Mediante a Orde do 23 de decembro de 2024 pola que se establecen as bases reguladoras do certame Cooperativismo no ensino e os premios á cooperación, e se procede á súa convocatoria para o ano 2025 (DOG núm. 21, do 31 de xaneiro), establecéronse as bases reguladoras do certame Cooperativismo no ensino, dirixido ao alumnado dos centros educativos de Galicia.

Nestas bases reguladoras estableceuse que os traballos participantes neste certame Cooperativismo no ensino 2025 serán avaliados por un tribunal e que a persoa titular da Dirección Xeral de Traballo Autónomo e Economía Social resolverá a concesión dos premios, que serán obxecto de publicación no Diario Oficial de Galicia.

Unha vez emitidas as propostas de concesión dos premios polos tribunais encargados de avaliar os traballos presentados nas distintas modalidades, nas súas reunións do 22 e 23 de maio de 2025, mediante a Resolución da Dirección Xeral de Traballo Autónomo e Economía Social, do 27 de maio de 2025, aprobouse a concesión dos premios.

Por todo o anterior,

DISPOÑO:

Facer pública a concesión dos premios do certame Cooperativismo no ensino 2025 dirixido ao alumnado dos centros educativos de Galicia que se relacionan no anexo que se xunta a esta resolución.

Santiago de Compostela, 27 de maio de 2025

Marta Mariño Regueiro
Directora xeral de Traballo Autónomo e Economía Social

ANEXO

Certame Cooperativismo no ensino 2025

Modalidade de actividades artísticas, dirixida ao alumnado dos centros de educación infantil, primaria e educación especial por categorías:

– Categoría A: alumnado de 2º ciclo de educación infantil.

Premio ao mellor traballo: Os súper saudables: cooperación en acción do CEIP Plurilingüe Domaio.

Accésit: Sementando cooperativismo do CEIP Pintor Antonio Fernández.

– Categoría B: alumnado de 1º e 2º de educación primaria.

Premio ao mellor traballo: Cooperamos por unha biblioteca chea de vida do CEIP Plurilingüe Domaio.

Accésit: Cocoperativismo do CEIP San Miguel de Reinante.

– Categoría C: alumnado de 3º e 4º de educación primaria.

Premio ao mellor traballo: A aventura de cooperar pola igualdade, xogando e creando do CEIP Plurilingüe Domaio.

Accésit: Cooperaencoro do CEIP San Miguel de Reinante.

– Categoría D: alumnado de 5º e 6º de educación primaria.

Premio ao mellor traballo: Coñécete, coopera, transforma do CEIP Plurilingüe Domaio.

Accésit: Coop-Nector do CEIP San Miguel de Reinante.

Modalidade de actividades cooperativizadas, dirixida ao alumnado dos centros de educación secundaria obrigatoria e educación especial:

Premio ao mellor traballo: deserto.

Accésit: deserto.

Modalidade de proxectos empresariais cooperativos, dirixida ao alumnado dos centros de formación profesional e de ensinanzas de réxime especial:

Premio ao mellor proxecto empresarial cooperativo: Milgranda, Sociedade Cooperativa Galega presentado polo alumnado do IES Rosalía Mera.

Accésit ao proxecto empresarial finalista: Maruxía presentado polo alumnado da Sociedade Cooperativa Galega Mendiño.