Visto o expediente para outorgamento da autorización administrativa previa e de construción para a instalación eléctrica que a continuación se describe:

Peticionario: Begasa.

Domicilio social: rúa Ramón María Aller Ulloa, 9. 27003 Lugo.

Denominación: novo CT O Peto na LAT 20 kV Nete.

Situación: concello de Begonte.

Características técnicas principais:

• Liña aérea de alta tensión a 20 kV Nete con orixe no apoio proxectado C-3000-16-L2-CA e final no apoio existente 2A78731, cunha lonxitude de 135 metros en condutor tipo LA-56 existente.

• Liña aérea de alta tensión a 20 kV Nete con orixe no apoio proxectado C-3000-16-B2-CA+T3-CA e final no apoio existente 214118, cunha lonxitude de 85 metros en condutor tipo LA-56 proxectado.

• Liña soterrada de alta tensión a 20 kV Nete con orixe no novo CT O Peto e final no apoio proxectado C-3000-16-B2-CA+T3-CA en canalización proxectada, cunha lonxitude de 390 metros formada por tres circuítos, dous con condutor tipo HEPRZ1-240 mm e un con condutor tipo HEPRZ1-150 mm.

• Liña soterrada de alta tensión a 20 kV Nete con orixe no novo CT O Peto e final no apoio proxectado C-3000-16-L2-CA, cunha lonxitude de 230 metros en condutor tipo HEPRZ1-240 mm.

• Centro de transformación prefabricado O Peto, cunha potencia proxectada de 1.000 kVA e unha potencia inicial de 50 kVA (recuperado), no cal se instalan catro celas de liña telemandadas e unha de protección con fusibles, relación de transformación 20.000/400-230 V.

• Desmontaxe de 326 metros de condutor tipo LA-56, 80 metros de condutor LA-30 e desmontaxe do CTI O Peto e a súa aparellaxe .

Finalidade da instalación: mellora da subministración.

Orzamento: 231.319,84 €.

Documentación que se xunta:

• Separata para o Concello de Begonte.

• Separata para a Consellería de Medio Ambiente e Cambio Climático.

• Separata para a Axencia Galega de Infraestruturas.

• Separata para a Confederación Hidrográfica do Miño-Sil.

Este departamento territorial, de acordo coas competencias que resultan do Decreto 140/2024, do 20 de maio, polo que se establece a estrutura orgánica da Consellería de Economía e Industria, e tendo en conta o Decreto 9/2017, do 12 de xaneiro, sobre órganos competentes para autorización de instalacións eléctricas na Comunidade Autónoma de Galicia,

RESOLVE:

En relación coa instalación de alta tensión, conceder a autorización administrativa previa e de construción ás ditas instalacións, sen prexuízo de terceiros e con independencia das autorizacións que sexan necesarias para a execución da obra por parte doutros órganos da Administración, supeditada ao cumprimento das seguintes condicións:

Primeira. As instalacións deberán axustarse na súa execución ao disposto no citado proxecto de execución e a dirección de obra deberá levala a cabo un técnico competente.

Segunda. O peticionario asegurará o mantemento e a vixilancia correcta das instalacións durante a construción e despois da súa posta en servizo, co fin de garantir que en todo momento se manterán as condicións regulamentarias de seguridade.

Terceira. En todo momento deberán cumprirse as normativas e directrices vixentes que sexan de aplicación, en particular canto establecen a Lei 24/2013, do 26 de decembro, do sector eléctrico, o Real decreto 223/2008, do 15 de febreiro, polo que se aproban o Regulamento sobre condicións técnicas e garantías de seguridade en liñas eléctricas de alta tensión e as súas instrucións técnicas complementarias ITC-LAT 01 a 09, e o Real decreto 337/2014, do 9 de maio, polo que se aproban o Regulamento sobre condicións técnicas e garantías de seguridade en instalacións eléctricas de alta tensión e as súas instrucións técnicas complementarias ITC-RAT 01 a 23.

Cuarta. O prazo de posta en marcha das instalacións que se autorizan será de dous anos, contados a partir da data da última autorización administrativa necesaria para a súa execución. En caso de resultar aplicable, en función da tipoloxía da instalación , deberán respectarse os prazos establecidos no artigo 13.9 do Regulamento (UE) núm. 2024/573 do Parlamento Europeo e do Consello, do 7 de febreiro de 2024, sobre os gases fluorados de efecto invernadoiro, polo que se modifica a Directiva (UE) núm. 2019/1937, e se derroga o Regulamento (UE) núm. 517/2014 (DOUE núm. 573, do 20 de febreiro de 2024), sobre prohibicións para a posta en funcionamento de aparellaxe eléctrica que empregue gases fluorados de efecto invernadoiro, ou cuxo funcionamento dependa deles, nun medio illante ou de rotura. Unha vez construídas estas instalacións, a empresa promotora deberá presentar a solicitude de autorización de explotación ante este departamento territorial, acompañada da documentación requirida na lexislación vixente de aplicación.

Contra esta resolución poderase interpor recurso de alzada, ante a conselleira de Economía e Industria, no prazo dun mes a partir do día seguinte ao da notificación ou publicación desta resolución; tamén se poderá interpor calquera outro recurso que se considere pertinente en dereito.

Lugo, 6 de maio de 2026

Gustavo José Casasola de Cabo
Director territorial de Lugo