Procedemento: aprobación de polígonos agroforestais de iniciativa pública.
Expediente: PA-21-02.
Antecedentes:
1. O 15 de novembro de 2021 acordouse o inicio do procedemento de aprobación para o desenvolvemento do polígono agroforestal de iniciativa pública de Cualedro (DOG núm. 247, do 27 de decembro).
2. O 8 de febreiro de 2022 aprobouse o estudio de viabilidade co perímetro do polígono, o catálogo parcial de usos, os prezos, as superficies mínimas e a vida útil do polígono agroforestal de iniciativa pública de Cualedro (Cualedro-Ourense).
3. Mediante o Decreto 32/2022, do 3 de marzo, declarouse de utilidade pública e interese social o polígono agroforestal de iniciativa pública de Cualedro (Cualedro-Ourense) (DOG núm. 55, do 21 de marzo).
4. O 3 de maio de 2022 acordouse iniciar o procedemento para a redacción do proxecto básico e dos pregos de condicións polos que se rexería o procedemento de concorrencia do polígono agroforestal de iniciativa pública de Cualedro (Cualedro-Ourense).
5. O 3 de xuño de 2022 acordouse o inicio do procedemento para a revisión do parcelario e estado das parcelas e trámites previos da investigación da titularidade das parcelas do polígono agroforestal de iniciativa pública de Cualedro (Cualedro-Ourense), debendo de realizarse as actuacións e trámites dos artigos 89 e 90 da Lei 11/2021, do 14 de maio, de recuperación da terra agraria de Galicia. O plano parcelario e o resto de documentación foi exposta ao público tanto no Concello de Cualedro como na páxina web da Axencia Galega de Desenvolvemento Rural (a Axencia), durante o prazo de 20 días hábiles.
6. O 2 de xuño de 2023 asinouse a resolución de revisión do parcelario e estado das parcelas e trámites previos da investigación da titularidade das parcelas, que foi notificada ás persoas interesadas xunto coa comunicación dos prezos de transmisión ou arrendamentos mínimos, orientación de produción establecidos e o compromiso de adhesión.
7. O 22 de xuño de 2023 acordouse someter a exposición pública as actuacións do polígono agroforestal de iniciativa pública de Cualedro (Cualedro-Ourense) (DOG núm. 127, do 5 de xullo).
8. Rexistrouse a presentación dos compromisos de adhesión ao proxecto nunha porcentaxe total do 78,90 % da superficie das terras incluídas no perímetro do polígono agroforestal.
9. O 10 de novembro de 2023 acordouse o inicio do procedemento de investigación da titularidade de dous inmobles carentes de posuidor, con base no artigo 19 da Lei 11/2021, do 14 de maio, de recuperación da terra agraria de Galicia, e a integración transitoria destas parcelas ao Banco de Terras, así como a súa entrega para xestión provisional pola Axencia (DOG núm. 224, do 24 de novembro).
10. O 13 de setembro de 2024 asinouse a resolución de modificación do perímetro do polígono agroforestal de Cualedro conforme o artigo 85.2.a) da Lei 11/2021, do 14 de maio, de recuperación da terra agraria de Galicia.
11. O 16 de setembro de 2024, aprobouse a proposta de resolución de aprobación do proxecto básico do polígono agroforestal de iniciativa pública de Cualedro (Cualedro-Ourense (DOG núm. 187, do 27 de setembro, taboleiro de edictos do Concello de Cualedro do 2 de outubro de 2024 por máis de 20 días hábiles, páxina web da Axencia o 27 de setembro de 2024). Abriuse un prazo de audiencia de quince (15) días hábiles para que as persoas interesadas formularan alegacións e foi notificada ás persoas interesadas. Non se presentaron alegacións.
12. Pola Resolución do 20 de xaneiro de 2025 da Presidenta da Axencia, aprobouse o proxecto básico do polígono agroforestal de iniciativa pública de Cualedro.
13. O 3 de abril de 2025 a Directora Xeral da Axencia asinou a proposta de resolución de aprobación do polígono agroforestal de iniciativa pública de Cualedro (Cualedro-Ourense).
Consideracións legais e técnicas:
1. Este procedemento réxese polo disposto na Lei 11/2021, do 14 de maio, de recuperación da terra agraria de Galicia (DOG núm. 94, do 21 de maio); o acordo da Comisión Bilateral de Cooperación Administración Xeral do Estado-Comunidade Autónoma de Galicia, en relación coa Lei 11/2021, do 14 de maio, de recuperación da terra agraria de Galicia, publicado por Resolución do 1 de febreiro de 2022, da Dirección Xeral de Relacións Institucionais e Parlamentarias (DOG núm. 36, do 22 de febreiro); a Lei 39/2015, do 1 de outubro, do procedemento administrativo común das administracións públicas (BOE núm. 236, do 2 de outubro); a Lei 6/2001, do 29 de xuño, de adecuación da normativa da Comunidade Autónoma de Galicia á Lei 4/1999, do 13 de xaneiro, de modificación da Lei 30/1992, do 26 de novembro, de réxime xurídico das administracións públicas e do procedemento administrativo común (DOG núm. 135, do 12 de xullo); a Lei 40/2015, do 1 de outubro, de réxime xurídico do sector público (BOE núm. 236, do 2 de outubro); a Lei 16/2010, do 17 de decembro, de organización e funcionamento da Administración xeral e do sector público autonómico de Galicia (DOG núm. 251, do 31 de decembro), e demais disposicións normativas de aplicación.
2. De conformidade cos artigos 95 e 96 da Lei 11/2021, do 14 de maio, de recuperación da terra agraria de Galicia, os pregos de condicións e criterios de avaliación que aprobe a Presidencia da Axencia son os informados pola asesoría xurídica da Consellería do Medio Rural con data do 12 de marzo de 2025.
3. O artigo 96 da Lei 11/2021, do 14 de maio, de recuperación da terra agraria de Galicia, dispón que «1. A resolución de aprobación do polígono agroforestal por parte da persoa que exerza a presidencia da Axencia Galega de Desenvolvemento Rural comportará a aprobación dos pregos de condicións da concorrencia competitiva e a constitución formal do polígono agroforestal. 2. Na resolución expresarase o réxime xurídico aplicable e as potestades que, de acordo co disposto na presente lei, corresponden á Axencia Galega de Desenvolvemento Rural no marco do servizo público prestado polo Banco de Terras de Galicia, e as súas finalidades públicas de recuperación das terras abandonadas. 3. A resolución de aprobación, que esgotará a vía administrativa, notificarase aos interesados no procedemento e publicarase no Diario Oficial de Galicia».
4. No expediente instruído cumpríronse os requisitos e trámites do procedemento establecidos nos artigos 67 a 72 e 83 a 101 da Lei 11/2021, do 14 de maio, de recuperación da terra agraria de Galicia.
5. Instrución e motivación.
De conformidade co disposto no artigo 75 e seguintes da Lei 39/2015, do 1 de outubro do procedemento administrativo común das administracións públicas, a competencia para a instrución do procedemento e a realización dos actos inherentes a esta necesarios para a determinación, coñecemento e comprobación dos feitos en virtude dos cales deba pronunciarse a resolución corresponde á Subdirección de Mobilidade de Terras.
6. Competencia.
O órgano competente para resolver sobre a aprobación do polígono agroforestal é a Presidencia da Axencia Galega de Desenvolvemento Rural, de conformidade co artigo 96.1 da Lei 11/2021, do 14 de maio, de recuperación da terra agraria de Galicia.
Por todo o exposto,
RESOLVO:
Primeiro. Aprobar o polígono agroforestal de iniciativa pública de Cualedro, no Concello de Cualedro (Ourense), que comporta a aprobación dos pregos de condicións da concorrencia competitiva e a constitución formal do polígono agroforestal.
Segundo. Publicar a resolución no Diario Oficial de Galicia e notificala ás persoas interesadas no procedemento, en cumprimento do disposto no artigo 96.3 da Lei 11/2021, do 14 de maio, de recuperación da terra agraria de Galicia.
Contra esta resolución, que esgota a vía administrativa, poderase interpoñer potestativamente recurso de reposición, ante a Presidencia da Axencia Galega de Desenvolvemento Rural, no prazo dun mes, ou directamente recurso contencioso-administrativo ante o Xulgado do Contencioso-Administrativo de Santiago de Compostela, no prazo de dous meses, de conformidade cos artigos 123 e 124 da Lei 39/2015, do 1 de outubro, do procedemento administrativo común das administracións públicas, e 6 e seguintes e 46 da Lei 29/1998, do 13 de xullo, reguladora da xurisdición contencioso-administrativa; en ambos os dous casos o prazo contarase desde o día seguinte ao da súa notificación. Non obstante, poderase interpoñer calquera outro recurso que se considere procedente.
Notificar ás persoas interesadas o contido da resolución, en cumprimento do disposto no artigo 40.1 da Lei 39/2015, do 1 de outubro, do procedemento administrativo común das administracións públicas.
Santiago de Compostela, 4 de abril de 2025
María José Gómez Rodríguez
Presidenta da Axencia Galega de Desenvolvemento Rural