Convocada pola Resolución do 20 de febreiro de 2025 (DOG núm. 44, do 5 de marzo), da Xerencia da Área Sanitaria de Lugo, A Mariña e Monforte de Lemos, a provisión, polo procedemento de concurso de méritos, dun posto de xefe/a de grupo do Hospital Público da Mariña, de conformidade co previsto no Decreto 206/2005, do 22 de xullo (DOG núm. 145, do 29 de xullo), de provisión de prazas de persoal estatutario do Servizo Galego de Saúde, e na Orde da Consellería de Sanidade, do 24 de maio de 2006 (DOG núm. 106, do 5 de xuño), pola que se establecen as bases do procedemento para a provisión de postos de xefatura e coordinación das institucións sanitarias do Servizo Galego de Saúde, e en exercicio das competencias que ten atribuídas na Orde do 22 de abril de 2020 (DOG núm. 82, do 29 de abril) de delegación de competencias en órganos centrais e periféricos da Consellería de Sanidade e do Servizo Galego de Saúde e na Axencia Galega para a Xestión do Coñecemento en Saúde, esta xerencia
DISPÓN:
Primeiro. Resolver a convocatoria pública para a provisión dun posto de xefe/a de grupo de Secretarías de Admisión do Hospital Público da Mariña, convocada pola Resolución do 20 de febreiro de 2025.
Segundo. Nomear, para o posto que se indica, a persoa relacionada no anexo desta resolución.
Terceiro. O/a profesional nomeado/a deberá cesar na praza que desempeña dentro dos tres días seguintes a aquel en que se publique esta resolución no Diario Oficial de Galicia.
A toma de posesión do posto de traballo adxudicado deberá efectuarse dentro dos dous días hábiles seguintes ao do cesamento, se a praza desempeñada e o posto adxudicado son da mesma área de saúde, ou no prazo de sete días hábiles, se son de distinta área de saúde. Para estes efectos, entenderase por praza desempeñada a efectivamente ocupada, con independencia de que sexa en condición de destino definitivo, adscrición ou destino provisional ou comisión de servizos.
Se así o permiten as necesidades do servizo, e por petición motivada do/da interesado/a, os prazos a que se refiren os parágrafos anteriores poderán ser prorrogados polo órgano convocante.
O prazo de toma de posesión e a súa prórroga terán a consideración de servizo activo e os correspondentes haberes percibiranse de conformidade co que estableza a orde sobre confección de nóminas do persoal ao servizo da Administración autonómica.
Cuarto. A persoa aspirante nomeada será obxecto de avaliación cada catro anos, para os efectos de apreciar o nivel de rendemento. O resultado da avaliación determinará a prórroga do nomeamento ou, de ser o caso, a súa remoción. A omisión da avaliación non suporá a consideración do nomeamento como definitivo.
Quinto. Contra esta resolución poderase interpor recurso de alzada, ante a Dirección Xeral de Recursos Humanos do Servizo Galego de Saúde, no prazo dun mes, nos termos establecidos segundo a Lei 39/2015, do 1 de outubro, do procedemento administrativo común das administracións públicas.
Lugo, 26 de setembro de 2025
Ramón Ares Rico
Xerente da Área Sanitaria de Lugo,
A Mariña e Monforte de Lemos
ANEXO
Posto: xefe/a de grupo auxiliar administrativo do Hospital Público da Mariña.
Sección: Secretarías de Admisión.
Nome e apelidos: Luisa María Fernández González.
DNI (*): ***5813**.
(*) Ocúltase parcialmente o número do documento nacional de identidade para preservar os datos de carácter persoal, de acordo coa Lei orgánica 3/2018, do 15 de decembro.