Mediante a Resolución do 23 de febreiro de 2026 (DOG número 36, do 24 de febreiro), modificada pola Resolución do 27 de febreiro de 2026 (DOG número 40, do 2 de marzo), da Dirección Xeral da Función Pública, convocáronse para a elección de destino definitivo as novas persoas aspirantes que superaron o proceso selectivo para o acceso ao corpo de técnicos/as de carácter facultativo, escala técnica do Servizo de Prevención e Defensa contra Incendios Forestais, subgrupo B, especialidade bombeiro/a forestal-xefe/a de brigada, e ao corpo de auxiliares de carácter técnico de Administración especial da Administración xeral da Comunidade Autónoma de Galicia, escala de auxiliar do Servizo de Prevención e Defensa contra Incendios Forestais, subgrupo C2, na especialidade de bombeiro/a forestal, convocados polas resolucións do 22 de decembro de 2022 (DOG número 244, do 26 de decembro, e DOG número 245, do 27 de decembro).

Ao abeiro do disposto no punto décimo primeiro da Resolución do 23 de febreiro de 2026, modificada pola Resolución do 27 de febreiro de 2026, convócanse as persoas aspirantes que no procedemento de elección de destino soliciten unha praza definida na RPT coa observación «R.I.: proba física pack test» para o día 10 de marzo de 2026, a partir das 10.00 horas, no estadio municipal Verónica Boquete de San Lázaro, situado na avenida de Fernando de Casas Novoa, 20, Santiago de Compostela, para realizar a proba física, en chamamento único segundo a distribución que se publicará no portal web corporativo da Dirección Xeral de Emprego Público e Administración de Persoal:
www.xunta.gal/es/funcion-publica/procesos-selectivos

As persoas aspirantes deberán acudir a realizar a proba provistas do seu DNI e dun certificado médico oficial ou informe sobre o seu estado de saúde, asinado por un/unha médico/a colexiado/a en exercicio, no cal se faga constar que non presentan enfermidade ou discapacidade que impida o correcto desenvolvemento dunha proba de esforzo físico.

O dito certificado deberá ter unha antigüidade máxima de tres meses respecto da data de realización da proba.

Santiago de Compostela, 3 de marzo de 2026

Nuria Aguilar Vázquez
Directora xeral de Emprego Público e Administración de Persoal