No DOG núm. 162, do 26 de agosto de 2025, publicouse a Resolución do 18 de xullo de 2025 pola que se convoca o proceso selectivo para o ingreso mediante o sistema de oposición, pola quenda de acceso libre e promoción interna, no corpo facultativo superior de Administración especial da Administración xeral da Comunidade Autónoma de Galicia, subgrupo A1, escala de ciencias, especialidade de ciencias do mar.
O anexo I da referida resolución inclúe o programa que rexerá as probas selectivas. Na parte específica do dito programa figura o tema 15. O Plan Camgal (Plan de control ambiental mariño de Galicia): obxectivos, redes de mostraxe, parámetros e seguimento do estado ambiental.
Porén, o acrónimo do referido Plan Camgal correspóndese co Plan territorial de continxencias por contaminación mariña accidental da Comunidade Autónoma de Galicia. Por motivo desta falta de correspondencia, e en atención ao momento procedemental deste proceso selectivo, considérase como medida máis axeitada a retirada do tema antes referido.
Por outra banda, apreciado un erro de redacción no tema 26, procede a súa corrección.
Por conseguinte, esta consellería, no uso das competencias que lle atribúe a Lei 2/2015, do 29 de abril, do emprego público de Galicia,
DISPÓN:
Modificar o anexo I da Resolución do 8 de xullo de 2025 pola que se convoca o proceso selectivo para o ingreso mediante o sistema de oposición, pola quenda de acceso libre e promoción interna, no corpo facultativo superior de Administración especial da Administración xeral da Comunidade Autónoma de Galicia, subgrupo A1, escala de ciencias, especialidade de ciencias do mar, no seguinte sentido:
Primeiro. Elimínase da parte específica do programa que rexerá a convocatoria de probas selectivas o tema 15. O Plan Camgal (Plan de control ambiental mariño de Galicia): obxectivos, redes de mostraxe, parámetros e seguimento do estado ambiental.
Segundo. Por outra banda, detectado un erro na parte específica do programa que rexerá a convocatoria de probas selectivas, na redacción correspondente ao tema 26, cómpre efectuar a seguinte corrección:
Na páxina 46661, onde di:
«Tema 26. Marisqueo: profesional, a pé e recreativo. Regulación, ordenación e situación socioeconómica».
Debe dicir:
«Tema 26. Marisqueo: profesional (a pé e en embarcación). Regulación, ordenación e situación socioeconómica».
Esta resolución pon fin á vía administrativa e contra ela as persoas interesadas poderán presentar recurso potestativo de reposición ante a persoa titular da consellería competente en materia de emprego público, no prazo dun mes contado desde o día seguinte ao da súa publicación no DOG, de conformidade co establecido na Lei 39/2015, do 1 de outubro, ou impugnala directamente ante a Sala do Contencioso-Administrativo do Tribunal Superior de Xustiza de Galicia, no prazo de dous meses contados desde a mesma data, de conformidade co disposto na Lei 29/1998, do 13 de xullo, reguladora da xurisdición contencioso-administrativa.
Santiago de Compostela, 12 de febreiro de 2026
O conselleiro de Facenda e Administración Pública
P.D. (Orde do 8.1.2020; DOG núm. 16, do 24 de xaneiro)
Nuria Aguilar Vázquez
Directora xeral de Emprego Público e Administración de Persoal