Mediante a Resolución do 13 de xuño de 2025 (DOG núm. 133, do 14 de xuño) establecéronse as bases reguladoras do procedemento de adxudicación de prazas de residencia e comedor nos centros de formación e experimentación agraria, e convocáronse as ditas prazas para o curso académico 2025/26.

O número de prazas disposto inicialmente para cada un dos distintos centros foi recollido no artigo 1.2 da Resolución do 5 de xullo de 2025, e para o CFEA de Sergude ofertáronse un total de 30 prazas de residencia en réxime de pensión completa e 60 de comedor.

Porén, logo da revisión organizativa relativa á distribución das habitacións por xénero, constatouse a posibilidade de incrementar as prazas de residencia en réxime de pensión completa en dúas prazas máis ás inicialmente previstas, ao permitir a repartición por xénero unha optimización dos espazos dispoñibles.

Así mesmo, e co obxecto de dar resposta á alta demanda rexistrada neste ano académico no referido aos ciclos formativos que se imparten no CFEA de Sergude, resulta necesario incrementar en dez as prazas ofertadas no servizo de comedor.

Esta ampliación ten por obxecto dar unha resposta efectiva ás necesidades do alumnado que require o servizo de comedor, asegurando unha cobertura axeitada e favorecendo a súa conciliación académica e persoal. En última instancia, a medida contribúe a facilitar o acceso e a permanencia nos ciclos formativos de grao medio e superior da familia agraria, reforzando ao mesmo tempo a promoción e o desenvolvemento da formación da poboación do medio rural.

Como consecuencia do anterior, modifícase o número de prazas de residencia ofertadas no Centro de Formación e Experimentación de Sergude, que pasan de 30 a 32 prazas en réxime de pensión completa, e de 60 a 70 as de servizo de comedor.

Santiago de Compostela, 9 de setembro de 2025

Martín Alemparte Vidal
Director da Axencia Galega da Calidade Alimentaria