DOG 210 do 30/10/2025 - RESOLUCIÓN do 11 de xullo de 2025, do tribunal designado para cualificar o proceso selectivo extraordinario de estabilización derivado da Lei 20/2021, do 28 de decembro, para o ingreso, pola quenda de acceso libre e mediante o sistema de concurso, no corpo auxiliar da Administración xeral da Comunidade Autónoma de Galicia e no corpo de auxiliares de carácter técnico de Administración especial da Administración xeral da Comunidade Autónoma de Galicia, subgrupo C2, pola que se modifica a baremación definitiva da fase de concurso de determinados corpos, escalas e especialidades.

IV. Oposicións e concursos

Consellería de Facenda e Administración Pública

RESOLUCIÓN do 11 de xullo de 2025, do tribunal designado para cualificar o proceso selectivo extraordinario de estabilización derivado da Lei 20/2021, do 28 de decembro, para o ingreso, pola quenda de acceso libre e mediante o sistema de concurso, no corpo auxiliar da Administración xeral da Comunidade Autónoma de Galicia e no corpo de auxiliares de carácter técnico de Administración especial da Administración xeral da Comunidade Autónoma de Galicia, subgrupo C2, pola que se modifica a baremación definitiva da fase de concurso de determinados corpos, escalas e especialidades.

Na sesión que tivo lugar o día 11 de xullo de 2025, o tribunal nomeado pola Resolución do 29 de maio de 2024 (DOG núm. 108, do 5 de xuño), modificada polas resolucións do 7 de xuño de 2024 (DOG núm. 114, do 13 de xuño) e do 27 de xaneiro de 2025 (DOG núm. 21, do 31 de xaneiro), para cualificar o proceso selectivo extraordinario de estabilización derivado da Lei 20/2021, do 28 de decembro, para o ingreso, pola quenda de acceso libre e mediante o sistema de concurso, no corpo auxiliar da Administración xeral da Comunidade Autónoma de Galicia e no corpo de auxiliares de carácter técnico de Administración especial da Administración xeral da Comunidade Autónoma de Galicia, subgrupo C2, convocado pola Resolución do 22 de decembro de 2022, modificada pola Resolución do 20 de xaneiro de 2023 (DOG núm. 15, do 23 de xaneiro) e pola Resolución do 6 de febreiro de 2023 (DOG núm. 26, do 7 de febreiro) (corrección de erros no DOG núm. 64, do 31 de marzo, e DOG núm. 87, do 8 de maio),

ACORDOU:

Primeiro. Mediante as resolucións do 22 de novembro de 2024 (DOG núm. 227, do 25 de novembro) e do 4 de xuño de 2025 (DOG núm. 106, do 5 de xuño), este tribunal acordou facer pública a baremación definitiva da fase de concurso do corpo de auxiliares de carácter técnico, escala auxiliar do servizo de prevención e defensa contra incendios forestais, especialidade bombeiro/a forestal.

Como consecuencia da estimación dunha serie de recursos de alzada, este tribunal acorda modificar as ditas resolucións e publicar no portal web corporativo da Dirección Xeral de Emprego Público e Administración de Persoal: https://www.xunta.gal/funcion-publica/procesos-selectivos/consulta, por unha banda, a puntuación definitiva obtida polas persoas afectadas tras a modificación e, pola outra, publicar un baremo definitivo consolidado no cal se reflicte a puntuación de todas as persoas aspirantes baremadas neste proceso.

Segundo. Mediante a Resolución do 10 de outubro de 2024 (DOG núm. 197, do 11 de outubro), este tribunal acordou facer pública a baremación definitiva da fase de concurso do corpo de auxiliares de carácter técnico, escala de auxiliar de laboratorio.

Como consecuencia da estimación do recurso de alzada interposto por Laura Martínez Pouso (***2638**), este tribunal acorda modificar a dita resolución con relación á puntuación obtida por esta persoa aspirante.

A puntuación definitiva obtida tras a modificación reflíctese no portal web corporativo da Dirección Xeral de Emprego Público e Administración de Persoal: https://www.xunta.gal/funcion-publica/procesos-selectivos/consulta

Terceiro. De acordo co disposto na base IV.13 da orde de convocatoria, contra este acordo poderase interpor recurso de alzada ante a persoa titular da consellería competente en materia de función pública, nos termos previstos nos artigos 121 e 122 da Lei 39/2015, do 1 de outubro, do procedemento administrativo común das administracións públicas.

Santiago de Compostela, 11 de xullo de 2025

Javier Fraga Vázquez
Presidente do tribunal