Antecedentes:

1. O día 4 de decembro de 2025, María Azucena Vicente Lemiña solicitou a autorización para a transmisión mortis causa e, sucesivamente, mortis causa mediante pacto de mellora da concesión administrativa e da batea Yáñez II.

2. A persoa interesada achegou a documentación requirida para a súa tramitación.

Consideracións legais e técnicas:

1. A competencia para ditar esta resolución corresponde á persoa titular da Consellería do Mar, de conformidade coa Lei 11/2008, do 3 de decembro, de pesca de Galicia, e coa Orde do 15 de xuño de 1999 pola que se regula o procedemento para a transmisión da titularidade das concesións dos viveiros de cultivos mariños nas augas de Galicia.

En virtude da Orde do 21 de febreiro de 2022, de delegación de competencias, delégase a competencia de resolver nas persoas titulares dos departamentos territoriais da Consellería do Mar.

2. A Lei 2/2006, do 14 xuño, de dereito civil de Galicia (DOG número 124, do 29 de xuño), nos seus artigos 209 e seguintes, regula os pactos sucesorios como negocios mortis causa, e coa forma de pactos de apartación ou pactos de mellora.

3. O procedemento tramitouse de conformidade co disposto na Lei 39/2015, do 1 de outubro, do procedemento administrativo común das administracións públicas, coas especialidades previstas no Decreto 406/1996, do 7 de novembro, polo que se aproba o Regulamento de viveiros de cultivos mariños nas augas de Galicia, e na Orde do 15 de xuño de 1999 pola que se regula o procedemento para a transmisión da titularidade das concesións dos viveiros de cultivos mariños nas augas de Galicia.

De acordo con todo o indicado,

RESOLVO:

Autorizar a transmisión mortis causa e, sucesivamente, mortis causa mediante pacto de mellora, da concesión administrativa do seguinte viveiro:

Tipo: batea.

Nome: Yáñez II.

Situación:

Cuadrícula núm.: 7.

Polígono: E.

Distrito: Caramiñal (A Coruña).

Especie autorizada: mexillón (Mytilus galloprovincialis).

Título habilitante: concesión de actividade.

Orde de outorgamento: 31.1.1968.

Remate da vixencia: 15.12.2029.

Actuais titulares: Manuel Vicente Fachado (***7128**), Ramona Lemiña Torres (***9270**) e María Azucena Vicente Lemiña (***7686**).

Nova titular: María Azucena Vicente Lemiña (***7686**) (100% privativa).

A nova titular da concesión queda subrogada nos dereitos e obrigas dos anteriores dende o momento da publicación desta resolución no Diario Oficial de Galicia.

Declarar a perda de eficacia da Resolución do 27.11.2023 pola que se lle autorizou a María Azucena Vicente Lemiña (con número de expediente PE515A-2023-00716) a extracción de semente de mexillón debido á modificación dos termos recollidos nela, de conformidade co establecido no artigo 8.4 da Orde do 26 de outubro de 2000.

Contra esta resolución, que esgota a vía administrativa, poderase interpoñer recurso potestativo de reposición no prazo dun mes ante a persoa titular da Consellería do Mar, ou recurso contencioso-administrativo, ante a xurisdición contencioso-administrativa, no prazo de dous meses contados en ambos os casos desde o día seguinte ao da súa publicación, de conformidade co disposto no artigo 123 da Lei 39/2015, do 1 de outubro, do procedemento administrativo común das administracións públicas (BOE núm. 236, do 2 de outubro), e no artigo 46.1 da Lei 29/1998, do 13 de xullo, reguladora da xurisdición contencioso-administrativa (BOE núm. 167, do 14 de xullo).

A Coruña, 12 de marzo de 2026

A conselleira do Mar
P.D. (Orde do 21.2.2022)
María José Cancelo Baquero
Directora territorial da Coruña