Antecedentes.

Primeiro. O 22 de xaneiro de 2026, o director xeral do Instituto Galego da Vivenda e Solo (IGVS) adoptou a proposta de declaración de interese autonómico da actuación de creación de solo destinado maioritariamente á construción de vivendas protexidas mediante un proxecto de interese autonómico en Ribadeo, no ámbito identificado como solo urbanizable residencial SUD-R2, axustando a súa delimitación ao parcelario catastral e tendo en conta as edificacións ou infraestruturas existentes nos terreos.

Segundo. O director xeral do IGVS remitiu ao Concello de Ribadeo, o 26 de xaneiro de 2026, a delimitación inicial do ámbito de actuación seleccionado, para os efectos de que manifestase a súa conformidade con carácter previo á súa aprobación mediante resolución da presidenta do IGVS.

Terceiro. Con data do 29 de xaneiro de 2026 tivo entrada no Rexistro do IGVS o Decreto do alcalde de Ribadeo do 28 de xaneiro de 2026, en que resolve:

«Prestar conformidade ao desenvolvemento do ámbito de solo urbanizable SUD-R2 mediante o proxecto de interese autonómico tramitado no expediente SR25-L-RIBAVIL-O-PIA do Instituto Galego da Vivenda e Solo, para os efectos do disposto na Lei 5/2024, do 27 de decembro, de medidas fiscais e administrativas».

Consideracións legais e técnicas:

Primeira. O artigo 62 da Lei 5/2024, do 27 de decembro, de medidas fiscais e administrativas, relativo aos proxectos de interese autonómico para a creación de solo residencial, sinala que:

«Co obxecto de atender as necesidades urxentes de solo residencial, a consellería competente en materia de vivenda, a través do Instituto Galego da Vivenda e Solo ou de entidades integrantes do sector público autonómico participadas por este organismo, poderá promover e desenvolver actuacións de creación de solo destinado maioritariamente á construción de vivendas sometidas a algún réxime de protección pública, sempre que concorran os seguintes requisitos:

a) Que exista unha forte demanda social demostrada por fontes de datos obxectivas, como pode ser o Rexistro Único de Demandantes de Vivenda da Comunidade Autónoma de Galicia.

b) Que as actuacións de transformación urbanística propostas transcendan o ámbito municipal pola súa incidencia territorial, económica, social ou cultural, pola súa magnitude ou polas súas singulares características que as fagan portadoras dun interese supramunicipal cualificado».

Por outra banda, o artigo 63 da Lei 5/2024, do 27 de decembro, baixo a rúbrica «Declaración de interese autonómico», establece o seguinte:

«1. A tramitación dos proxectos regulados no artigo anterior axustarase ás previsións contidas na Lei 1/2021, do 8 de xaneiro, de ordenación do territorio de Galicia, para os proxectos de interese autonómico, de tipo non previsto, xunto coas especialidades recollidas nesta subsección.

2. Como requisito previo para o inicio do procedemento de aprobación como proxectos de interese autonómico, será precisa a declaración do interese autonómico da actuación que constitúa o seu obxecto polo procedemento descrito neste artigo.

3. O Instituto Galego da Vivenda e Solo seleccionará previamente aquelas áreas urbanas en que concorran os requisitos sinalados no artigo 62, identificando, respecto de cada concello ou concellos afectados, as zonas urbanisticamente máis adecuadas para desenvolver as iniciativas de planificación e proxección de actuacións de creación de solo residencial de promoción pública.

4. Unha vez que conste a conformidade do concello afectado, a Presidencia do Instituto Galego da Vivenda e Solo aprobará mediante resolución a delimitación dos ámbitos de actuación que serán obxecto de transformación urbanística, xustificando a concorrencia dos requisitos sinalados no artigo 62. A devandita resolución implicará a declaración do interese autonómico da actuación que constitúa o seu obxecto e será publicada no Diario Oficial de Galicia».

Segunda. Examinada a documentación que consta no expediente, apréciase a concorrencia dos requisitos exixidos polo artigo 62 da Lei 5/2024, do 27 de decembro, para promover e desenvolver actuacións de creación de solo destinado maioritariamente á construción de vivendas sometidas a algún réxime de protección pública en Ribadeo (solo urbanizable residencial SUD-R2, axustando a súa delimitación ao parcelario catastral e tendo en conta as edificacións ou infraestruturas existentes nos terreos).

Así, nos municipios da Mariña lucense, entre eles Ribadeo, existe unha forte demanda social de vivenda, acreditada polo número de persoas inscritas no Rexistro Único de Demandantes de Vivenda da Comunidade Autónoma de Galicia.

Por outra banda, as actuacións de transformación urbanística propostas transcenden o ámbito municipal, xa que a superficie do ámbito permitirá dispor de capacidade suficiente para a fixación de poboación neste zona, en especial da xente moza, e promover, deste xeito, o impulso e a dinamización demográfica dos municipios da Mariña lucense, entre eles Ribadeo, favorecendo, ao mesmo tempo, a implantación de actividades económicas. Ademais, tales actuacións contribuirán ao desenvolvemento e execución das políticas autonómicas sectoriais en materia de vivenda, facilitando o acceso daquelas persoas con máis dificultades, e incidirán no desenvolvemento económico, social e territorial de Galicia, nos termos previstos no artigo 41.2.c) da Lei 1/2021, do 8 de xaneiro, de ordenación do territorio de Galicia.

Terceira. A competencia para ditar a presente resolución corresponde á presidenta do IGVS, conforme o disposto no artigo 63.4 da Lei 5/2024, do 27 de decembro.

Vistos os antecedentes de feito e as consideracións legais descritas anteriormente, así como a proposta do director xeral do IGVS,

RESOLVO:

Aprobar a delimitación do ámbito de actuación do solo urbanizable residencial SUD-R2, que será obxecto de transformación urbanística para a creación de solo destinado maioritariamente á construción de vivendas sometidas a algún réxime de protección pública en Ribadeo, que figura como anexo desta resolución.

A devandita delimitación poderá ser obxecto de variacións como consecuencia dos axustes que sexa preciso introducir na fase de redacción e tramitación dos proxectos de interese autonómico, que serán debidamente comunicadas ao Concello.

Esta resolución implica a declaración do interese autonómico da actuación que se levará a cabo no ámbito delimitado.

De conformidade co establecido no artigo 63.4 da Lei 5/2024, do 27 de decembro, esta resolución deberá publicarse no Diario Oficial de Galicia.

Contra esta resolución cabe interpoñer recurso potestativo de reposición ante a persoa titular da Presidencia do IGVS, no prazo dun mes desde a súa publicación no Diario Oficial de Galicia, ou directamente recurso contencioso-administrativo ante os xulgados do contencioso-administrativo competentes, no prazo de dous meses contados desde a publicación desta resolución no Diario Oficial de Galicia, conforme o disposto no artigo 46 da Lei 29/1998, do 13 de xullo, reguladora da xurisdición contencioso-administrativa.

Santiago de Compostela, 3 de febreiro de 2026

María Martínez Allegue
Presidenta do Instituto Galego da Vivenda e Solo

ANEXO