Dentro das actividades programadas para o ano 2026, e conforme as funcións atribuídas pola Lei 1/2007, do 15 de xaneiro, de creación da Academia Galega de Seguridade Pública, anúnciase a convocatoria da primeira práctica do Plan anual de adestramento regulamentario para a seguridade no manexo das armas dos/das policías locais de Galicia, que se desenvolverá conforme as seguintes bases:

Obxectivos:

– Facilitar o cumprimento do disposto no artigo 11.4 da Lei 4/2007, de coordinación de policías locais.

– Dispor de persoal actualizado nas prácticas de armamento e tiro policial de defensa.

– Controlar a práctica anual e regulamentaria do cadro de persoal, mediante un control e unha cartilla de tiro individual.

– Establecer distintos niveis para categorías de tirador, segundo a seguridade e habilidade que demostre no manexo das armas.

Persoal destinatario:

A actividade vai dirixida ao persoal dos corpos das policías locais da Comunidade Autónoma de Galicia que cumpran co disposto no artigo 11.4 da Lei 4/2007, relativo a garantir unha adecuada preparación no uso da arma regulamentaria para o persoal dos corpos da policía local.

Para tal fin, a Dirección Xeral da Academia Galega de Seguridade Pública establece un plan anual de adestramento, no cal se inclúen dúas prácticas anuais para o persoal dos concellos interesados.

Solicitudes:

Os concellos interesados deberán remitirlle o formulario que está na páxina web https://agasp.xunta.gal/es á Academia Galega de Seguridade Pública antes do día 10 de marzo de 2026.

As solicitudes deberán presentarse a través do correo electrónico formacion.agasp@xunta.gal, indicando no asunto: Plan de tiro 2026, ou ben a través do rexistro electrónico.

As solicitudes deberán estar autorizadas pola Alcaldía, concellaría ou xefatura, segundo proceda.

Todos aqueles concellos que adquirisen recentemente armas regulamentarias para a policía local terán preferencia para efectuar as prácticas regulamentarias, indispensables para un mellor coñecemento da nova arma e a adquisición da destreza suficiente para o seu manexo coa seguridade e habilidade necesarias.

Medios:

Para o desenvolvemento da actividade, o alumnado deberá traer a súa respectiva arma regulamentaria da dotación e a munición correspondente para as prácticas. A Academia Galega de Seguridade Pública nomeará o profesorado e as persoas instrutoras necesarias.

Determinación da data das prácticas. A seguir, sinálanse os días e os horarios habilitados dentro da primeira práctica do plan:

Opción	Día	Horario
1	16.3.2026	16.00 a 20.30 h
2	18.3.2026	16.00 a 20.30 h
3	19.3.2026	10.00 a 14.30 h
4	19.3.2026	16.00 a 20.30 h
5	23.3.2026	16.00 a 20.30 h
6	25.3.2026	16.00 a 20.30 h
7	26.3.2026	10.00 a 14.30 h
8	26.3.2026	16.00 a 20.30 h
9	6.4.2026	16.00 a 20.30 h
10	8.4.2026	16.00 a 20.30 h
11	9.4.2026	10.00 a 14.30 h
12	9.4.2026	16.00 a 20.30 h
13	13.4.2026	16.00 a 20.30 h
14	5.4.2026	16.00 a 20.30 h
15	20.4.2026	16.00 a 20.30 h
16	22.4.2026	16.00 a 20.30 h
17	27.4.2026	16.00 a 20.30 h
18	29.4.2026	16.00 a 20.30 h
19	4.5.2026	16.00 a 20.30 h
20	6.5.2026	16.00 a 20.30 h
21	7.5.2026	10.00 a 14.30 h
22	7.5.2026	16.00 a 20.30 h
23	11.5.2026	16.00 a 20.30 h
24	13.5.2026	16.00 a 20.30 h
25	14.5.2026	10.00 a 14.30 h
26	14.5.2026	16.00 a 20.30 h
27	18.5.2026	16.00 a 20.30 h
28	20.5.2026	16.00 a 20.30 h
29	25.5.2026	16.00 a 20.30 h
30	27.5.2026	16.00 a 20.30 h
31	1.6.2026	16.00 a 20.30 h
32	3.6.2026	16.00 a 20.30 h
33	4.6.2026	10.00 a 14.30 h
34	4.6.2026	16.00 a 20.30 h

Unha vez configurado o calendario segundo as solicitudes recibidas, comunicaráselles aos concellos coa finalidade de que, pola súa vez, informen con antelación suficiente da relación nominal do persoal participante na práctica.

Control e cartilla de tiro:

O control das prácticas do persoal xestionarano conxuntamente a Academia Galega de Seguridade Pública e a persoa designada polo concello.

Estableceranse niveis segundo a categoría e a habilidade que cada persoa tiradora amose nos aspectos tanto de seguridade como de manexo coas armas, niveis a que irá accedendo paulatinamente cada policía, se é o caso. Estes niveis constarán na cartilla ou documento de control que se dispoña para as prácticas de tiro, tal e como se indicaba no punto anterior.

Lugar:

As prácticas desenvolveranse na galería de tiro da Academia Galega de Seguridade Pública, sita na rúa da Cultura, s/n, no concello da Estrada (Pontevedra).

Modificacións:

A Academia Galega de Seguridade Pública poderá modificar o desenvolvemento do Plan anual de actualización para adaptalo ás necesidades da Administración e ás continxencias que poidan xurdir.

A Estrada, 26 de febreiro de 2026

Santiago Villanueva Álvarez
Director xeral da Academia Galega de Seguridade Pública