O Consello Reitor é o órgano superior colexiado de dirección da entidade pública empresarial Portos de Galicia, tal como determina o artigo 13 da Lei 6/2017, do 12 de decembro, de portos de Galicia. A súa disposición transitoria novena, engadida polo artigo 17 da Lei 3/2018, do 26 de decembro, de medidas fiscais e administrativas, dispón que mentres non se estableza regulamentariamente o número de vogais do Consello Reitor, a composición do dito órgano e o réxime de substitucións serán os establecidos nos artigos 10 e 11 do Regulamento de Portos de Galicia, aprobado polo Decreto 227/1995, do 20 de xullo, e que o nomeamento dos vogais o realizará a persoa titular da consellería competente en materia de portos, conforme dispón o artigo 13.2 da Lei 6/2017, do 12 de decembro.

O artigo 10 do Regulamento, no seu número 2, letra f), e no seu número 6, determina que haberá un vogal no Consello Reitor en representación do persoal da entidade pública empresarial, nomeado por proposta da Presidencia da entidade tendo en conta a realizada polos órganos representantes do persoal.

Polo exposto, no exercicio da facultade atribuída, vista a proposta realizada pola presidenta da entidade pública empresarial Portos de Galicia,

DISPOÑO:

O nomeamento de David Cota Mascuñana como vogal no Consello Reitor da entidade pública empresarial Portos de Galicia, en representación do seu persoal.

Santiago de Compostela, 20 de outubro de 2026

Marta Villaverde Acuña
Conselleira do Mar