Como consecuencia da entrada en vigor da Lei 7/2012, do 28 de xuño, de montes de Galicia, e coa finalidade de levar a cabo o establecido na disposición transitoria décimo terceira con respecto á revisión de esbozos de montes veciñais en man común, o xurado, na reunión do 17.9.2012, acordou solicitar ao Servizo de Montes a realización de propostas de revisión e elaboración de cartografías actualizadas dos montes veciñais da provincia, susceptibles de tal adecuación.
En relación con isto, na sesión realizada polo xurado o día 26.11.2025 figuran os seguintes acordos:
– MVMC Riazoi, Caseiro, Reboira e Da Costa, pertencente aos veciños de Mera, no concello de Lugo. Expediente Lugo/23_83.
O 13.6.2025 tivo entrada unha solicitude da comunidade de Mera para que se revise o esbozo do seu monte veciñal conforme a proposta que achega. Dado que na proposta presentada pola comunidade se solicita a exclusión dunha peza de monte completa, clasificada co nome Da Costa, requírese a modificación da proposta ao non axustarse ao procedemento de revisión perimetral. A dita proposta foi emendada con data do 9.9.2025. Procedemento con número de expediente 2025_27RE.
O día 13.10.2025, o Servizo de Montes elaborou unha proposta, en que se recolle a definición do novo esbozo revisado. Na nova proposta só se suprimen do esbozo do monte aquelas superficies da peza do monte Da Costa, cuxo titular catastral actual non é o monte veciñal.
De acordo coa cartografía resultante, a superficie do monte de Riazoi, Caseiro, Reboira e Da Costa pasa a ser de 40,42 hectáreas.
Examinada a devandita proposta, o xurado, por unanimidade, acorda aceptala e incorporar o novo esbozo ao expediente.
O novo esbozo correspóndese co plano do anexo I, ao final deste anuncio.
– MVMC Acevedo, pertencente aos veciños de Acevedo, no concello de Portomarín. Expediente Portomarín/33_76.
O 8.7.2025 tivo entrada unha solicitude da comunidade de Acevedo para que se revise o esbozo do seu monte veciñal conforme a proposta que achega. A proposta foi emendada o 18.9.2025 tras o correspondente requirimento porque modificaba un treito no límite con outros montes veciñais en man común. Procedemento con número de expediente 2025_32RE.
O día 21.9.2025, o Servizo de Montes elaborou unha proposta, en que se recolle a definición do novo esbozo revisado. De acordo coa cartografía resultante, a superficie do monte de Acevedo pasa a ser de 194,26 hectáreas.
Examinada a devandita proposta, o xurado, por unanimidade, acorda aceptala e incorporar o novo esbozo ao expediente.
O novo esbozo correspóndese co plano do anexo II, ao final deste anuncio.
– MVMC O Ermidón, O Ivedo e San Miguel, pertencente aos veciños do Ermidón, O Ivedo e San Miguel, no concello de Quiroga. Expediente Quiroga/23_73.
O 17.7.2025 tivo entrada unha solicitude da comunidade do Ermidón, O Ivedo e San Miguel para que se revise o esbozo do seu monte veciñal conforme a proposta que achega. Procedemento con número de expediente 2025_37RE.
O día 4.9.2025, o Servizo de Montes elaborou unha proposta, en que se recolle a definición do novo esbozo revisado. De acordo coa cartografía resultante, a superficie do monte do Ermidón, O Ivedo e San Miguel pasa a ser de 104,36 hectáreas.
Examinada a devandita proposta, o xurado, por unanimidade, acorda aceptala e incorporar do novo esbozo ao expediente.
O novo esbozo correspóndese co plano do anexo III, ao final deste anuncio.
– MVMC Piguereiro, pertencente aos veciños de Caspedro, O Hospital, Outeiro, A Ribeira de Arriba, San Xulián de Arriba e San Xulián de Abaixo e O Souto, no concello de Quiroga. Expediente Quiroga/25_73.
O 25.8.2025 tivo entrada unha solicitude da comunidade de Caspedro, O Hospital, Outeiro, A Ribeira de Arriba, San Xulián de Arriba e San Xulián de Abaixo e O Souto para que se revise o esbozo do seu monte veciñal conforme a proposta que achega. O 17.9.2025 a comunidade presenta unha mellora voluntaria da solicitude. Procedemento con número de expediente 2025_38RE.
O día 18.9.2025, o Servizo de Montes elaborou unha proposta, en que se recolle a definición do novo esbozo revisado. De acordo coa cartografía resultante, a superficie do monte de Piguereiro pasa a ser de 149,27 hectáreas.
Examinada a devandita proposta, o xurado, por unanimidade, acorda aceptala e incorporar o novo esbozo ao expediente.
O novo esbozo correspóndese co plano do anexo IV, ao final deste anuncio.
– MVMC Bazal, pertencente aos veciños de Bazal, no concello de Cervantes. Expediente Cervantes/26_82.
O 24.7.2025 tivo entrada unha solicitude da comunidade de Bazal para que se revise o esbozo do seu monte veciñal conforme a proposta que achegan. A proposta foi emendada o 1.10.2025 tras o correspondente requirimento por incluír superficies de titularidade allea e alterar o límite con outros montes veciñais. Procedemento con número de expediente 2025_42RE.
O día 14.11.2025, o Servizo de Montes elaborou unha proposta, en que se recolle a definición do novo esbozo revisado. De acordo coa cartografía resultante, a superficie do monte de Bazal pasa a ser de 121,86 hectáreas.
Examinada a devandita proposta, o xurado, por unanimidade, acorda aceptala e incorporar o novo esbozo ao expediente.
O novo esbozo correspóndese co plano do anexo V, ao final deste anuncio.
– MVMC Esculca, Barreira Moura, Cabaleiros e Rego do Madeiro, pertencente aos veciños de Vilacampa, no concello do Valadouro. Expediente Valadouro/31_79.
O 7.8.2025 tivo entrada unha solicitude da comunidade de Vilacampa para que se revise o esbozo do seu monte veciñal conforme a proposta que achega. A proposta foi emendada o 4.10.2025 tras o correspondente requirimento por alterar o límite con outro monte veciñal e excluír, de forma inxustificada, predios da titularidade do monte. Procedemento con número de expediente 2025_45RE.
O día 15.10.2025, o Servizo de Montes elaborou unha proposta, en que se recolle a definición do novo esbozo revisado. De acordo coa cartografía resultante, a superficie do monte de Esculca, Barreira Moura, Cabaleiros e Rego do Madeiro pasa a ser de 606,97 hectáreas.
Examinada a devandita proposta, o xurado, por unanimidade, acorda aceptala e incorporar o novo esbozo ao expediente.
O novo esbozo correspóndese co plano do anexo VI, ao final deste anuncio.
Contra estes acordos, desde o día seguinte ao da súa publicación no Diario Oficial de Galicia, poderá interpoñerse recurso potestativo de reposición ante o Xurado Provincial de Montes Veciñais en Man Común de Lugo no prazo dun mes, ou ben directamente recurso contencioso-administrativo ante o Xulgado do Contencioso-Administrativo de Lugo no prazo de dous meses, de acordo co disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, e co artigo 46 da Lei 29/1998, do 13 de xullo, da xurisdición contencioso-administrativa.
Lugo, 27 de novembro de 2025
María Olga Iglesias Fontal
Presidenta do Xurado Provincial de Clasificación
de Montes Veciñais en Man Común de Lugo
