Examinada a solicitude de deslindamento formulada polos representantes do MVMC Testeiro, pertencente á CMVMC de Carballeda, Munín e Subirol, e o MVMC De Espiñeira, pertencente á CMVMC de Espiñeira, no concello do Irixo, resultan os seguintes

Feitos:

Primeiro. O 10.12.2025, a CMVMC de Carballeda, Munín e Subirol presentou un escrito (Rexel 2025/3429379) en que solicita a aprobación dun deslindamento coa CMVMC de Espiñeira.

Coa solicitude achegou a seguinte documentación.

– Acta de deslindamento levantada o 28.8.2025.

– Certificacións dos acordos das respectivas asembleas xerais do 9.11.2025 (Carballeda, Munín e Subirol) e do 15.11.2025 (Espiñeira).

– Acta de conciliación redactada o 5.11.2025 no Xulgado de Paz do Irixo.

– Memoria de deslindamento.

– Arquivos xeográficos en formato vectorial (shapefile) coa proposta.

Segundo. O informe do Servizo de Montes do Departamento Territorial de Ourense, do 17.3.2026, fai constar que a documentación achegada corresponde ao deslindamento do perímetro estremeiro entre o MVMC Testeiro, pertencente á CMVMC de Carballeda, Munín e Subirol, e o MVMC De Espiñeira, pertencente á CMVMC de Espiñeira, desde o vértice 1 (o situado máis ao S) ata o vértice 6 (o situado máis ao N).

Logo de analizar os vértices e a súa localización obsérvase que estes se sitúan sobre a ribeira dun rego que constituiría o límite natural entre ambas as propiedades, de acordo co sinalado, ademais, na propia acta do deslindamento.

O citado informe considera que a solicitude se axusta ao establecido no artigo 53 da Lei 7/2012, do 28 de xuño, de montes de Galicia, polo que propón ao Xurado Provincial a súa aprobación.

Consideracións legais e técnicas:

Primeira. Esta resolución dítase ao abeiro do artigo 53 do regulamento para a execución da Lei 13/1989, do 10 de outubro, de montes veciñais en man común, aprobado polo Decreto 260/1992, do 4 de setembro, e de conformidade co disposto na Lei 39/2015, do 1 de outubro, do procedemento administrativo común das administracións públicas.

Segunda. O artigo 53 da Lei 7/2012, do 28 de xuño, de montes de Galicia, recolle o procedemento que se debe seguir no deslindamento entre montes veciñais en man común e establece que o Xurado Provincial de Montes Veciñais en Man Común, logo do exame da documentación presentada, ditará unha resolución, que será publicada no Diario Oficial de Galicia e notificada ás comunidades interesadas.

De acordo cos feitos e fundamentos de dereito expostos, e tendo en conta o informe favorable do Servizo de Montes do día 17.3.2026, o Xurado Provincial de Montes Veciñais en Man Común acordou por unanimidade, o día 6.10.2026:

Aprobar o acto de conciliación acadado polas xuntas reitoras do MVMC Testeiro, pertencente á CMVMC de Carballeda, Munín e Subirol, e o MVMC De Espiñeira, pertencente á CMVMC de Espiñeira, no concello do Irixo.

Contra esta resolución, que pon fin á vía administrativa, poderase interpoñer un recurso potestativo de reposición perante o Xurado Provincial de Clasificación de Montes Veciñais en Man Común de Ourense no prazo dun mes, ou ben directamente un recurso contencioso-administrativo perante o Xulgado do Contencioso-Administrativo de Ourense, no prazo de dous meses contados desde o día seguinte ao desta notificación, de acordo co disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, e nos artigos 8 e 46 da Lei 29/1998, do 13 de xullo, reguladora da xurisdición contencioso-administrativa.

Ourense, 26 de outubro de 2026

José Antonio Armada Pérez
Presidente do Xurado Provincial de Clasificación
de Montes Veciñais en Man Común de Ourense