Expediente: IN407A 2023/359-1.

Promotora: UFD Distribución Electricidad, S.A.

Denominación do proxecto: Modificación do proxecto para a ampliación do CT Vila da Area (15CN55) (Ferrol).

Concello: Ferrol.

Feitos:

1. O día 11.7.2024 (DOG do 13.8.2024), este departamento territorial resolveu conceder a autorización administrativa previa e de construción para o proxecto de ampliación do CT Vila da Area (15CN55) (Ferrol).

Con datas 3.6.2026 e 17.6.2026, a empresa promotora solicitou a autorización para un novo proxecto que modifica a configuración inicial do CT a 2L+1P en lugar do tipo rural inicialmente proxectado, co fin de non perder a capacidade de manobra propia deste tipo de configuración de CT.

Ao abeiro do artigo 123 do Real decreto 1955/2000, presentan o proxecto de execución denominado Modificación do proxecto para ampliación do CT Vila da Area (15CN55) (Ferrol), asinado o día 16.6.2026 por Carlota Martínez Rúa, graduada en Enxeñaría Eléctrica, núm. colexiada 4.776 de Vigo.

2. O proxecto non se someteu ao trámite de información pública, segundo o artigo 50 da Lei 9/2021, do 25 de febreiro, de simplificación administrativa e de apoio á reactivación económica de Galicia (DOG núm. 39, do 26 de febreiro).

3. Non se solicitou o informe preceptivo a ningunha Administración, organismo nin empresa de servizo público ou de interese xeral, por non existiren afectacións.

4. O día 17.6.2026 emitiuse o informe técnico.

Consideracións legais e técnicas:

Primeira. O director territorial é competente para resolver este expediente, ao abeiro do disposto no Decreto 9/2017, do 12 de xaneiro, polo que se establecen os órganos competentes para a resolución dos procedementos de autorización de instalacións eléctricas que sexan competencia da Comunidade Autónoma de Galicia (DOG núm. 22, do 1 de febreiro), e no Decreto 140/2024, do 20 de maio, polo que se establece a estrutura orgánica da Consellería de Economía e Industria (DOG núm. 101, do 27 de maio).

Segunda. Lexislación de aplicación:

– Lei 24/2013, do 26 de decembro, do sector eléctrico.

– Real decreto 1955/2000, do 1 de decembro, polo que se regulan as actividades de transporte, distribución, comercialización, subministración e procedementos de autorización de instalacións de enerxía eléctrica.

– Real decreto 223/2008, do 15 de febreiro, polo que se aproban o Regulamento sobre condicións técnicas e garantías de seguridade en liñas eléctricas de alta tensión e as súas instrucións técnicas complementarias ITC-LAT 01 a 09.

– Real decreto 337/2014, do 9 de maio, polo que se aproban o Regulamento sobre condicións técnicas e garantías de seguridade en instalacións eléctricas de alta tensión e as súas instrucións técnicas complementarias ITC-RAT 01 a 23.

– Real decreto 842/2002, do 2 de agosto, polo que se aproba o Regulamento electrotécnico para baixa tensión.

– Lei 9/2021, do 25 de febreiro, de simplificación administrativa e de apoio á reactivación económica de Galicia (DOG núm. 39, do 26 de febreiro).

Terceira. Características técnicas:

As instalacións obxecto deste expediente están situadas no lugar de Vila da Area, no concello de Ferrol, e as súas características técnicas tras a modificación son as seguintes:

Ampliación de potencia de 160 a 250 kVA do CT Vila de Area (15CN55) (expediente IN407A 2016/2649-1): desmantélanse o transformador e a aparellaxe existentes; instálase un conxunto agrupado asociado 2L+1P cun transformador de 250 kVA, relación de transformación 15.000/400 V e coa reforma interior do CT, coa instalación dunha nova bancada, canaleta e foso de recollida de aceite. Substituirase a porta de acceso actual por unha nova con reixas de ventilación. Paso de aéreo a soterrado en condutor RHZ1 3×340 desde os conexionados interiores do pombal, que discorrerá grampado pola parede ata as celas.

Cuarta. No expediente consta un informe favorable dos servizos técnicos deste departamento territorial.

De acordo con todo o exposto,

RESOLVO:

A) Conceder a autorización administrativa previa e a autorización administrativa de construción para a dita instalación de distribución eléctrica.

B) A instalación executarase no prazo de dous anos, contados a partir do día seguinte ao da publicación desta resolución no Diario Oficial de Galicia.

C) Para a posta en funcionamento da instalación autorizada, deberá achegar ante este departamento territorial unha solicitude á cal xuntará a seguinte documentación:

• As declaracións de conformidade relativas ao material ou equipamento e as certificacións ou homologacións, se procede.

• Un certificado do/a director/a da montaxe en que se garantirá o cumprimento das especificacións do proxecto e das prescricións complementarias, se as houber, así como das regulamentacións e normas axeitadas para a montaxe da instalación e posta a punto.

• Planimetría as built da instalación eléctrica en formato shape.

D) Esta aprobación outórgase sen prexuízo doutras que sexan de aplicación segundo a lexislación vixente, en especial no relativo á ordenación do territorio e ao ambiente.

O incumprimento das condicións e requisitos establecidos nesta resolución ou a variación substancial dos presupostos que determinaron o seu outorgamento poderán dar lugar á súa revogación, logo de audiencia ao interesado, segundo o establecido no artigo 53.10 da Lei 24/2013, do 26 de decembro, do sector eléctrico.

Contra esta resolución, que non é definitiva en vía administrativa, poderase interpor recurso de alzada perante a conselleira de Economía e Industria no prazo dun mes contado a partir do día seguinte ao da notificación ou publicación, segundo o disposto nos artigos 121 e 122 da Lei 39/2015, do 1 de outubro, do procedemento administrativo común das administracións públicas (BOE núm. 236, do 2 de outubro de 2015), sen prexuízo de que as persoas interesadas poidan interpor calquera outro recurso que consideren pertinente.

Mediante este documento notifícaselles aos interesados esta resolución, segundo o exixido no artigo 40.1 da dita Lei 39/2015.

A Coruña, 23 de xuño de 2026

Isidoro Martínez Arca
Director territorial da Coruña