Expediente: IN407A 2024/253-1.

Promotora: UFD Distribución Electricidad, S.A.

Denominación do proxecto: LMTS, CTC, RBT Guimaráns.

Concello: Ames.

Feitos:

1. O día 2.8.2024, a empresa promotora solicitou a autorización administrativa previa e a autorización administrativa de construción do proxecto de execución da instalación de distribución eléctrica mencionada. Por mor de rematar a vida útil dun tramo aéreo da liña de distribución de media tensión LMT SNT822 Bertamiráns 22 (expediente 19.386), procedente da subestación Santiago, sito no lugar de Guimaráns, parroquia de San Pedro de Guimaráns, concello de Ames, e por non poder reformar o dito tramo por prohibicións regulamentarias respecto ás vivendas, proxéctase o desmantelamento do dito tramo e do centro de transformación de intemperie CT Guimaráns (15AI73) e substituílos por tramos soterrados que alimentarán o CT Pradiños (15CTN4) existente e o novo CT de tipo compacto de superficie de 250 kVA de potencia, que se instalará en substitución do de Guimaráns, e conectándoos coa LMT SNT834 Bertamiráns Condomiña 34, procedente da subestación Santiago.

Ao abeiro do artigo 123 do Real decreto 1955/2000, presentan o proxecto de execución denominado LMTS, CTC, RBT Guimaráns, asinado o día 15.7.2024 por Rubén Fervenza Nicolás, enxeñeiro técnico industrial graduado en Enxeñaría Eléctrica, número de colexiado 4.684 de Vigo.

2. O proxecto non se someteu ao trámite de información pública, segundo o artigo 50 da Lei 9/2021, do 25 de febreiro, de simplificación administrativa e de apoio á reactivación económica de Galicia (DOG núm. 39, do 26 de febreiro).

3. Consonte o artigo 127 do Real decreto 1955/2000, do 1 de decembro, solicitouse o informe preceptivo ás distintas entidades afectadas: Concello de Ames e Deputación Provincial da Coruña. A empresa promotora manifestou a súa conformidade cos informes emitidos no prazo outorgado para ese efecto.

4. O día 9.5.2025 emitiuse o informe técnico.

Consideracións legais e técnicas:

Primeira. O director territorial é competente para resolver este expediente, ao abeiro do disposto no Decreto 9/2017, do 12 de xaneiro, polo que se establecen os órganos competentes para a resolución dos procedementos de autorización de instalacións eléctricas que sexan competencia da Comunidade Autónoma de Galicia (DOG núm. 22, do 1 de febreiro), e no Decreto 140/2024, do 20 de maio, polo que se establece a estrutura orgánica da Consellería de Economía e Industria (DOG núm. 101, do 27 de maio).

Segunda. Lexislación de aplicación:

• Lei 24/2013, do 26 de decembro, do sector eléctrico.

• Real decreto 1955/2000, do 1 de decembro, polo que se regulan as actividades de transporte, distribución, comercialización, subministración e procedementos de autorización de instalacións de enerxía eléctrica.

• Real decreto 223/2008, do 15 de febreiro, polo que se aproban o Regulamento sobre condicións técnicas e garantías de seguridade en liñas eléctricas de alta tensión e as súas instrucións técnicas complementarias ITC-LAT 01 a 09.

• Real decreto 337/2014, do 9 de maio, polo que se aproban o Regulamento sobre condicións técnicas e garantías de seguridade en instalacións eléctricas de alta tensión e as súas instrucións técnicas complementarias ITC-RAT 01 a 23.

• Real decreto 842/2002, do 2 de agosto, polo que se aproba o Regulamento electrotécnico para baixa tensión.

• Lei 9/2021, do 25 de febreiro, de simplificación administrativa e de apoio á reactivación económica de Galicia (DOG núm. 39, do 26 de febreiro).

Terceira. Características técnicas:

As instalacións obxecto deste expediente están situadas no lugar de Guimaráns, parroquia de San Pedro de Guimaráns, concello de Ames, e as súas características técnicas son as seguintes:

• Desmantelamento de tramo LMTA (tramo 1) a 20 kV con orixe no apoio nº A3FNEATP//D22-36 existente da LMT SNT822 Bertamiráns 22 (expediente 19.386), procedente da subestación Santiago, no que se desmontará a derivación deste tramo por suprimir e o seccionador XS, e remate no apoio nº A3H8IOSI//D22-36-11 por desmontar e onde está instalado o CTI Guimaráns (15AI73). Desmontaxe de todos os apoios intercalados no dito tramo.

• Desmantelamento de tramo LMTA (tramo 2) a 20 kV con orixe no apoio nº A3HO90TP//D22-36-12 existente e remate no apoio nº A3IBWTAA//D22-36-14CT por desmontar e onde está instalado o CTI Guimaráns (15AI73). Desmontaxe de tódolos apoios intercalados no dito tramo.

• Desmantelamento tramo LMTS (tramo 1) a 20 kV, con orixe no PA/S do apoio nº A3H8IOSI//D22-36-11 existente a desmantelar e remate no CT Pradiños (15CTN4) existente.

• Desmantelamento tramo LMTS (tramo 2) a 20 kV, con orixe no PA/S do apoio nº A3HO90TP//D22-36-12 existente por desmantelar e remate no apoio nº A3IBWTAA//D22-36-14CT existente por desmantelar.

• LMTS (actuación 1) a 20 kV, de 2×6 m (E/S), condutor tipo RHZ1-2OL 12/20 kV 3×(1×240) mm2 Al, con orixe e remate nos empalmes por facer en PAR proxectado na LMT SNT834 (Bertamiráns Condomiña 34), procedente da subestación Santiago, facendo E/S no CTC proxectado no lugar Guimaráns. A LMTS proxectada irá canalizada baixo tubo en gabia de 0,4 m de ancho e unha profundidade entre 1,2 e 1,4 m de profundidade. Os tubos por empregar serán de polietileno de alta densidade cun diámetro de 16 cm.

• LMTS (actuación 2) a 20 kV, de 2×198 m (E/S), condutor tipo RHZ1-2OL 12/20 kV 3×(1×240) mm2 Al, con orixe e remate nos empalmes por facer en PAR proxectado na LMT SNT834, con E/S no CT Pradiños (15CTN4) existente.

• Novo CT lugar Guimaráns compacto prefabricado telecontrolado de manobra exterior, cunha potencia de 250 kVA, unha relación de transformación de 20.000/400-230 V e configuración 2L+1P. Desmantelamento do CTI Guimaráns (15AI73).

Cuarta. No expediente consta un informe favorable dos servizos técnicos deste departamento territorial.

De acordo con todo o exposto,

RESOLVO:

1. Conceder a autorización administrativa previa e a autorización administrativa de construción para a dita instalación de distribución eléctrica.

2. A instalación executarase no prazo de dous anos, contados a partir do día seguinte ao da publicación desta resolución no Diario Oficial de Galicia. En todo caso, deberán respectarse os prazos establecidos no artigo 13.9 do Regulamento (UE) 2024/573 do Parlamento Europeo e do Consello, do 7 de febreiro de 2024, sobre os gases fluorados de efecto invernadoiro, polo que se modifica a Directiva (UE) 2019/1937, e se deroga o Regulamento (UE) 517/2014 (DOUE núm. 573, do 20 de febreiro de 2024), sobre prohibicións para a posta en funcionamento de aparamenta eléctrica que empregue gases fluorados de efecto invernadoiro, ou cuxo funcionamento dependa deles, nun medio illante ou de rotura.

3. Para a posta en explotación da instalación autorizada, deberá achegar ante este departamento territorial unha solicitude coa cal xuntará a seguinte documentación:

• As declaracións de conformidade relativas ao material ou equipamento, e as certificacións ou homologacións, se procede.

• Un certificado do/da director/a da montaxe en que se garantirá o cumprimento das especificacións do proxecto e das prescricións complementarias, se as houber, así como das regulamentacións e normas oportunas na montaxe da instalación e posta a punto.

• Planimetría as built da instalación eléctrica en formato shape.

4. Esta aprobación outórgase sen prexuízo doutras que sexan de aplicación segundo a lexislación vixente, en especial no relativo á ordenación do territorio e ao ambiente.

O incumprimento das condicións e requisitos establecidos nesta resolución ou a variación substancial dos presupostos que determinaron o seu outorgamento poderán dar lugar á súa revogación, logo de audiencia ao interesado, segundo o establecido no artigo 53.10 da Lei 24/2013, do 26 de decembro, do sector eléctrico.

Contra esta resolución, que non é definitiva en vía administrativa, poderase interpor recurso de alzada perante a conselleira de Economía e Industria no prazo dun mes contado a partir do día seguinte ao da notificación ou publicación, segundo o disposto nos artigos 121 e 122 da Lei 39/2015, do 1 de outubro, do procedemento administrativo común das administracións públicas (BOE núm. 236, do 2 de outubro), sen prexuízo de que as persoas interesadas poidan interpor calquera outro recurso que consideren pertinente.

Mediante este documento notifícaselles aos interesados esta resolución, segundo o exixido no artigo 40.1 da dita Lei 39/2015.

A Coruña, 12 de maio de 2025

Isidoro Martínez Arca
Director territorial da Coruña