De acordo co convenio de colaboración entre a Escola Galega de Administración Pública (en diante, EGAP) e Vitaly Health Services, S.L. para o desenvolvemento de actividades de formación, divulgación e investigación,

RESOLVO:

Convocar o curso que figura no anexo II, que se deberá desenvolver segundo as bases detalladas no anexo I.

Santiago de Compostela, 10 de febreiro de 2026

Sonia Rodríguez-Campos González
Directora da Escola Galega de Administración Pública

ANEXO I

Primeira. Requisitos das persoas participantes

Poderá participar nas accións formativas convocadas mediante esta resolución o persoal dos equipos de alarma e evacuación, de primeira intervención e de primeiros auxilios, así como o persoal que exerza a Xefatura de Emerxencia e/ou Primeira Intervención dos centros de traballo de menos de 50 traballadores/as incluídos na programación do Servizo de Prevención de Riscos Laborais para o ano 2026 na provincia de Pontevedra, da Cidade da Xustiza de Vigo, así como o persoal da Residencia de Tempo Libre de Panxón.

Este persoal terá que estar en situación de servizo activo (incluído o persoal que teña concedido un permiso por motivos de conciliación da vida persoal, familiar e laboral) e reunir os requisitos establecidos nesta convocatoria e para cada un dos casos no anexo II.

Segunda. Desenvolvemento das actividades de formación

As actividades formativas realizaranse cos requirimentos, a duración e as condicións que para cada unha delas se indique na convocatoria. A información relativa ao desenvolvemento das actividades, así como as súas posibles modificacións, será actualizada e ampliada na páxina web <https://egap.xunta.gal>

Terceira. Acceso ás actividades formativas

O acceso será a través da páxina web da EGAP: <https:// egap.xunta.gal> e, unha vez dentro, haberá que seguir as seguintes instrucións:

1. É preciso estar rexistrado na área de matrícula da EGAP. Para iso, ten que premer na icona «Área de matrícula» da páxina web da EGAP e rexistrarse premendo en «Rexistrar unha conta para acceder ás aplicacións», situada na parte inferior da pantalla (no caso de que o/a traballador/a xa estea rexistrado/a, este paso non será necesario).

2. A EGAP procederá á matriculación do alumnado indicado polo Servizo de Prevención de Riscos Laborais.

3. Unha vez rexistrado/a e matriculado/a, poderá acceder ao curso o día do seu comezo.

4. As persoas interesadas en recibir mensaxes sobre o proceso de selección deberán facilitar un enderezo de correo electrónico e/ou un número de teléfono móbil.

5. A EGAP adoptará as medidas necesarias para facilitar a presentación das solicitudes. As dúbidas, as dificultades técnicas e as peticións de información complementaria serán atendidas a través dos números de teléfono 981 54 62 57, 981 54 62 53, 981 54 62 54, 981 54 62 73 e 981 54 63 35, en horario de atención ao publico (das 9.00 ás 14.00 horas) e do enderezo de correo electrónico <xestion.egap@xunta.gal>

Cuarta. Comprobación de datos

1. Conforme o disposto no artigo 28.2 da Lei 39/2015, do 1 de outubro, do procedemento administrativo común das administracións públicas (BOE núm. 236, do 2 de outubro), para a tramitación do procedemento de selección consultaranse automaticamente os datos das persoas solicitantes das accións formativas, necesarios para realizar o proceso de selección, salvo que a persoa interesada se opoña a iso. Neste caso, a persoa interesada deberá indicalo, incluíndo os motivos de oposición relacionados coa súa situación particular, e achegar ademais unha copia dos documentos a cuxa consulta se opón, a través do seguinte enderezo electrónico: xestion.egap@xunta.gal

2. No caso de que as persoas interesadas se opoñan a esta consulta, deberán indicalo expresamente, incluíndo os motivos de oposición relacionados coa súa situación particular e achegar os documentos que indiquen a súa situación administrativa, tipo de persoal e antigüidade na Administración, a través do seguinte enderezo electrónico <xestion.egap@xunta.gal>

3. Excepcionalmente, no caso de que algunha circunstancia imposibilite a obtención dos citados datos, poderáselles solicitar ás persoas interesadas que presenten os documentos correspondentes.

4. A EGAP poderá pedir as certificacións necesarias para realizar a selección.

Quinta. Criterios de selección

O Servizo de Prevención de Riscos Laborais indicará o persoal obrigado a realizar esta formación.

Sexta. Publicación das relacións do alumnado seleccionado

1. A EGAP publicará no enderezo <https://egap.xunta.gal> unha relación das persoas seleccionadas para participar en cada curso, de acordo co disposto no artigo 45.1.b) da Lei 39/2015, do 1 de outubro, do procedemento administrativo común das administracións públicas.

Sétima. A asistencia

A asistencia:

a) Son obrigatorias a asistencia ás sesións da actividade formativa e a puntualidade.

b) Durante a actividade formativa terá lugar un control permanente de asistencia e puntualidade, incluídos controis extraordinarios.

c) As faltas de asistencia:

1. Non poden superar en ningún caso o 10 % das horas lectivas. En todo caso, as faltas de asistencia deberán xustificarse documentalmente, ante as persoas responsables da actividade formativa, nun prazo máximo de dez (10) días contados a partir do día da finalización desta actividade. As persoas que incumpran o mencionado anteriormente perderán o dereito ao certificado de participación na actividade formativa.

2. Aquelas persoas cuxas faltas de asistencia superen o 50 % das horas lectivas presenciais pasarán ao final das listas de espera de todas as actividades formativas que soliciten e cuxo prazo de matrícula comece dentro do ano seguinte contado a partir do día da finalización desta actividade.

Oitava. Superación da actividade formativa

Para poder superar a actividade de formación, o alumnado deberá superar unha proba de avaliación que se realizará ao final daquela.

Novena. Certificados

Para a obtención do certificado de aproveitamento, o alumnado deberá obter a avaliación positiva do seu profesorado, o cal emitirá un informe en que declare apto/a ou non apto/a cada alumno/a en función do resultado da proba de avaliación.

Décima. Facultades da EGAP e Vitaly Health Services, S.L.

1. A EGAP e Vitaly Health Services, S.L. poderán modificar o desenvolvemento, as datas e os lugares da actividade formativa, así como resolver todas as continxencias que poidan xurdir. Tamén lles corresponde a ambos os dous organismos prover canto sexa necesario para a execución e o cumprimento desta resolución.

2. No suposto de que o número de admitidos/as sexa inferior ao 50 % das prazas convocadas, a EGAP e Vitaly Health Services, S.L. reservan para si o dereito a suspender ou cancelar a actividade, caso en que empregarán os medios de notificación ás persoas interesadas, previstos na normativa vixente.

3. A EGAP e Vitaly Health Services, S.L. garantirán, na actividade derivada desta convocatoria, a promoción da igualdade real e efectiva entre mulleres e homes, a eliminación de calquera tipo de discriminación e o fomento dos dereitos de conciliación.

ANEXO II

Código	Edición	Denominación	Persoal destinatario	Horas	Prazas	Modalidade	Localidade	Data e lugar de realización
CV26034	Pontevedra1	Formación en prevención de riscos laborais: primeiros auxilios, loita contra incendios e evacuación	Persoal dos equipos de alarma e evacuación, de primeira intervención e de primeiros auxilios, así como o persoal que exerza a Xefatura de Emerxencia e/ou Primeira Intervención dos centros de traballo de menos de 50 traballadores/as incluídos na programación do Servizo de Prevención de Riscos Laborais para o ano 2026 na provincia de Pontevedra.	12	35	Presencial	Pontevedra	9 e 10 de marzo Horario: das 8.30 ás 14.30 horas Lugar de realización: Edificio Administrativo de Pontevedra (Campolongo), Aula 3
CV26035	Panxón1	Formación en prevención de riscos laborais: primeiros auxilios, loita contra incendios e evacuación	Persoal dos equipos de alarma e evacuación, de primeira intervención e de primeiros auxilios, así como o persoal que exerza a Xefatura de Emerxencia e/ou Primeira Intervención da Residencia de Tempo Libre de Panxón.	12	25	Presencial	Nigrán	23 e 24 de marzo Horario: das 8.30 ás 14.30 horas Lugar de realización: Residencia de Tempo Libre de Panxón, r/ Cansadoura, 2 (Patos), 36350 Nigrán
CV26035	Panxón2	Formación en prevención de riscos laborais: primeiros auxilios, loita contra incendios e evacuación	Persoal dos equipos de alarma e evacuación, de primeira intervención e de primeiros auxilios, así como o persoal que exerza a Xefatura de Emerxencia e/ou Primeira Intervención da Residencia de Tempo Libre de Panxón.	12	25	Presencial	Nigrán	25 e 26 de marzo Horario: das 8.30 ás 14.30 horas Lugar de realización: Residencia de Tempo Libre de Panxón, r/ Cansadoura, 2 (Patos), 36350 Nigrán
CV26036	CidadeXustiza1	Formación en prevención de riscos laborais: primeiros auxilios, loita contra incendios e evacuación	Persoal dos equipos de alarma e evacuación, de primeira intervención e de primeiros auxilios, así como o persoal que exerza a Xefatura de Emerxencia e/ou Primeira Intervención da Cidade da Xustiza de Vigo.	12	30	Presencial	Vigo	4 e 5 de maio Horario: das 8.30 ás 14.30 horas Lugar de realización: Cidade da Xustiza de Vigo, Aula Informática
CV26036	CidadeXustiza2	Formación en prevención de riscos laborais: primeiros auxilios, loita contra incendios e evacuación	Persoal dos equipos de alarma e evacuación, de primeira intervención e de primeiros auxilios, así como o persoal que exerza a Xefatura de Emerxencia e/ou Primeira Intervención da Cidade da Xustiza de Vigo.	12	30	Presencial	Vigo	11 e 12 de maio Horario: das 8.30 ás 14.30 horas Lugar de realización: Cidade da Xustiza de Vigo, Aula Informática
CV26036	CidadeXustiza3	Formación en prevención de riscos laborais: primeiros auxilios, loita contra incendios e evacuación	Persoal dos equipos de alarma e evacuación, de primeira intervención e de primeiros auxilios, así como o persoal que exerza a Xefatura de Emerxencia e/ou Primeira Intervención da Cidade da Xustiza de Vigo.	12	30	Presencial	Vigo	18 e 19 de maio Horario: das 8.30 ás 14.30 horas Lugar de realización: Cidade da Xustiza de Vigo, Aula Informática
CV26036	CidadeXustiza4	Formación en prevención de riscos laborais: primeiros auxilios, loita contra incendios e evacuación	Persoal dos equipos de alarma e evacuación, de primeira intervención e de primeiros auxilios, así como o persoal que exerza a Xefatura de Emerxencia e/ou Primeira Intervención da Cidade da Xustiza de Vigo.	12	30	Presencial	Vigo	25 e 26 de maio Horario: das 8.30 ás 14.30 horas Lugar de realización: Cidade da Xustiza de Vigo, Aula Informática
CV26036	CidadeXustiza5	Formación en prevención de riscos laborais: primeiros auxilios, loita contra incendios e evacuación	Persoal dos equipos de alarma e evacuación, de primeira intervención e de primeiros auxilios, así como o persoal que exerza a Xefatura de Emerxencia e/ou Primeira Intervención da Cidade da Xustiza de Vigo.	12	30	Presencial	Vigo	1 e 2 de xuño Horario: das 8.30 ás 14.30 horas Lugar de realización: Cidade da Xustiza de Vigo, Aula Informática