Examinado o expediente de declaración de interese galego e inscrición no Rexistro de Fundacións de Interese Galego da Fundación O Taller de César Lombera, aprécianse os seguintes feitos e fundamentos de dereito:

Feitos:

1. O 4 de febreiro de 2026, Carolina Lombera Rivero, fundadora e representante da entidade, presentou a solicitude de clasificación, declaración de interese galego e a súa inscrición no Rexistro de Fundacións de Interese Galego.

2. A Fundación O Taller de César Lombera constituírona Carolina Lombera Rivero e César Lombera Rivero, mediante unha escritura pública outorgada o 30 de decembro de 2025, ante a notaria de Cambados (Pontevedra) María Elena Loira Pastoriza, co número de protocolo 1.561.

3. A Fundación, consonte o artigo 6 dos seus estatutos, ten por obxecto:

• Catalogación e organización da obra de César Lombera. Realizar a catalogación, a documentación e a conservación da obra do artista, asegurando que todo o material estea ordenado e accesible para estudos futuros e exposicións.

• Conservación do patrimonio artístico: preservar e difundir o legado artístico no Taller de César Lombera.

• Divulgación da obra do artista (César Lombera): promover e difundir a obra do artista a través de exposicións, publicacións e medios dixitais, asegurando que o seu legado artístico sexa coñecido e apreciado polas xeracións futuras.

4. Na escritura de constitución da Fundación constan os aspectos relativos á identidade dos fundadores; a súa capacidade para constituíla; a súa vontade de facelo como de interese galego conforme os preceptos da Lei 12/2006, do 1 de decembro, de fundacións de interese galego; a dotación; os estatutos e a composición do padroado inicial.

5. Nos estatutos da Fundación consta a súa denominación; o seu enderezo; o seu obxecto e finalidade; as regras para a aplicación das rendas aos fins fundacionais e para a determinación dos/das beneficiarios/as; a composición e as normas de funcionamento do padroado, e as causas de disolución e o destino dos bens e dos dereitos resultantes da súa liquidación.

6. O padroado inicial da Fundación está formado por Carolina Lombera Rivero, como presidenta, César Lombera Rivero, como vicepresidente e Uxía Pereiro Vaello, como secretaria.

7. A Comisión integrada polos secretarios xerais técnicos de todas as consellerías elevou ao conselleiro de Presidencia, Xustiza e Deportes, proposta de clasificación como de interese cultural da Fundación O Taller de César Lombera, dado o seu obxecto e finalidade, polo que, cumpríndose os requisitos exixidos na Lei 12/2006, do 1 de decembro, de fundacións de interese galego, e segundo establecen os artigos 47.2 da citada lei; 51 do Regulamento de fundacións de interese galego, aprobado polo Decreto 14/2009, do 21 de xaneiro, e 7 do Regulamento do Rexistro de Fundacións de Interese Galego, aprobado polo Decreto 15/2009, do 21 de xaneiro; o protectorado será exercido polo departamento da Xunta de Galicia que teña atribuídas as competencias correspondentes aos fins fundacionais.

8. De conformidade coa citada proposta, por Orde da Consellería de Presidencia, Xustiza e Deportes do 30 de xuño de 2026 (DOG núm. 126, do 8 de xullo) clasificouse de interese cultural a Fundación O Taller de César Lombera, e adscribiuse á Consellería de Cultura, Lingua e Xuventude para os efectos do exercicio das funcións de protectorado.

Fundamentos de dereito:

1. O artigo 34 da Constitución española recoñece o dereito de fundación para fins de interese xeral de acordo coa lei, e o artigo 27.26 do Estatuto de autonomía de Galicia establece competencia exclusiva sobre o réxime das fundacións de interese galego.

2. De acordo co disposto no artigo 7.2 do Regulamento do Rexistro de Fundacións de Interese Galego, en relación co Decreto 146/2024, do 20 de maio, polo que se establece a estrutura orgánica da Consellería de Cultura, Lingua e Xuventude (DOG núm. 101, de 27 de maio), corresponde a esta consellería a declaración de interese galego mediante resolución publicada no Diario Oficial de Galicia e a inscrición no Rexistro de Fundacións de Interese Galego da Fundación O Taller de César Lombera, así como o exercicio das funcións de protectorado e as demais que correspondan á Xunta de Galicia de conformidade co indicado no dito regulamento.

Á vista do que antecede e tendo en consideración o establecido na normativa vixente en materia de fundacións de interese galego, e nas demais normas de xeral e pertinente aplicación; en uso das competencias atribuídas polo Decreto 146/2024, do 20 de maio, polo que se establece a estrutura orgánica da Consellería de Cultura, Lingua e Xuventude,

RESOLVO:

Primeiro. Declarar de interese galego a Fundación O Taller de César Lombera.

Segundo. Ordenar a súa inscrición no Rexistro de Fundacións de Interese Galego, Sección da Consellería de Cultura, Lingua e Xuventude.

Terceiro. Esta fundación queda sometida ao disposto na Lei 12/2006, do 1 de decembro, de fundacións de interese galego, no Regulamento de fundacións de interese galego, aprobado polo Decreto 14/2009, do 21 de xaneiro, no Regulamento do Rexistro de Fundacións de Interese Galego, aprobado polo Decreto 15/2009, do 21 de xaneiro, e na demais normativa de aplicación e especialmente ás obrigas de dar publicidade suficiente dos seus obxectivos e actividades, da ausencia de ánimo de lucro na prestación dos seus servizos, así como á de presentación anual da documentación contable e do plan de actuación ante o protectorado.

Contra esta resolución, que non lle pon fin á vía administrativa, poderá interpoñerse un recurso de alzada ante o conselleiro de Cultura, Lingua e Xuventude, no prazo dun mes contado desde o día seguinte ao da súa notificación, de acordo co sinalado nos artigos 121 e 122 da Lei 39/2015, do 1 de outubro, do procedemento administrativo común das administracións públicas.

Santiago de Compostela, 8 de xullo de 2026

Elvira María Casal García
Secretaria xeral técnica da Consellería de Cultura, Lingua e Xuventude