Mediante a Resolución do 27 de xaneiro de 2026 publicouse o acordo do Consello de Dirección do Instituto Galego de Promoción Económica que aprobou as bases reguladoras das axudas a proxectos de descarbonización e renovación industrial de industrias tractoras nas comarcas afectadas polo peche de centrais térmicas no marco do programa do Fondo de Transición Xusta de España 2021-2027, territorio P2 A Coruña, e procedeuse á súa convocatoria en réxime de concorrencia competitiva (DOG núm. 20, do 30 de xaneiro).

No parágrafo segundo da resolución establecíase que o prazo de presentación de solicitudes sería de tres (3) meses a partir do día seguinte ao da publicación da resolución no Diario Oficial de Galicia. O dito prazo así computado rematou o 30 de abril de 2026.

Mediante a Resolución do 8 de abril de 2026 (DOG núm. 70, do 16 de abril) ampliouse o prazo de presentación de solicitudes e estableceuse este no 1 de xuño de 2026.

Tendo en conta a complexidade da preparación destas solicitudes, considérase que a ampliación do prazo para a súa presentación non foi suficiente. Con tal motivo, cómpre ampliar novamente o prazo de presentación de solicitudes.

Por todo o anterior, de conformidade co disposto no artigo 32 da Lei 39/2015, do 1 de outubro, do procedemento administrativo común das administracións públicas, dado que non se causan danos a terceiros e de conformidade coas facultades que teño conferidas,

RESOLVO:

Ampliar ata o 15 de xuño de 2026 o prazo de presentación de solicitudes de axuda establecido no parágrafo segundo da Resolución do 27 de xaneiro de 2026 de convocatoria das axudas a proxectos de descarbonización e renovación industrial de industrias tractoras nas comarcas afectadas polo peche das centrais térmicas, cofinanciadas pola Unión Europea no marco do programa do Fondo de Transición Xusta de España 2021-2027, modificado mediante a Resolución do 8 de abril de 2026.

Esta resolución entrará en vigor o mesmo día da súa publicación no Diario Oficial de Galicia.

Santiago de Compostela, 26 de maio de 2026

Covadonga Toca Carús
Directora xeral do Instituto Galego de Promoción Económica