Mediante a Resolución do 25 de xuño de 2025, da Dirección Xeral de Enerxías Renovables e Cambio Climático, outorgouse a declaración de utilidade pública, en concreto, das instalacións relativas ao proxecto do parque eólico Monte Redondo repotenciación, sito no concello de Vimianzo e promovido por Naturgy Renovables, S.L. (DOG núm. 128, do 7 de xullo), a cal foi modificada, para rectificar os erros materiais existentes no seu anexo, mediante a Resolución do 11 de xullo de 2025 (DOG núm. 136, do 17 de xullo).

Esta declaración de utilidade pública, segundo o previsto no artigo 56 da Lei 24/2013, do 26 de decembro, do sector eléctrico, implica a necesidade de ocupar os bens ou adquirir os dereitos afectados e a súa urxente ocupación para os efectos do artigo 52 da Lei de expropiación forzosa, do 16 de decembro de 1954.

En virtude do anterior, este departamento territorial, en cumprimento do disposto no artigo 52 da Lei de expropiación forzosa, acorda convocar todas as persoas afectadas coas que non se chegou a acordo incluídas na relación de bens e dereitos afectados, deducida da publicada mediante a Resolución do 11 de xullo de 2025 e exposta tanto no taboleiro de anuncios do Concello de Vimianzo como na páxina web desta consellería (https://medioambiente.xunta.gal/enerxias-renovables/outros-anuncios). Para tal efecto, deberán comparecer os días 14, 15, 16, 17, 21 e 22 de outubro de 2025 na Casa do Concello de Vimianzo, designada como punto de encontro, co fin de levar a cabo o levantamento de actas previas á ocupación, conforme o procedemento establecido no citado artigo.

Esta convocatoria será comunicada individualmente ás persoas interesadas mediante citación, en que se indicará expresamente o día e a hora asignados para o levantamento das actas previas á ocupación. Así mesmo, as datas previstas estarán expostas no taboleiro de anuncios do Concello de Vimianzo.

Todas as persoas interesadas, así como as que teñan calquera tipo de dereito ou interese sobre os bens afectados, deberán comparecer persoalmente ou ser representadas por persoa debidamente autorizada e achegar os documentos que acrediten a súa titularidade, podendo ir acompañadas dos seus peritos e dun notario por conta propia.

Así mesmo, advírteselles a todas as persoas interesadas que poderán formular alegacións ante este departamento territorial (rúa Vicente Ferrer, 2, A Coruña) ata o momento do levantamento de actas previas, para os únicos efectos de emendar posibles erros que se padeceran ao relacionar os bens afectados pola urxente ocupación, segundo establece o artigo 56 do Regulamento da Lei de expropiación forzosa.

A Coruña, 5 de agosto de 2025

Mª Pilar Arias Graña
Directora territorial da Coruña