axencia Galega de Desenvolvemento Rural (Agader) de arquivamento do procedemento de aprobación para o desenvolvemento do polígono agroforestal de iniciativa pública de Prado de Miño, no concello de Castrelo de Miño (Ourense)

Procedemento: aprobación de polígonos agroforestais de iniciativa pública.

Expediente: PA-23-08.

Antecedentes:

1. Mediante o Acordo do 9 de maio de 2023, do presidente da Axencia Galega de Desenvolvemento Rural (Agader), ao abeiro da Lei 11/2021, do 14 de maio, de recuperación da terra agraria de Galicia, iniciouse o procedemento de aprobación para o desenvolvemento do polígono agroforestal de iniciativa pública de Prado de Miño, no concello de Castrelo de Miño (Ourense), e iniciouse o prazo para elaborar o estudo de viabilidade (DOG núm. 93, do 16 de maio).

2. A superficie do perímetro do citado polígono é de 160 hectáreas, das cales máis do 50 % da superficie se considera que está en abandono.

3. O procedemento iniciouse de oficio pola Axencia Galega de Desenvolvemento Rural, tendo en conta a gran tradición vitivinícola deste concello (incluído na denominación de orixe Ribeiro) e o gran volume de actividade económica vinculada ao sector. Actualmente, a actividade está en crecemento demandando cada vez máis infraestrutura sobre a cal se poida desenvolver. Tamén é unha zona dentro da indicación xeográfica protexida Castaña de Galicia.

4. O Decreto 108/2023, do 22 de xuño, declara de utilidade pública e interese social o polígono agroforestal de iniciativa pública de Prado de Miño, no concello de Castrelo de Miño (Ourense).

5. O 30 de agosto iniciáronse os traballos de revisión do parcelario, os traballos previos á investigación da titularidade e a recollida de compromisos de adhesión das persoas titulares no polígono agroforestal de Prado (Castrelo de Miño, Ourense).

6. Desde o 27 de outubro ao 13 de decembro de 2023 rexistráronse 143 solicitudes de persoas que manifestan ser propietarias das parcelas afectadas polo perímetro do citado polígono poñendo de manifesto a oposición á aprobación do desenvolvemento do polígono agroforestal de iniciativa pública de Prado de Miño, no concello de Castrelo de Miño. Estas solicitudes representan arredor do 40 % das persoas titulares de terras no polígono.

Consideracións legais e técnicas:

Primeira. A competencia para ditar esta resolución correspóndelle á Presidencia de Agader de conformidade co establecido nos artigos, 83 e 96 da Lei 11/2021, do 14 de maio, de recuperación da terra agraria de Galicia.

Segunda. Un dos principios reitores que deben rexer na aplicación dos distintos instrumentos que regula a Lei 11/2021, do 14 de maio, é o da voluntariedade.

Por isto, vistas as 143 solicitudes de propietarios das parcelas afectadas polo perímetro do polígono agroforestal de iniciativa pública de Prado de Miño, no concello de Castrelo de Miño, poñendo de manifesto a súa oposición á aprobación do citado polígono, ponse de manifesto a imposibilidade de acadar os requisitos exixidos nos artigos 83 e seguintes da Lei 11/2021, do 14 de maio, e particularmente o requisito de que o proxecto represente un mínimo do 70 % do total da superficie das parcelas do perímetro do polígono.

Por todo o exposto, PROPOÑO:

Arquivar o procedemento de aprobación para o desenvolvemento do polígono agroforestal de iniciativa pública de Prado de Miño, no concello de Castrelo de Miño (Ourense).

Esta resolución esgota a vía administrativa e contra ela poderá interpoñer, potestativamente, o recurso de reposición perante este mesmo órgano, no prazo dun mes, contado a partir do día seguinte ao da súa notificación, segundo o establecido nos artigos 123 e 124 da Lei 39/2015, do 1 de outubro, do procedemento administrativo común das administracións públicas, ou directamente recurso contencioso-administrativo perante o órgano xurisdicional competente no prazo de dous meses a partir do día seguinte ao da súa notificación, consonte o disposto no artigo 46 da Lei 29/1998, do 13 de xullo, reguladora da xurisdición contencioso-administrativa, sen prexuízo de que a interesada poida exercer calquera outro que xulgue pertinente.

Santiago de Compostela, 11 de xaneiro de 2024

Inés Santé Riveira
Directora da Axencia Galega de Desenvolvemento Rural

RESOLVO, de conformidade co texto íntegro da proposta remitida

José González Vázquez
Presidente da Axencia Galega de Desenvolvemento Rural