Mediante a Orde da Consellería de Cultura, Educación, Formación Profesional e Universidades do 12 de xaneiro de 2023 (DOG número 14, do 20 de xaneiro) ditáronse as normas para a aplicación do réxime de concertos educativos cos centros docentes privados para o curso académico 2023/24 e seguintes, de conformidade co establecido na Lei orgánica 8/1985, do 3 de xullo, reguladora do dereito á educación, na Lei orgánica 2/2006, do 3 de maio, de educación, e no Real decreto 2377/1985, do 18 de decembro, polo que se aproba o Regulamento de normas básicas sobre concertos educativos.

Mediante a Orde da Consellería de Cultura, Educación, Formación Profesional e Universidades do 14 de agosto de 2023 (DOG número 156, do 18 de agosto) aprobáronse os concertos educativos cos centros docentes privados de educación infantil, educación primaria, educación secundaria obrigatoria, educación especial e formación profesional, por un período máximo de 6 cursos académicos, ata o final do curso 2028/29.

Estes concertos modificáronse mediante as ordes da Consellería de Educación, Ciencia, Universidades e Formación Profesional do 13 de agosto de 2024 (DOG número 160, do 21 de agosto) e do 8 de agosto de 2025 (DOG número 161, do 25 de agosto).

De conformidade co artigo 3 da devandita Orde do 12 de xaneiro de 2023, os concertos que se subscriban ou modifiquen mediante esta orde rematarán ao final do curso 2028/29, sen prexuízo da súa posible modificación dentro do seu período de vixencia seguindo o procedemento dos capítulos II e III da mesma norma, por instancia de parte ou de oficio.

Por canto antecede, en aplicación do artigo 7 do Real decreto 2377/1985, do 18 de decembro, que aproba o Regulamento de normas básicas sobre concertos educativos, e do artigo 3 do Decreto 138/2024, do 20 de maio, polo que se establece a estrutura orgánica da Consellería de Educación, Ciencia, Universidades e Formación Profesional, por proposta da Dirección Xeral de Centros e Recursos Humanos,

DISPOÑO:

Artigo 1. Modificación dos concertos educativos vixentes

1. Modificar os concertos educativos subscritos polos centros docentes privados que se relacionan no anexo I desta orde, nos termos que para cada centro educativo se especifican.

2. As modificacións a que se refire o número 1 deste artigo terán vixencia ata o final do curso 2028/29, sen prexuízo das modificacións que, se é o caso, proceda introducir, segundo o previsto no artigo 46 do Regulamento de normas básicas sobre concertos educativos e no capítulo III da Orde do 12 de xaneiro de 2023.

Artigo 2. Desestimación de solicitudes

Desestimar as solicitudes de modificación ou de subscrición do concerto educativo realizadas polas titularidades dos centros docentes que se relacionan no anexo II desta orde, por considerar que as necesidades educativas da zona correspondente ao centro están satisfeitas e o cumprimento dos demais requisitos que sinala o artigo 6 da Orde do 12 de xaneiro de 2023.

Artigo 3. Formalización do concerto

1. A modificación do concerto educativo por alteración do número de unidades concertadas formalizarase mediante unha addenda ao documento de formalización do concerto subscrito polo centro.

2. Os documentos serán asinados pola persoa titular do centro privado ou a persoa con representación debidamente acreditada e polo director xeral de Centros e Recursos Humanos, de conformidade co artigo 3 da Orde do 5 de xuño de 2024 de delegación de competencias nos órganos superiores e de dirección e nos departamentos territoriais da Consellería de Educación, Ciencia, Universidades e Formación Profesional.

3. Se a persoa titular do centro non subscribise o documento administrativo de formalización na data en que se lle notifique, entenderase decaída no seu dereito.

Artigo 4. Efectos

Esta orde terá efectos económicos e administrativos desde o día 1 de setembro de 2026.

Disposición adicional única. Acordos asinados entre a Consellería de Educación, Ciencia, Universidades e Formación Profesional e as organizacións empresariais e sindicais do ensino privado concertado

1. Durante o período de vixencia dos concertos que se aproban mediante esta orde aplicarase o Acordo asinado o día 14 de xuño de 2023 entre a Consellería de Cultura, Educación, Formación Profesional e Universidades e as organizacións empresariais e sindicais do ensino privado concertado sobre medidas de recolocación do profesorado afectado pola modificación das unidades concertadas.

No curso académico 2026/27, o devandito acordo é de aplicación ao persoal docente en pagamento delegado dos centros docentes privados concertados no curso académico 2025/26 que, como consecuencia da redución do número de unidades aprobada por esta orde, perda o posto de traballo do cal é titular a partir do 31 de agosto de 2026, sempre que a modificación do concerto non sexa imputable á titularidade do centro educativo.

2. Durante o dito período de vixencia e de conformidade co previsto no número 2 da cláusula sétima do Acordo do 28 de agosto de 2024, entre a Consellería de Educación, Ciencia, Universidades e Formación Profesional e as organizacións empresariais e sindicais do ensino privado concertado de Galicia, sobre as condicións da xubilación parcial do profesorado en pagamento delegado no curso 2024/25 e seguintes, manterase a situación das persoas xubiladas parciais en aplicación deste acordo ata que acaden os requisitos para solicitaren a xubilación total.

3. Así mesmo, de conformidade co que dispón a cláusula novena do Acordo do 12 de decembro de 2025, entre a Consellería de Educación, Ciencia, Universidades e Formación Profesional e as organizacións empresariais e sindicais do ensino privado concertado de Galicia, sobre as condicións da xubilación parcial do profesorado en pagamento delegado, as situacións e consecuencias derivadas deste acordo manteranse sempre e cando permanezan os supostos que as produciron, ata que as persoas xubiladas parcialmente acaden a idade de xubilación ordinaria ou concorra outra causa de extinción.

Disposición derradeira primeira. Recursos

Contra esta orde, que esgota a vía administrativa, as persoas interesadas poderán interpoñer un recurso potestativo de reposición ante esta consellería, no prazo dun mes contado a partir do día seguinte ao da súa publicación no Diario Oficial de Galicia, segundo o disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, ou ben, directamente, un recurso contencioso-administrativo no prazo de dous meses desde a mesma data, ante a Sala do Contencioso-Administrativo do Tribunal Superior de Xustiza de Galicia, de conformidade co artigo 46 da Lei 29/1998, do 13 de xullo, reguladora da xurisdición contencioso-administrativa.

Disposición derradeira segunda. Entrada en vigor

Esta orde entrará en vigor o día seguinte ao da súa publicación no Diario Oficial de Galicia.

Santiago de Compostela, 7 de agosto de 2026

Román Rodríguez González
Conselleiro de Educación, Ciencia, Universidades e Formación Profesional

ANEXO I

Modificacións realizadas de conformidade cos artigos 8 e 22 da Orde do 12 de xaneiro de 2023

a) Educación Infantil:

Código	Denominación do centro	Concello	Provincia	Modificación
32008513	CPR Plurilingüe Santa Teresa de Jesús	Ourense	Ourense	Suprimir o concerto: 1 unidade

b) Educación primaria (EP) e educación secundaria obrigatoria (ESO):

Código	Denominación do Centro	Concello	Provincia	Modificación
15004460	CPR Plurilingüe Peñarredonda	Coruña (A)	Coruña (A)	Suprimir o concerto: 1 unidade de EP
15003200	CPR Plurilingüe Manuela Rial Mouzo	Cee	Coruña (A)	Suprimir o concerto: 1 unidade de EP
15020489	CPR Plurilingüe Montespiño	Culleredo	Coruña (A)	Incrementar o concerto: 1 unidade de EP
36009925	CPR Plurilingüe Amor de Dios	Vigo	Pontevedra	Suprimir o concerto: 1 unidade de EP
36011831	CPR Plurilingüe Las Acacias	Vigo	Pontevedra	Incrementar o concerto: 1 unidade de EP
36011191	CPR Plurilingüe Montecastelo	Vigo	Pontevedra	Suprimir o concerto: 1 unidade de EP

c) Educación especial:

Código	Denominación do centro	Concello	Provincia	Modificación
36017031	CEEPR Aceesca	O Porriño	Pontevedra	Incrementar o concerto: 1 unidade-autistas

d) Ciclos formativos de grao medio de formación profesional:

Código	Denominación do centro	Concello	Provincia	Modificación
15004101	CPR Plurilingüe Cristo Rey	Coruña (A)	Coruña (A)	Concertar o 2º curso do ciclo Planta Química (1 unidade)
27006425	CPR Seminario Diocesano-San Lorenzo	Lugo	Lugo	Concertar o 2º curso do ciclo Guía no Medio Natural e de Tempo Libre (1 unidade)
32008665	CPR Plurilingüe Divino Maestro	Ourense	Ourense	Concertar o 2º curso do ciclo Actividades Comerciais (1 unidade)

e) Ciclos formativos de grao superior de formación profesional:

Código	Denominación do centro	Concello	Provincia	Modificación
15020313	EFAG El Piñeiral	Arzúa	Coruña (A)	Concertar o 2º curso do ciclo Hixiene Bucodental (1 unidade)
36004526	CPR Plurilingüe San Narciso	Marín	Pontevedra	Suprimir o concerto do ciclo Ensinanza e Animación Sociodeportiva
36025165	CPR FP Montecastelo	Vigo	Pontevedra	Concertar o 2º curso do ciclo Administración de Sistemas Informáticos en Rede (1 unidade)

ANEXO II

Solicitudes de modificación ou subscrición desestimadas:

1. 15004198 CPR Plurilingüe Hijas de Jesús, A Coruña, A Coruña

2. 15004231 CPR Plurilingüe Karbo, A Coruña, A Coruña

3. 15022000 CPR Plurilingüe Montegrande, A Coruña, A Coruña

4. 15004526 CPR Plurilingüe Sagrado Corazón, A Coruña, A Coruña

5. 15026649 CPR Divino Maestro, A Pobra do Caramiñal, A Coruña

6. 15020431 CPR Agarimo, Arteixo, A Coruña

7. 15020313 EFAG El Piñeiral, Arzúa, A Coruña, das unidades e ensinanzas non incluídas no anexo I.

8. 15021974 EFAG Fonteboa, Coristanco, A Coruña

9. 15005853 CPR Plurilingüe A Ponte Pasaxe, Culleredo, A Coruña

10. 15032157 CPR Plurilingüe Andaina, Culleredo, A Coruña

11. 15006353 CPR Plurilingüe Jorge Juan, Fene, A Coruña

12. 15010794 CPR Plurilingüe Jaime Balmes, Noia, A Coruña

13. 15010769 CPR Plurilingüe María Assumpta, Noia, A Coruña

14. 15013497 CPR Luís Vives, Pontedeume, A Coruña

15. 15015241 CPR Plurilingüe Ntra. Sra. Inmaculada, Santa Comba, A Coruña

16. 27006279 CPR Fingoi, Lugo, Lugo

17. 27006231 CPR Plurilingüe Divina Pastora, Lugo, Lugo

18. 27006255 CPR Plurilingüe Divino Maestro, Lugo, Lugo

19. 27007223 CPR Plurilingüe Real Colegio Padres Escolapios, Monforte de Lemos, Lugo

20. 32020720 CPR Plurilingüe Miraflores, O Pereiro de Aguiar, Ourense

21. 32016728 CPR Plurilingüe Luís Vives, Ourense, Ourense

22. 32008458 CPR Plurilingüe María Auxiliadora, Ourense, Ourense

23. 32008616 CPR Plurilingüe Padre Feijoo Zorelle, Ourense, Ourense

24. 32008604 CPR Plurilingüe Santa María, Ourense, Ourense

25. 32013557 CPR Plurilingüe María Inmaculada, Verín, Ourense

26. 36025335 CEEPR Aspanaes A Estrada, A Estrada, A Coruña

27. 36005671 EFAG A Cancela, As Neves, Pontevedra

28. 36000351 CPR Plurilingüe Virgen Milagrosa, Bueu, Pontevedra

29. 36000569 CPR Salesianos A Mercé, Cambados, Pontevedra

30. 36000910 CPR Plurilingüe Casa de la Virgen, Cangas de Morrazo, Pontevedra

31. 36001008 CPR Plurilingüe Compañía de María, Cangas de Morrazo, Pontevedra

32. 36016115 CPR Plurilingüe Eduardo Pondal, Cangas de Morrazo, Pontevedra

33. 36004514 CPR Plurilingüe La Inmaculada, Marín, Pontevedra

34. 36004526 CPR Plurilingüe San Narciso, Marín, Pontevedra, das unidades e ensinanzas non incluídas no anexo I.

35. 36005427 CPR Plurilingüe Lar, Mos, Pontevedra

36. 36006641 CPR Plurilingüe Calasancio, Pontevedra, Pontevedra

37. 36011622 CPR Aloya, Vigo, Pontevedra

38. 36011853 CPR Daniel Castelao, Vigo, Pontevedra

39. 36019116 CPR Estudios Marcote, Vigo, Pontevedra

40. 36025165 CPR FP Montecastelo, Vigo, Pontevedra, das unidades e ensinanzas non incluídas no anexo I.

41. 36015822 CPR Marcote, Vigo, Pontevedra

42. 36025244 CPR Nortempo Formación, Vigo, Pontevedra

43. 36009925 CPR Plurilingüe Amor de Dios, Vigo, Pontevedra

44. 36014209 CPR Plurilingüe Andersen Augalonga, Vigo, Pontevedra

45. 36010903 CPR Plurilingüe Apostol Santiago, Vigo, Pontevedra

46. 36010976 CPR Plurilingüe Compañía de María, Vigo, Pontevedra

47. 36011099 CPR Plurilingüe Labor, Vigo, Pontevedra

48. 36011166 CPR Plurilingüe María Inmaculada, Vigo, Pontevedra

49. 36011221 CPR Plurilingüe Padre Míguez, Vigo, Pontevedra

50. 36011351 CPR Plurilingüe San José de Cluny, Vigo, Pontevedra

51. 36011865 CPR Quiñones de León, Vigo, Pontevedra

52. 36011312 CPR San Fermín, Vigo, Pontevedra