Os concellos de Castro de Rei e Outeiro de Rei, da provincia de Lugo, acordaron aprobar definitivamente a disolución da agrupación voluntaria para o sostemento en común dun único posto de traballo de Intervención, reservado a persoal funcionario de Administración local con habilitación de carácter nacional, e remitir o expediente á Dirección Xeral da Administración Local da Xunta de Galicia. A citada agrupación voluntaria aprobouse polo Decreto 75/2007, do 19 de abril, que se publicou no Diario Oficial de Galicia núm. 80, do 25 de abril.
De conformidade coa normativa estatal, a Lei 7/1985, do 2 de abril, reguladora das bases de réxime local, e o Real decreto 128/2018, do 16 de marzo, polo que se regula o réxime xurídico dos funcionarios de Administración local con habilitación de carácter nacional, corresponde ás comunidades autónomas, de acordo coas súas normas propias, acordar a constitución e a disolución de agrupacións de Intervención dentro do seu ámbito territorial.
A normativa autonómica regula as agrupacións voluntarias de municipios para o sostemento en común de postos de traballo reservados a persoal funcionario de Administración local nos artigos 165 e seguintes da Lei 5/1997, do 22 de xullo, de Administración local de Galicia, e nos artigos 11, 12, 13 e 16 do Decreto 49/2009, do 26 de febreiro, sobre o exercicio das competencias da Comunidade Autónoma de Galicia respecto dos/das funcionarios/as con habilitación de carácter estatal. E o artigo 10 do citado Decreto 49/2009 regula as normas xerais para a clasificación de postos de traballo reservados a funcionarios con habilitación de carácter nacional.
No expediente seguíronse os trámites previstos na normativa de aplicación anteriormente referida, requiríndose informe á Deputación Provincial de Lugo e á Delegación do Goberno na Comunidade Autónoma de Galicia, segundo o disposto no artigo 167.c) da Lei 5/1997, do 22 de xullo, de Administración local de Galicia, e no artigo 13 do Decreto 49/2009, do 26 de febreiro, sobre o exercicio das competencias da Comunidade Autónoma de Galicia respecto dos/das funcionarios/as con habilitación de carácter estatal. Así mesmo, consta a proposta de clasificación dos postos resultantes.
A competencia para a aprobación da disolución da agrupación correspóndelle ao Consello da Xunta de Galicia, por proposta da consellería competente en materia de réxime local, segundo dispoñen o artigo 167 da Lei 5/1997, do 22 de xullo, de Administración local de Galicia, e o artigo 13 do Decreto 49/2009, do 26 de febreiro, sobre o exercicio das competencias da Comunidade Autónoma de Galicia respecto dos/das funcionarios/as con habilitación de carácter estatal.
Na súa virtude, por proposta do conselleiro de Presidencia, Xustiza e Deportes, logo de deliberación do Consello da Xunta de Galicia na súa reunión do quince de xullo de dous mil vinte e cinco,
DISPOÑO:
Primeiro. Aprobar a disolución da agrupación voluntaria dos concellos de Castro de Rei e Outeiro de Rei, na provincia de Lugo, para o sostemento en común dun posto único de Intervención de clase segunda.
Segundo. Clasificar os postos de traballo reservados a persoal funcionario de Administración local con habilitación de carácter nacional resultantes da disolución nos seguintes termos:
Entidade local: Concello de Castro de Rei.
Posto: Intervención, clase segunda.
Subescala: Intervención-Tesourería, categoría de entrada.
Forma provisión: concurso.
Nivel complemento de destino: 30.
Entidade local: Concello de Outeiro de Rei.
Posto: Intervención, clase segunda.
Subescala: Intervención-Tesourería, categoría de entrada.
Forma provisión: concurso.
Nivel complemento de destino: 30.
Terceiro. Adscribir á persoa funcionaria de Administración local con habilitación de carácter nacional titular do posto de traballo reservado de Intervención de clase segunda da agrupación ao novo posto de Intervención de clase segunda do Concello de Outeiro de Rei.
Contra este acto, que esgota a vía administrativa, poderase interpoñer recurso contencioso-administrativo no prazo de dous meses, contados a partir do día seguinte ao da súa publicación, ante a Sala do Contencioso-Administrativo do Tribunal Superior de Xustiza de Galicia. Potestativamente, e con carácter previo, os interesados poderán interpoñer recurso administrativo de reposición, ante o órgano que ditou o acto, no prazo dun mes a partir do día seguinte ao da súa publicación, segundo o disposto nos artigos 123 e 124 da Lei 39/2015. Así mesmo, as entidades locais poderán presentar previamente un requirimento no prazo de dous meses conforme o disposto no artigo 44 da Lei 29/1998, do 13 de xullo, reguladora da xurisdición contencioso-administrativa.
Santiago de Compostela, quince de xullo de dous mil vinte e cinco
Alfonso Rueda Valenzuela
Presidente
Diego Calvo Pouso
Conselleiro de Presidencia, Xustiza e Deportes