Antecedentes:
A flavescencia dourada (FD) da vide, provocada polo organismo nocivo Grapevine flavescence dorée phytoplasma, é unha praga corentenaria da Unión regulada no Regulamento (UE) 2019/2072 e no Regulamento (UE) 2016/2031. O cicadélido Scaphoideus titanus constitúe o insecto vector da enfermidade.
O día 22 de setembro de 2022 publicouse no Diario Oficial de la Unión Europea o Regulamento de execución (UE) 2022/1630 da Comisión, do 21 de setembro de 2022, polo que se establecen medidas para a contención de Grapevine flavescence dorée phytoplasma en determinadas zonas demarcadas. Mediante este regulamento estableceuse tamén unha zona tampón de FD en Galicia de 2,5 km coa fronteira con Portugal, que abrangue varios concellos das provincias de Pontevedra e Ourense.
O día 20 de decembro de 2022, o Comité Fitosanitario Nacional aprobou o Plan nacional de continxencia de flavescencia dourada da vide, en que se recollen as medidas que se deben adoptar contra esta enfermidade co obxectivo de impedir a súa introdución e propagación e, no caso da súa aparición, actuar con rapidez e eficacia para determinar a súa distribución, combatela e erradicala.
Durante o ano 2022 realizáronse prospeccións na zona tampón de FD de Galicia para detectar posibles plantas infectadas e a presenza do insecto vector. Como consecuencia destas prospeccións confirmouse a presenza do vector en Galicia e, en novembro de 2022, confirmouse tamén a presenza de FD en seis plantas de vide nos concellos de Arbo, Crecente e As Neves, na provincia de Pontevedra, e no concello de Padrenda, na provincia de Ourense.
O día 2 de febreiro de 2023 publicouse no Diario Oficial de Galicia a Resolución do 20 de xaneiro de 2023, da Dirección Xeral de Gandaría, Agricultura e Industrias Agroalimentarias, pola que se declarou a presenza de FD en Galicia e se estableceron a zona demarcada e as medidas urxentes para a súa erradicación e control (DOG núm. 23, do 2 de febreiro).
Durante as prospeccións realizadas no ano 2023 producíronse novas deteccións de FD, o que obrigou a ampliar a zona demarcada e a modificar as medidas de erradicación e control deste organismo nocivo. O día 17 de novembro de 2023 publicouse no Diario Oficial de Galicia a Resolución do 9 de novembro de 2023, da Dirección Xeral de Gandaría, Agricultura e Industrias Agroalimentarias, pola que se ampliaron as zonas demarcadas pola presenza da praga de corentena denominada flavescencia dourada da vide e se estableceron medidas urxentes para a súa erradicación e control na Comunidade Autónoma de Galicia (DOG núm. 219, do 17 de novembro).
Na citada resolución establecéronse diversas medidas obrigatorias para a erradicación e control da FD. En relación coa circulación do material de Vitis, deben cumprirse as condicións establecidas no Regulamento de execución (UE) 2021/2285 da Comisión polo que se modifica o Regulamento de execución (UE) 2019/2072.
Durante as prospeccións realizadas no ano 2024 detectáronse novas plantas positivas a FD en varios concellos, o que obrigou a ampliar novamente a zona demarcada. O día 27 de novembro de 2024 publicouse no Diario Oficial de Galicia a Resolución do 19 de novembro de 2024, da Dirección Xeral de Gandaría, Agricultura e Industrias Agroalimentarias, pola que se ampliaron as zonas demarcadas pola presenza da praga de corentena denominada flavescencia dourada da vide e se mantiveron as medidas urxentes para a súa erradicación e control na Comunidade Autónoma de Galicia (DOG núm. 229, do 27 de novembro).
O día 24 de febreiro de 2025 publicouse o Regulamento de execución (UE) 2025/358 da Comisión, do 21 de febreiro de 2025, polo que se modifica o Regulamento de execución (UE) 2022/1630 no que respecta á lista de zonas demarcadas para a contención de Grapevine flavescence dorée phytoplasma. Este regulamento ampliou a demarcación da praga no territorio de Portugal e, como consecuencia, a zona tampón de Galicia, que abrangue varias parroquias da provincia de Ourense.
O día 30 de abril de 2025 publicouse no Diario Oficial de Galicia o Decreto 29/2025, do 7 de abril, polo que se cualifica de utilidade pública a erradicación da flavescencia dourada da viña en Galicia e se ordenan as medidas para evitar a súa propagación (DOG núm. 82, do 30 de abril).
Durante as prospeccións realizadas no ano 2025 detectáronse novos positivos de FD. O día 5 de agosto de 2025 publicouse no Diario Oficial de Galicia a Resolución do 28 de xullo de 2025, da Dirección Xeral de Gandaría, Agricultura e Industrias Agroalimentarias, pola que se ampliaron as zonas demarcadas da praga de corentena denominada flavescencia dourada da vide e se mantiveron as medidas urxentes para a súa erradicación e control na Comunidade Autónoma de Galicia (DOG núm. 148, do 5 de agosto).
Durante as prospeccións realizadas no segundo semestre do ano 2025 detectáronse novas plantas positivas a FD en varios concellos, polo que resulta necesario ampliar novamente a zona demarcada e manter as medidas fitosanitarias establecidas na Resolución do 9 de novembro de 2023 e no Decreto 29/2025, do 7 de abril.
Por todo o anteriormente exposto,
RESOLVO:
1. Actualizar a zona demarcada de FD da vide en Galicia, ampliándoa coas seguintes parroquias:
Na provincia de Ourense:
– A parroquia de Beade (Santa María), no concello de Beade.
– As parroquias de Carballeda (San Miguel) e Santo Estevo de Nóvoa (Santo Estevo), no concello de Carballeda de Avia.
– As parroquias de Anfeoz (Santa Baia), As Seixadas (San Xoán), Cartelle (Santa María), Couxil (Santa María), Espiñoso (San Miguel), O Mundil (Santa María), Penela (Santiago), Sabucedo de Montes (San Pedro) e Vilar de Vacas (Santa María), no concello de Cartelle.
– A parroquia de Barral (Nosa Señora das Neves), no concello de Castrelo de Miño.
– A parroquia de Acevedo do Río (San Xurxo), no concello de Celanova.
– A parroquia de Esposende (Santa Mariña), no concello de Cenlle.
– As parroquias de Casardeita (Santiago), Freás de Eiras (Santa María), Mosteiro (San Pedro), Paizás (San Salvador), Rubiás (Santiago), Santo André de Penosiños (Santo André) e Vilameá de Ramirás (Santa María), no concello de Ramirás.
– As parroquias de Campo Redondo (Santo André), Esposende (Santiago), San Cristovo de Regodeigón (San Cristovo) e Sanín (San Pedro), no concello de Ribadavia.
No anexo I desta resolución pódese consultar o plano da zona demarcada actual e no anexo II a listaxe de concellos e parroquias da zona tampón.
Tanto a zona demarcada como a listaxe de todas as parcelas infestadas poderán consultarse de forma actualizada na páxina web oficial da Consellería do Medio Rural:
https://mediorural.xunta.gal/gl/temas/agricultura/sanidade-vexetal/organismos-nocivos-de-corentena
2. Manter todas as medidas fitosanitarias establecidas na Resolución do 9 de novembro de 2023, da Dirección Xeral de Gandaría, Agricultura e Industrias Agroalimentarias, pola que se amplían as zonas demarcadas pola presenza da praga de corentena denominada flavescencia dourada da vide e se establecen medidas urxentes para a súa erradicación e control na Comunidade Autónoma de Galicia, así como as establecidas no Decreto 29/2025, do 7 de abril, polo que se cualifica de utilidade pública a erradicación da flavescencia dourada da viña en Galicia e se ordenan as medidas para evitar a súa propagación.
Santiago de Compostela, 25 de maio de 2026
Silvestre José Balseiros Guinarte
Director xeral de Gandaría, Agricultura e Industrias Agroalimentarias
