Por Resolución do 17 de setembro de 2025 da Xerencia da Área Sanitaria de Pontevedra e O Salnés (DOG núm. 189, do 1 de outubro) convocouse a provisión, polo sistema de avaliación colexiada, do posto de xefe/a de sección de Anestesioloxía e Reanimación-Área Terapéutica da Dor, do Complexo Hospitalario Universitario de Pontevedra.

En virtude das competencias atribuídas polo Decreto 134/2019, do 10 de outubro, polo que se regulan as áreas sanitarias e os distritos sanitarios do Sistema público de saúde de Galicia (DOG núm. 204, do 25 de outubro), o xerente da Área Sanitaria de Pontevedra e O Salnés

RESOLVE:

Primeiro. Adxudicar o antedito posto de xefe/a de sección de Anestesioloxía e Reanimación-Área Terapéutica da Dor, do Complexo Hospitalario Universitario de Pontevedra, na Área Sanitaria de Pontevedra e O Salnés, ao aspirante seleccionado que consta no anexo.

Segundo. O aspirante deberá cesar na praza que desempeñe dentro dos tres días hábiles seguintes a aquel en que se publique a presente resolución no Diario Oficial de Galicia.

A toma de posesión do posto de traballo adxudicado deberase efectuar dentro dos dous días hábiles seguintes ao do cesamento se a praza desempeñada e o posto adxudicado son da mesma área de saúde, no prazo de sete días hábiles se son de distinta área de saúde dentro do Servizo Galego de Saúde ou no prazo dun mes se a praza desempeñada corresponde a outro servizo de saúde. Para estes efectos entenderase por praza desempeñada a efectivamente ocupada, con independencia de que sexa en condición de destino definitivo, de adscrición ou destino provisionais ou de comisión de servizos.

Se así o permiten as necesidades do servizo, e por petición motivada do interesado, os prazos a que se refiren os parágrafos anteriores poderán ser prorrogados polo órgano convocante.

O prazo de toma de posesión e a súa prórroga terán a condición de servizo activo, percibíndose os correspondentes haberes de conformidade co que estableza a orde sobre confección de nóminas do persoal ao servizo da Administración autonómica.

Entenderase que o aspirante solicita excedencia voluntaria por interese particular, e será declarado nesa situación polo órgano competente, se non se incorpora ao posto adxudicado no prazo establecido.

Terceiro. O aspirante seleccionado obterá un nomeamento para o desempeño do posto por un período inicial de catro anos de duración. Antes da finalización do referido período, será avaliado para os efectos da súa prórroga por idéntico período ou da súa remoción (neste último caso daráselle previamente audiencia).

Cuarto. Contra a presente resolución poderase interpoñer recurso de alzada ante a Dirección Xeral de Recursos Humanos do Servizo Galego de Saúde no prazo dun mes contado desde o día seguinte ao da súa publicación, segundo o establecido nos artigos 121 e 122 da Lei 39/2015, do 1 de outubro, do procedemento administrativo común das administracións públicas.

Pontevedra, 2 de xullo de 2026

José Manuel Flores Arias
Xerente da Área Sanitaria de Pontevedra e O Salnés

ANEXO

Adxudicación do posto

DNI	Apelidos e nome	Postos	Denominación	Centro
***1584**	Torres Rodríguez, Daniel	1	Xefe/a de sección de Anestesioloxía e Reanimación-Área Terapéutica da Dor	Complexo Hospitalario Universitario de Pontevedra, da Área Sanitaria de Pontevedra e O Salnés