A Comunidade Autónoma de Galicia ten competencia exclusiva en materia de asistencia social, segundo o disposto no artigo 27.23 do seu Estatuto de autonomía.
A Lei 13/2008, do 3 de decembro, de servizos sociais de Galicia, establece no seu artigo 3 os obxectivos do sistema galego de servizos sociais, incluíndo entre estes o de proporcionar oportunidades e recursos que garantan a igualdade entre mulleres e homes e que posibiliten a conciliación entre a vida persoal, familiar e laboral, así como o de garantir o apoio ás familias como marco de referencia en que se desenvolven as persoas.
A Lei 3/2011, do 30 de xuño, de apoio á familia e á convivencia de Galicia, recoñece no seu artigo 6 como un dos principios de responsabilidade pública o de atender, apoiar e protexer as familias como núcleo fundamental da sociedade no cumprimento das súas funcións.
Así mesmo, a Lei 5/2021, do 2 de febreiro, de impulso demográfico de Galicia, establece no seu artigo 49.1 que a Administración autonómica garantirá a calidade e o carácter inclusivo dos recursos de educación infantil 0-3, avanzará na súa universalización e gratuidade e promoverá unha dotación suficiente de prazas e os recursos para facer efectivas as posibilidades de acceso, permanencia e promoción de toda a poboación infantil a esta etapa educativa, preferentemente en centros públicos.
Na súa consecución, a Lei 13/2008, do 3 de decembro, de servizos sociais de Galicia, na súa disposición adicional novena prevé, tras a última modificación introducida pola Lei 18/2021, do 27 de decembro, de medidas fiscais e administrativas de Galicia, a extensión da medida de gratuidade da atención educativa nas escolas infantís 0-3 para todas as nenas e nenos matriculados nestes centros.
O Consorcio Galego de Servizos de Igualdade e Benestar ten como misión primordial a participación na dirección, avaliación e control da xestión dos servizos sociais de ámbito local, con especial atención na xestión integral das escolas infantís e na atención educativa e asistencial ás nenas e nenos menores de tres anos na forma de recursos, equipamentos, proxectos, programas e prestacións, e no ámbito territorial dos municipios que o compoñen, co obxecto de garantir o acceso de todas as galegas e galegos a uns servizos sociais públicos de calidade, a través dunha oferta de recursos suficiente e equilibrada territorialmente, que contribúa a reforzar a igualdade de oportunidades na utilización da rede social de atención, segundo o disposto no artigo 6 dos estatutos do consorcio.
Conforme o exposto,
RESOLVO:
Artigo 1. Obxecto
Esta resolución ten por obxecto convocar o procedemento de adxudicación de prazas nas escolas infantís 0-3 dependentes do Consorcio Galego de Servizos de Igualdade e Benestar (en diante, o Consorcio) para o curso 2026/27 (código BS404A para solicitudes de novo ingreso e código BS404B para solicitudes de renovación).
Artigo 2. Requisitos para ser adxudicataria/o
Serán requisitos para ser adxudicataria/o de praza nas escolas infantís 0-3 dependentes do Consorcio para o curso 2026/27:
a) Que a nena ou o neno xa nacese no momento da presentación da solicitude.
b) Que teña unha idade mínima de tres meses na data de ingreso na escola infantil en que obteña praza e non teña cumpridos os 3 anos de idade o 31 de decembro de 2026. Non obstante o anterior, poderanse eximir do límite de idade dos 3 anos as nenas e os nenos con necesidades específicas de apoio educativo, de acordo co Decreto 229/2011, do 7 de decembro, polo que se regula a atención á diversidade do alumnado dos centros docentes da Comunidade Autónoma de Galicia.
c) Que as familias que xa escolarizaran unha filla ou fillo no mesmo centro ou en calquera outro centro da rede pública autonómica A Galiña Azul, que comprende as escolas infantís 0-3 dependentes da Axencia Galega de Servizos Socias e do Consorcio, deberán estar ao día no pagamento das cotas polos servizos recibidos na data de presentación da solicitude, tanto nos supostos de renovación de praza como de novo ingreso.
Artigo 3. Orde de adxudicación das prazas
1. O procedemento ordinario de adxudicación das prazas nos centros do consorcio realizarase, directamente, pola seguinte orde preferente de solicitude:
a) Para as nenas e os nenos escolarizados durante o curso 2025/26 en calquera das escolas infantís do consorcio terán dereito á renovación automática da súa praza na quenda en que estiveran escolarizadas/dos sempre que reúnan os requisitos establecidos no artigo 2 e sempre que estiveran matriculadas/dos no presente curso con anterioridade ao 31 de xaneiro de 2026, tal e como se recolle no artigo 14.2.a) do Regulamento de réxime interno das escolas infantís xestionadas polo Consorcio (en diante, RRI).
As persoas usuarias de media xornada só poderán variar o horario establecido na súa solicitude, de haber prazas vacantes no horario solicitado. De haber máis solicitudes que prazas vacantes, a adxudicación de prazas na nova franxa horaria farase en función da orde de puntuación acadada no proceso de baremación polo que se incorporou á escola segundo o recollido no artigo 15.a) do RRI.
Naqueles centros en que por carecer de demanda suficiente se reduzan os horarios, o antedito alumnado con dereito á renovación de praza en xornada de tarde poderá renovala para o mesmo centro en xornada de mañá.
b) Para as nenas e nenos xa escolarizados nunha escola infantil da rede A Galiña Azul, que as súas familias xustifiquen un cambio de domicilio e/ou de lugar de traballo, terán dereito preferente a solicitar unha praza en calquera das escolas infantís da dita rede sempre que, unha vez rematado o proceso de renovación de praza do alumnado da propia escola establecido na letra a), existan prazas vacantes suficientes.
c) Para as nenas e nenos para os que se solicite novo ingreso en calquera das escolas infantís do Consorcio, seguirán a seguinte orde de adxudicación:
1º. As fillas e os fillos do persoal que preste servizo nas escolas infantís 0-3 dependentes do consorcio, cando soliciten a praza para o centro onde presta servizo unha das persoas proxenitoras ou ambas, a persoa acolledora ou a persoa titora legal.
2º. As nenas e os nenos con irmá ou irmán con praza no centro para o que solicitan a praza, renovada ou de novo ingreso.
3º. As nenas e nenos con medidas administrativas de tutela ou garda pola Consellería de Política Social e Igualdade en situación de acollemento familiar.
4º. As nenas e nenos, fillas ou fillos de mulleres vítima de violencia de xénero.
5º. As prazas que queden vacantes por non se cubriren por calquera dos supostos previstos nos catro números ordinais anteriores adxudicaranse segundo a puntuación obtida pola aplicación do baremo que figura no anexo IV. Esta puntuación determinará a orde de prelación na adxudicación das prazas dentro dos criterios de prioridade para a adxudicación de prazas previstos no artigo 14.1 do RRI:
En primeiro lugar obterán praza nas escolas as/os nenas/os empadroados no concello en que se sitúe a escola. En segundo lugar, de existiren prazas vacantes, poderán obter praza as/os fillas/os de persoas que, estando empadroadas noutro concello, teñan os seus postos de traballo no concello en que se localice a escola. En terceiro lugar, poderán acceder tamén persoas dos concellos limítrofes.
2. Con carácter excepcional habilitarase un procedemento extraordinario nos supostos que se relacionan, nos cales se realizará a adxudicación das prazas pola seguinte orde:
a) Para os ingresos urxentes reservarase, polo menos, unha praza por cada grupo de idade e, como máximo, unha por unidade aberta.
Terán a consideración de ingresos urxentes os seguintes casos:
1º. As nenas e nenos tuteladas/os ou en situación de garda pola Consellería de Política Social e Igualdade.
2º. As fillas e fillos das mulleres que se atopen nunha casa de acollida e/ou sexan vítimas de violencia de xénero.
3º. Aqueloutros en que concorran circunstancias socioeconómicas e familiares que requiran unha intervención inmediata.
b) As solicitudes presentadas pasado o prazo establecido no primeiro parágrafo do artigo 8.2 serán adxudicadas, en todo caso, segundo a puntuación obtida pola aplicación do baremo que figura no anexo IV. Nestes supostos, o procedemento de adxudicación levarase a cabo nos baremos extraordinarios de setembro e decembro, segundo o previsto no artigo 20 do RRI.
Nestes supostos, a adxudicación estará condicionada á existencia de prazas dispoñibles para o grupo de idade do neno ou da nena no centro para o que se solicita praza.
3. As solicitudes presentadas por un cambio de concello de residencia ou de traballo da unidade familiar, ou por un cambio de domicilio ou lugar de traballo da unidade familiar dentro do mesmo concello, con praza de novo ingreso adxudicada nunha escola infantil da rede pública autonómica A Galiña Azul, considéranse traslados de centro e, de non existir prazas vacantes no novo centro solicitado dependente do consorcio, serán integradas na lista de agarda con carácter preferente sobre as que concorran ás vacantes resultantes do procedemento ordinario segundo o establecido no número 1.c).5º.
De haber máis dunha solicitude nestas circunstancias, a adxudicación realizarase segundo a data da súa presentación en calquera dos lugares e rexistros establecidos nos artigos 14.1 e 16.4 da Lei 39/2015, do 1 de outubro, do procedemento administrativo común das administracións públicas.
Artigo 4. Calendario e horario de apertura das escolas infantís
1. Nas escolas infantís 0-3 a que se refire esta resolución, o curso escolar dará comezo o venres 4 de setembro de 2026.
Os centros permanecerán abertos de luns a venres, excluídos os días considerados festivos no calendario laboral e permanecerán pechados os días 24 e 31 de decembro. Ademais permanecerán pechados os días 28, 29 e 30 de decembro de 2026.
As escolas pecharán ás 15.00 horas os días 5 de xaneiro e Martes de Entroido. No caso de escolas infantís situadas en concellos en que o día 9 de febreiro, Martes de Entroido, sexa festividade local poderán pechar ás 15.00 horas, o luns día 8 de febreiro.
De ser o caso, as nenas e nenos deberán ser recollidos ás 15.00 horas os días en que se celebren festas na escola en horario de tarde que exixan a participación do persoal e que estean previstas na programación anual.
Así mesmo, con carácter xeral, todas as escolas infantís permanecerán pechadas durante o mes de agosto correspondente ao curso 2026/27.
Excepcionalmente, no mes de agosto de 2027, a Xerencia poderá acordar a prestación do servizo nun determinado número de escolas de garda podendo establecer un sistema rotativo entre aquelas radicadas nun mesmo concello ou atendendo a unha distribución zonal para o resto das escolas.
Os centros que eventualmente poidan permanecer abertos serán determinados pola Xerencia atendendo ao número de solicitudes debidamente xustificadas con base en motivos laborais ou enfermidades graves.
Para a apertura da escola de garda será necesaria unha demanda de prazas que permita crear, polo menos, unha unidade internivelar (15 nenas/os de entre 0-3 anos).
O alumnado poderá asistir ao centro un máximo de once meses dentro do período de setembro a agosto do curso 2026/27.
En casos excepcionais debidamente xustificados poderase admitir a asistencia da nena ou do neno durante os 12 meses do ano. En tales circunstancias deberase formular unha solicitude cunha antelación mínima dun mes, agás causas sobrevidas que o impidan. Esta solicitude será estudada e, se procede, autorizada pola Xerencia Adxunta de Escolas Infantís do Consorcio. A ausencia de resposta no prazo de 10 días suporá a desestimación da solicitude.
2. O horario de apertura das escolas infantís 0-3 dependentes do Consorcio para o curso 2026/27 e a relación delas xunto cos seus enderezos pode consultarse no anexo VI e nas páxinas web: https://sede.xunta.gal, https://politicasocial.xunta.gal e https://www.igualdadebenestar.org
As franxas horarias, tanto de apertura como de peche dos centros contempladas no anexo VI, poderán ser modificadas atendendo á demanda existente.
En ningún caso a/o nena/o que sexa recollida/o en último lugar non poderá exceder a súa permanencia na escola máis alá de 30 minutos despois da saída do resto das nenas e nenos.
As persoas usuarias dentro do horario de apertura e peche do centro, poderán optar polos seguintes tipos de xornadas:
1. Xornada completa, coas seguintes modalidades:
a) Continua: aquela en que a nena ou o neno permanece na escola ata o máximo de oito horas, sen solución de continuidade.
b) Partida: aquela en que a nena ou o neno permanece na escola ata o máximo de 8 horas, con solución de continuidade. Neste caso, o tempo de permanencia na escola, con carácter xeral, non poderá ser inferior a 3 horas tanto na xornada de mañá como na xornada de tarde.
c) Por quendas: aquela en que por motivos persoais ou laborais dos proxenitores ou representante legal da nena ou do neno debidamente acreditados, esta/e asiste semanas alternas en horarios distintos.
2. Media xornada: aquela que, cun horario diario mínimo de tres horas e máximo de catro, se desenvolvan en xornada de mañá con ou sen servizo de comedor, ou en xornada de tarde, con independencia da potestade organizativa do centro.
A permanencia do alumnado no centro non poderá superar as oito horas diarias dentro da xornada pola que opte, agás cando, por circunstancias excepcionais debidamente acreditadas, teña que permanecer un tempo superior ao máximo establecido. Estes supostos, serán estudados e, de ser o caso, autorizados pola Xerencia Adxunta para Escolas Infantís.
3. A Xerencia do Consorcio poderá autorizar tempos de reunión para o persoal das escolas dentro do horario de apertura destas. As direccións das escolas infantís deberán informar as familias das datas e horas en que as ditas reunións teñan lugar no momento de matriculación das nenas e nenos.
Artigo 5. Prestacións das escolas infantís
1. As persoas usuarias que soliciten praza para unha das escolas infantís 0-3 do Consorcio poden optar por unha das seguintes modalidades de servizo:
a) Atención educativa con comedor.
b) Atención educativa sen comedor.
A opción dos servizos elixidos farase constar na solicitude e manterase durante todo o curso, salvo circunstancias sobrevidas debidamente acreditadas que xustifiquen a necesidade de modificación da opción elixida inicialmente.
2. O horario para o alumnado que opte pola modalidade de servizo prevista na letra b) do número anterior será o establecido polo centro con base nos seus criterios organizativos de funcionamento.
3. As nenas e nenos que teñan concedida praza sen servizo de comedor poderán facer uso deste servizo en días soltos sempre que se comunique á Dirección do centro con antelación suficiente e aboen o prezo estipulado.
Artigo 6. Prezos para os servizos complementarios das escolas infantís
1. Os prezos que deberán pagar as persoas usuarias para o curso 2026/27 serán os establecidos na normativa de prezos das escolas infantís 0-3 dependentes de entidades do sector público autonómico de servizos sociais para os servizos complementarios, ao ser gratuíta a atención educativa para todo o alumnado solicitante.
2. Aboaranse once mensualidades por curso, agás nos casos establecidos na devandita normativa de prezos.
3. A non asistencia á escola infantil durante un determinado período non supón redución nin exención ningunha do pagamento das cotas correspondentes aos servizos complementarios, agás nos casos establecidos na dita normativa de prezos.
Artigo 7. Regras para a determinación do importe do prezo público aplicables aos servizos complementarios
Para a determinación do importe mensual do prezo público que se debe aboar polos servizos complementarios utilizados nas escolas infantís 0-3 dependentes do Consorcio, teranse en conta as especificacións recollidas na normativa de prezos das escolas infantís 0-3 dependentes de entidades do sector público autonómico de servizos sociais.
Para estes efectos tomarase para o cálculo da cota a declaración do imposto sobre a renda das persoas físicas (en diante, IRPF) do último período impositivo con prazo de prestación vencido no momento de prestación da solicitude.
Artigo 8. Forma, lugar e prazo para a presentación das solicitudes
1. As solicitudes para a renovación de praza (procedemento BS404B) do alumnado escolarizado durante o curso 2025/26, e as solicitudes de novo ingreso (procedemento BS404A) presentarase preferiblemente por vía electrónica a través do formulario normalizado anexo V e anexo I respectivamente, dispoñible na sede electrónica da Xunta de Galicia, https://sede.xunta.gal
Opcionalmente, poderanse presentar as solicitudes presencialmente en calquera dos lugares e rexistros establecidos na normativa reguladora do procedemento administrativo común.
No impreso de solicitude (anexo I) poderá solicitarse praza para máis dunha escola, indicando a orde de preferencia. Presentarase unha única solicitude na escola que se indique como primeira opción.
Os impresos estarán dispoñibles ademais no enderezo electrónico https://www.igualdadebenestar.org e https://politicasocial.xunta.gal e facilitaranse tamén nos propios centros en que se solicite praza.
Para a presentación das solicitudes poderá empregarse calquera dos mecanismos de identificación e sinatura admitidos pola sede electrónica da Xunta de Galicia, incluído o sistema de usuario e Chave365 (https://sede.xunta.gal/chave365).
2. O prazo para a presentación das solicitudes no procedemento ordinario, tanto de reserva de praza como de novo ingreso, comeza o día seguinte ao da publicación desta resolución no Diario Oficial de Galicia e finaliza o día 7 de abril de 2026.
O prazo para a presentación das solicitudes que se presenten ao abeiro do disposto no artigo 3.2.b) finalizará o 12 de marzo de 2027.
Artigo 9. Documentación complementaria
1. Para a renovación de praza, as persoas interesadas deberán achegar coa solicitude (anexo V procedemento BS404B) o anexo III, no caso de persoas solicitantes, separadas ou divorciadas, que necesitan dunha autorización expresa do proxenitor ou proxenitora non solicitante para presentar a solicitude de praza.
2. Para novo ingreso as persoas interesadas deberán achegar coa solicitude a seguinte documentación (anexo I procedemento BS404A):
a) Anexo III, no caso de persoas solicitantes, separadas ou divorciadas, que necesitan dunha autorización expresa do proxenitor ou proxenitora non solicitante para presentar a solicitude de praza.
b) Xustificante de ocupación das persoas proxenitoras ou ambas, da persoa titora legal ou persoa acolledora actualizada no caso de persoas traballadoras que non estean dadas de alta no réxime xeral da Seguridade Social.
c) Certificado de empadroamento da unidade familiar expedido polo concello correspondente no cal se fará constar a data de alta no padrón municipal de habitantes, que en todo caso, deberá ser anterior ao 1 de xaneiro do ano en que se solicite a praza, só nos supostos de escolas infantís situadas en concellos limítrofes con outras comunidades autónomas.
d) Copia do libro de familia ou, na súa falta, outro documento que acredite oficialmente a situación familiar.
e) Certificado do grao de discapacidade e/ou de dependencia da nena ou do neno para quen se solicita praza, se é o caso, cando non sexa expedido pola Comunidade Autónoma de Galicia.
f) Informe sobre a necesidade de integración na escola infantil acreditada por un Equipo de Valoración e Orientación da Consellería de Política Social e Igualdade, no caso das nenas e dos nenos con necesidades específicas de apoio educativo.
g) Copia da resolución administrativa de acollemento ou de garda con fins adoptivos, cando estean formalizados por outra comunidade autónoma distinta da galega.
h) Resolución da declaración de incapacidade permanente absoluta ou gran invalidez.
i) Se procede, outros documentos en que consten incidencias familiares, económicas e sociais puntuables no baremo nos supostos en que este fora de aplicación, que se relacionan:
1º. Certificado do grao de discapacidade e/ou de dependencia das persoas proxenitoras ou ambas, da persoa acolledora, persoa titora legal, ou outros membros da unidade familiar cando non sexan expedidos pola Comunidade Autónoma de Galicia.
2º. Certificado administrativo de monoparentalidade expedido por outra comunidade autónoma.
3º. Copia do título de familia numerosa, no caso de que non sexa expedido pola administración da Comunidade Autónoma de Galicia.
4º. Certificado que acredite a condición de deportista de alto nivel ou de alto rendemento deportivo, ou a condición de persoa adestradora, técnica, xuíz/a ou árbitro/a de alto nivel deportivo recoñecido pola Comunidade Autónoma de Galicia, ao abeiro do establecido no Decreto 165/2020, do 17 de setembro, polo que se regula o deporte de alto nivel, de alto rendemento e de rendemento deportivo de base de Galicia.
j) Acreditación da condición de muller vítima de violencia de xénero mediante calquera dos seguintes documentos:
1º. Certificación da orde de protección ou da medida cautelar, ou testemuño ou copia da propia orde de protección ou da medida cautelar autenticada pola/o letrada/o da Administración de Xustiza.
2º. Sentenza de calquera orde xurisdicional que declare que a muller sufriu violencia en calquera das modalidades definidas na Lei 11/2007, do 27 de xullo, galega para a prevención e o tratamento integral da violencia de xénero.
3º. Certificación e/ou informe dos servizos sociais e/ou sanitarios da Administración pública autonómica ou local.
4º. Certificación dos servizos de acollida da Administración pública autonómica ou local.
5º. Informe do Ministerio Fiscal que indique a existencia de indicios de violencia.
6º. Informe da Inspección de Traballo e Seguridade Social.
7º. Informe das forzas e corpos de seguridade que indique a existencia de indicios claros de trata de seres humanos con fins de explotación sexual.
k) Certificado de empadroamento da nena ou do neno e dunha das persoas proxenitoras ou representante legal expedido polo concello en que residan (con efectos desde o día anterior ao comezo do prazo de presentación de solicitudes).
l) Certificado da empresa ou da institución correspondente, nos casos de non estar censado no concello onde estea a escola, pero algunha das persoas proxenitoras ou representante legal da nena ou do neno traballe no concello en que se localice aquela.
ll) No caso de estar censado nun concello limítrofe a aquel onde radique a escola, dentro da Comunidade Autónoma de Galicia, achegarase o certificado de empadroamento do concello do que procede.
3. A falta de presentación dalgún dos documentos recollidos nas letras b), e), f), i), j) do número anterior dentro do prazo de presentación da solicitude e emenda suporá a non valoración de calquera das circunstancias alegadas neles na correspondente epígrafe do baremo que se recolle no anexo IV, nos supostos nos que sexan de aplicación.
4. De conformidade co artigo 28.3 da Lei 39/2015, do 1 de outubro, non será necesario achegar os documentos que xa foran presentados anteriormente pola persoa interesada ante calquera Administración. Neste caso, a persoa interesada deberá indicar en que momento e ante que órgano administrativo presentou os ditos documentos, que serán recadados electronicamente a través das redes corporativas ou mediante consulta ás plataformas de intermediación de datos ou outros sistemas electrónicos habilitados para o efecto, agás que conste no procedemento a oposición expresa da persoa interesada.
De forma excepcional, se non se puideran obter os citados documentos, poderá solicitarse novamente á persoa interesada a súa achega.
5. A documentación complementaria presentarase preferiblemente por vía electrónica.
Opcionalmente as persoas interesadas poderán presentar a documentación complementaria presencialmente en calquera dos lugares e rexistros establecidos na normativa reguladora do procedemento administrativo común.
As persoas interesadas responsabilizaranse da veracidade dos documentos que presenten. Excepcionalmente, cando a relevancia do documento no procedemento o exixa ou existan dúbidas derivadas da calidade da copia, a Administración poderá solicitar de maneira motivada o cotexo das copias achegadas pola persoa interesada, para o que poderán requirir a exhibición do documento ou da información orixinal.
6. Sempre que se realice a presentación de documentos separadamente da solicitude deberase indicar o código e o órgano responsable do procedemento, o número de rexistro de entrada da solicitude e o número de expediente, se se dispón del.
7. No caso de que algún dos documentos que se van presentar de forma electrónica superase os tamaños máximos establecidos ou tivera un formato non admitido pola sede electrónica da Xunta de Galicia, permitirase a presentación deste de forma presencial dentro dos prazos previstos e na forma indicada no parágrafo anterior. A información actualizada sobre o tamaño máximo e os formatos admitidos pode consultarse na sede electrónica da Xunta de Galicia.
Artigo 10. Comprobación de datos
1. Para a tramitación dos procedementos BS404B e BS404A consultaranse automaticamente os datos incluídos nos seguintes documentos en poder da Administración actuante ou elaborados polas administracións públicas agás que a persoa interesada se opoña á súa consulta:
a) Documento nacional de identidade (DNI) ou número de identidade de estranxeiro/a (NIE) da persoa solicitante e da persoa cónxuxe ou parella, de ser o caso.
b) Declaración do IRPF, da persoa solicitante, da/do cónxuxe ou parella e demais membros da unidade familiar, de ser o caso, correspondente ao último período impositivo con prazo de presentación vencido no momento de presentación da solicitude.
c) Certificado de empadroamento da persoa solicitante, da persoa cónxuxe ou parella e do menor para o que se solicita a praza, só no caso de solicitudes de novo ingreso, procedemento BS404A.
2. Nos supostos de solicitudes de novo ingreso, procedemento BS404A, consultaranse ademais os seguintes datos cando a persoa interesada faga constar na solicitude que lle é de aplicación a circunstancia que acredita o documento correspondente:
a) Certificado de discapacidade da nena ou do neno para quen se solicita praza expedido pola Comunidade Autónoma de Galicia.
b) Certificado de recoñecemento do grao e nivel de dependencia da nena ou do neno para quen se solicita praza expedido pola Comunidade Autónoma de Galicia.
c) Resolución de acollemento ou garda con fins adoptivos da nena ou do neno para quen se solicita praza formalizados pola Comunidade Autónoma de Galicia.
d) Certificado de alta na Seguridade Social na data de presentación da solicitude da persoa solicitante e da/do cónxuxe ou parella.
e) Certificado de estar inscrita como demandante de emprego a persoa solicitante e a/o cónxuxe ou parella, a data do día anterior ao da publicación desta resolución, de ser o caso.
f) Certificado de discapacidade dunha das persoas proxenitoras ou ambas, persoa acolledora ou persoa titora legal expedido pola Comunidade Autónoma de Galicia.
g) Certificado de recoñecemento do grao e nivel de dependencia dunha das persoas proxenitoras ou ambas, persoa acolledora ou persoa titora legal expedido pola Comunidade Autónoma de Galicia.
h) Certificado de monoparentalidade expedido pola Comunidade Autónoma de Galicia.
i) Título de familia numerosa expedido pola Comunidade Autónoma de Galicia.
3. No caso de que as persoas interesadas se opoñan á consulta, deberán indicalo no recadro correspondente habilitado no formulario correspondente e achegar os documentos.
Cando así o exixa a normativa aplicable, solicitarase o consentimento expreso da persoa interesada para realizar a consulta.
4. Excepcionalmente, no caso de que algunha circunstancia imposibilitase a obtención dos citados datos, poderase solicitar ás persoas interesadas a presentación dos documentos correspondentes.
5. A persoa solicitante asinará na declaración responsable que forma parte da solicitude, que dispón do documento asinado pola persoa cónxuxe ou parella da persoa solicitante ou outros membros da unidade familiar, de ser o caso, en que autoriza á comprobación dos datos desta última, conforme o modelo do anexo II. O devandito documento poderá ser requirido pola Administración pública en calquera momento.
Así mesmo, no caso de que a persoa cónxuxe ou parella da persoa solicitante ou outros membros da unidade familiar, de ser o caso, se opoña á comprobación de datos, farao constar na dita declaración responsable e, consecuentemente, presentará os documentos que os acrediten.
Artigo 11. Trámites administrativos posteriores á presentación da solicitude
A sede electrónica da Xunta de Galicia permite ás persoas interesadas realizar trámites electrónicos, con posterioridade ao inicio do expediente, accedendo á Carpeta cidadá da persoa interesada. Opcionalmente as persoas interesadas tamén poderán realizar os ditos trámites presencialmente en calquera dos lugares e rexistros establecidos na normativa reguladora do procedemento administrativo común.
Artigo 12. Instrución do procedemento
As direccións das escolas infantís que xestionen este procedemento, como órganos responsables da súa tramitación, comprobarán que as solicitudes reúnen os requisitos recollidos nesta resolución. De non ser así, requirirase a persoa interesada para que, nun prazo de dez (10) días hábiles, emende a falta ou achegue os documentos preceptivos, con indicación de que, se non o fixera así, de acordo co establecido no artigo 68 da Lei 39/2015, do 1 de outubro, entenderase que desiste da súa petición, logo da resolución que deberá ser ditada nos termos previstos no artigo 21 da dita lei.
A dirección do centro e a persoa titular da Xerencia Adxunta de Escolas Infantís do consorcio poderán reclamar en calquera momento todos aqueles datos que coiden precisos para unha realización máis eficaz da súa función e a súa debida acreditación documental.
Artigo 13. Avaliación das solicitudes
1. A adxudicación de praza efectuarase en función da puntuación acadada segundo o baremo establecido no anexo IV. No caso de obter igual puntuación, terán preferencia, en primeiro lugar, as solicitudes coa renda per cápita máis baixa e despois as de xornada completa con servizo de comedor sobre as solicitudes de media xornada.
2. Aplicaráselles a todas as solicitudes recibidas un procedemento de valoración. Con tal fin constituirase o Consello Escolar de cada centro, conforme ao previsto no artigo 7.C) do RRI.
3. A relación provisional de persoas admitidas e a lista de espera coas puntuacións obtidas farase pública o día 6 de maio de 2026 e poderase consultar nas páxinas web do Consorcio: https://www.igualdadebenestar.org, así como na páxina web: https://politicasocial.xunta.gal e nos respectivos centros.
Artigo 14. Reclamacións
As persoas solicitantes poderán efectuar as reclamacións que consideren oportunas no prazo dos 5 días hábiles posteriores á data da exposición pública da relación provisional.
Estas reclamacións entenderanse resoltas coa publicación da lista definitiva.
Artigo 15. Resolución do procedemento
1. Correspóndelle á Xerencia do Consorcio, unha vez comprobadas as reclamacións presentadas contra a relación provisional, resolver este procedemento mediante a aprobación da relación definitiva de persoas admitidas e da lista de espera, onde figurará a puntuación obtida.
A relación definitiva de adxudicación de prazas coa puntuación, poderase consultar desde o día 29 de maio de 2026 nas páxinas web do Consorcio: https://www.igualdadebenestar.org así como na páxina web: https://politicasocial.xunta.gal e nos respectivos centros.
2. A nena ou o neno adxudicatario/a dunha praza pública nunha escola infantil do Consorcio non poderá ser adxudicatario/a doutra praza pública das escolas infantís da rede pública autonómica A Galiña Azul.
3. Con carácter xeral, o prazo máximo para resolver e notificar o procedemento previsto nesta convocatoria será de tres meses contados a partir do día seguinte ao da publicación desta resolución no Diario Oficial de Galicia ou desde a entrada da solicitude no rexistro nos casos de solicitudes non sometidas a baremo. Transcorrido o dito prazo sen se ditar resolución expresa, as solicitudes daranse por desestimadas.
4. Na relación definitiva de admisión tamén estarán incluídas as solicitudes presentadas pasado o prazo establecido no artigo 8.2, relativas a nacemento, acollemento ou adopción da nena ou do neno con posterioridade ao prazo de presentación de solicitudes, coa xustificación que proceda e que tiveran entrada con anterioridade á data de publicación da relación provisional.
5. Sen prexuízo do disposto no número 3, no suposto de ingresos urxentes do artigo 3.2.a) a resolución do procedemento correspóndelle á Xerencia Adxunta para Escolas Infantís, nun prazo de cinco (5) días (hábiles) dende a data de presentación da solicitude. Transcorrido este prazo sen que se dite resolución expresa, a solicitude darase por desestimada.
6. As resolucións ditadas neste procedemento non esgotan a vía administrativa e contra elas pode interpoñerse recurso de alzada perante a Presidencia do Consorcio no prazo dun mes a partir do día seguinte ao da notificación da resolución, de conformidade co previsto nos artigos 121 e 122 da Lei 39/2015, do 1 de outubro, do procedemento administrativo común das administracións públicas. Se a resolución é presunta, en calquera momento a partir do día seguinte a aquel en que se produza o acto presunto.
A resolución da Presidencia esgota a vía administrativa e contra ela pode interpoñerse recurso contencioso-administrativo ante o órgano xurisdicional contencioso-administrativo competente, no prazo de dous meses a partir do día seguinte ao da súa publicación no Diario Oficial de Galicia, de conformidade co disposto na Lei 29/1998, do 13 de xullo, reguladora da xurisdición contencioso-administrativa. En caso de silencio administrativo, o prazo será de seis meses dende o día seguinte a aquel en que a solicitude se entenda desestimada.
Potestativamente e con anterioridade á interposición do referido recurso contencioso-administrativo, poderá interpoñerse recurso de reposición ante o órgano que ditou o acto, no prazo dun mes a partir do día seguinte ao da súa publicación no Diario Oficial de Galicia. Se a resolución é presunta, a interposición deste recurso caberá en calquera momento a partir do día seguinte a aquel en que se produza o acto presunto, ao abeiro dos artigos 123 e 124 da Lei 39/2015, do 1 de outubro.
Artigo 16. Publicación e notificación
Publicaranse no Diario Oficial de Galicia (DOG), de conformidade co establecido no artigo 45.1 da Lei 39/2015, do 1 de outubro, os actos administrativos de requirimento de emenda de documentación así como as correspondentes resolucións, sen prexuízo do disposto no artigo 46 da mesma lei. Esta publicación producirá os efectos de notificación. Así mesmo, de forma complementaria poderase efectuar a notificación de todos os actos administrativos de acordo co reflectido nos parágrafos seguintes:
a) As notificacións de resolucións e actos administrativos practicaranse preferentemente por medios electrónicos. As persoas interesadas poderán decidir e comunicar en calquera momento que as notificacións sucesivas se practiquen ou deixen de practicar por medios electrónicos mediante os modelos normalizados dispoñibles.
b) A persoa interesada deberá manifestar expresamente a modalidade escollida para a notificación (electrónica ou en papel) no formulario.
c) No caso de optar pola notificación en papel practicarase a notificación segundo o establecido na normativa reguladora do procedemento administrativo común.
d) De conformidade co artigo 45.2 da Lei 4/2019, do 17 de xullo, de administración dixital de Galicia, as notificacións electrónicas practicaranse mediante a comparecencia na sede electrónica da Xunta de Galicia e a través do sistema de notificacións electrónicas de Galicia Notifica.gal. Este sistema remitiralles ás persoas interesadas avisos da posta a disposición das notificacións á conta de correo electrónico e/ou teléfono móbil que consten na solicitude. Estes avisos non terán, en ningún caso, efectos de notificación efectuada e a súa falta non impedirá que a notificación sexa considerada plenamente válida.
e) As notificacións por medios electrónicos entenderanse practicadas no momento no que se produza o acceso ao seu contido, e entenderase rexeitada cando transcorresen dez días naturais desde a posta a disposición da notificación sen que se acceda ao seu contido.
f) Se o envío da notificación electrónica non fose posible por problemas técnicos, efectuarase a notificación polos medios previstos na normativa reguladora do procedemento administrativo común.
Artigo 17. Matrícula
1. As persoas que obteñan praza disporán de 10 días hábiles, contados desde o día seguinte ao da publicación no Diario Oficial de Galicia da resolución de adxudicación, para presentar o impreso de matrícula debidamente cuberto xunto coa copia da cartilla de vacinación da nena ou neno a través da sede electrónica da Xunta de Galicia https://sede.xunta.gal, e poden acceder á Carpeta cidadá da persoa interesada, ou no centro onde obtivesen a dita praza.
O cumprimento do calendario de vacinación infantil do Programa galego de vacinación así como a formalización da matrícula no prazo sinalado son imprescindibles para confirmar a praza, en caso contrario, a persoa interesada decaerá da súa solicitude.
2. O impreso de matrícula facilitarase nos propios centros, así como nas páxinas web: https://www.igualdadebenestar.org e https://politicasocial.xunta.gal
Artigo 18. Lista de espera
1. A lista de espera estará constituída polas persoas solicitantes que non obteñen praza pública, ordenadas segundo a puntuación acadada no baremo de admisión, en cada grupo de idade.
2. Para a xestión da lista de agarda e cobertura das prazas vacantes estarase ao previsto no artigo 21 do RRI.
3. As solicitudes que se presenten pasado o prazo fixado nesta convocatoria nos casos establecidos no número 2.b) do artigo 3 debidamente xustificadas serán valoradas nos procedementos extraordinarios segundo o previsto no RRI e, no caso de non podérselles adxudicar unha praza, incluiranse na lista de agarda segundo a puntuación obtida.
4. Na relación definitiva da lista de espera tamén estarán incluídas as solicitudes presentadas pasado o prazo establecido no artigo 8.2, relativas a nacemento, acollemento ou adopción do neno ou da nena con posterioridade ao prazo de presentación de solicitudes, coa xustificación que proceda e que teñan entrada con anterioridade á data de publicación da relación provisional.
5. Consonte o establecido no artigo 19.5 do RRI naqueles concellos con máis dunha escola infantil, no caso de producirse unha vacante unha vez rematado o prazo ordinario de matrícula e sempre que a crianza a quen lle correspondese cubrir a vacante non teña superado o proceso de adaptación no centro onde inicialmente fose matriculada, a dita vacante poderá ser cuberta por aquela crianza que por estrita orde de puntuación que solicitase ese centro como primeira preferencia aínda que estivese xa matriculada noutro centro dese mesmo concello. De aceptar a praza a crianza causará baixa inmediata na escola onde inicialmente estivese matriculada.
Artigo 19. Revisión do prezo
O prezo fixado inicialmente para os servizos complementarios, de acordo coa normativa de prezos das escolas infantís 0-3 dependentes de entidades do sector público autonómico de servizos sociais, revisarase nos seguintes casos:
a) Modificación das circunstancias que determinan os descontos recollidos na normativa vixente en materia de prezos públicos.
b) Variación no número de membros da unidade familiar.
Para estes efectos, a persoa beneficiaria queda obrigada a comunicar á Xerencia Adxunta de Escolas Infantís, calquera variación que se produza nos supostos que deron lugar ao cálculo do prezo público que se lle aplica.
A modificación do prezo será resolta pola Xerencia Adxunta de Escolas Infantís e aplicarase a partir do primeiro día do mes natural seguinte ao da data da correspondente resolución.
Artigo 20. Baixas
1. Será causa de baixa na escola infantil:
a) O cumprimento da idade máxima regulamentaria de permanencia no centro.
b) A solicitude das persoas proxenitoras ou representantes legais.
c) A falta de pagamento do prezo establecido polos servizos complementarios durante dous meses consecutivos ou tres alternos, calquera que sexa o curso escolar a que se refire a débeda, sen prexuízo da reclamación desta polo procedemento administrativo de constrinximento.
d) A comprobación de falsidade nos documentos ou nos datos achegados.
e) A incompatibilidade ou inadaptación absoluta para permanecer no centro.
f) A falta de asistencia continuada durante quince días sen causa xustificada.
g) Incumprimento das normas de funcionamento do centro e do respecto debido ao persoal.
2. Naqueles casos nos que se produza unha falta de asistencia prolongada, deberá presentarse cunha periodicidade mensual a documentación acreditativa da causa que a produce. O incumprimento desta obriga será causa de baixa.
3. As baixas motivadas polo establecido na alínea e) do número 1 serán resoltas pola Xerencia do Consorcio, por proposta da Xerencia Adxunta para Escolas Infantís, unha vez oída a Dirección do centro ao que asiste a alumna ou alumno e realizado o trámite de audiencia da/das persoa/s interesada/s. O prazo de resolución será de dous meses desde o inicio do expediente. Nos demais supostos aprobarase a baixa por resolución da Xerencia Adxunta para Escolas Infantís, por delegación do xerente do Consorcio.
Contra as resolucións ditadas no procedemento anterior será de aplicación o establecido no artigo 15.6 desta resolución.
4. As baixas producidas ao longo do curso escolar por calquera dos motivos anteriormente expostos cubriranse coas solicitudes que figuren nese momento en lista de espera en cada grupo de idade, por rigorosa orde de puntuación.
Artigo 21. Información ás persoas interesadas
Sobre este procedemento administrativo, que ten os códigos BS404A e BS404B, poderase obter documentación normalizada ou información na sede electrónica da Xunta de Galicia, https://sede.xunta.gal, no portal da Consellería de Política Social e Igualdade https://politicasocial.xunta.gal, no portal do Consorcio https://www.igualdadebenestar.org e no teléfono 012.
Disposición adicional primeira. Flexibilización do período de escolarización para nenas e nenos con necesidades específicas de apoio educativo
As familias das/dos alumnas/os con necesidades específicas de apoio educativo (NEAE) que excedan do límite de idade establecido no artigo 2, estivesen ou non escolarizados/as durante o curso 2025/26, poderán solicitar a súa permanencia ou acceso á escola infantil 0-3 un curso máis, para o que deberán presentar a correspondente solicitude de praza.
Xunto coa dita solicitude deberán achegar o informe das/dos profesionais que levan o seguimento da nena ou neno, tales como o da unidade de atención temperá, da unidade de rehabilitación ou o do servizo de pediatría correspondente.
Para o suposto de nenas/os de NEAE xa escolarizados a dirección da escola elaborará un informe de observación e seguimento da nena ou do neno e realizará unha valoración sobre a pertinencia da súa permanencia na escola infantil, tendo en conta a súa evolución, as consideracións da familia e os informes doutras/os profesionais.
En ambos os dous casos, a escola remitirá a solicitude xunto co resto da documentación á Xefatura Territorial da Consellería de Cultura, Educación, Ciencia, Universidades e Formación Profesional para o seu traslado ao equipo de orientación específico, que emitirá o correspondente ditame de escolarización.
No caso de que o ditame de escolarización sexa favorable, a Xerencia do Consorcio emitirá a resolución de permanencia do alumno/a na escola infantil 0-3 para o curso escolar solicitado.
Paralelamente, a familia deberá solicitar praza para o segundo ciclo de educación infantil nun centro que imparta este nivel educativo dentro dos prazos anuais establecidos para estes efectos pola Consellería de Cultura, Educación, Ciencia, Universidades e Formación Profesional. Deste xeito, asegurará a escolarización nun centro da súa elección no caso de que o ditame de escolarización sexa desfavorable á flexibilización do período de escolarización nunha escola infantil 0-3.
Con carácter xeral todas/os as/os nenas/os con necesidades específicas de apoio educativo incorporaranse no grupo que lle corresponde atendendo á súa idade cronolóxica. Excepcionalmente poderán ser situados noutro grupo considerando a súa idade madurativa segundo as recomendacións explicitadas nos informes das e dos profesionais que fan o seguimento e a valoración da nena ou do neno.
Disposición adicional segunda. Ratios nenas/os con necesidades específicas de apoio educativo
No caso de integrarse nenas e nenos con necesidades específicas de apoio educativo, con carácter xeral, non poderá haber máis dunha alumna ou alumno con estas necesidades por aula. Para os efectos de ratio, estas prazas contabilizaranse como dúas.
Disposición adicional terceira. Prioridade no acceso en peches de escolas subvencionadas
No caso de que se produza o peche dalgunha escola infantil, que teña subvencionada a atención educativa pola Xunta de Galicia, como consecuencia dunha expropiación forzosa ou por outra causa motivada pola administración, as nenas/os que neste centro terían dereito á renovación de praza poderían optar a renovar praza en calquera das escolas obxecto deste procedemento.
Disposición derradeira. Entrada en vigor
A presente resolución entrará en vigor o día seguinte ao da súa publicación no Diario Oficial de Galicia.
Santiago de Compostela, 10 de marzo de 2026
Perfecto Rodríguez Muíños
Xerente do Consorcio Galego de Servizos de Igualdade e Benestar
