A Lei 4/2023, do 6 de xullo, de ordenación e xestión integrada do litoral de Galicia, no seu artigo 47, establece que os usos do litoral declarados compatibles nesta lei, e polo tanto, suxeitos a un título de intervención administrativa previsto nos artigos 35, 41 e 46 desta, non se poderán realizar sen o seu outorgamento previo por parte da Administración competente.
Os títulos de intervención administrativa que poden concorrer sobre os usos do litoral son, entre outros, os seguintes:
a) as autorizacións e as concesións para os usos especiais e privativos no dominio público marítimo-terrestre, que se regulan polo establecido na normativa de costas ou de portos e mais polo disposto no artigo 48 da dita lei.
b) a autorización autonómica ou, cando proceda, a declaración responsable para os usos, as actividades e as instalacións na zona de servidume de protección do dominio público marítimo-terrestre, nos termos establecidos no seu artigo 49.
Polo que se refire ao dominio público marítimo-terrestre, o artigo 48 da Lei 4/2023, do 6 de xullo, dispón que, respectando o réxime xeral establecido na normativa de costas, as autorizacións e as concesións do dominio público marítimo-terrestre serán outorgadas pola consellaría competente no momento en que se produza o efectivo traspaso das funcións e dos servizos da Administración xeral do Estado á Comunidade Autónoma de Galicia en materia de ordenación do litoral.
Con data do 19 de maio de 2025 publicouse no Boletín Oficial del Estado o Real decreto 394/2025, do 13 de maio, de traspaso de funcións e servizos da Administración do Estado á Comunidade Autónoma de Galicia en materia de ordenación e xestión do litoral, en virtude do cal quedan traspasadas a esta comunidade as funcións e os servizos da Administración do Estado en materia de ordenación e xestión do litoral. Nomeadamente, a xestión e o outorgamento das autorizacións dos usos de tempada nas praias e o mar territorial.
De acordo co disposto no artigo 113 do Regulamento xeral de costas, aprobado polo Real decreto 876/2014, do 10 de outubro, os servizos de tempada son aqueles que non requiren máis instalacións que as desmontables, como terrazas, establecementos expendedores de comidas e bebidas e instalacións de alugueiro de equipamentos de praia, tales como hamacas, antucas, hidropedais, canoas, entre outros, nas praias da comunidade autónoma de Galicia.
De acordo co anterior, e para os efectos de dar cumprimento ao disposto nos artigos 113 e 152 do Regulamento xeral de costas, aprobado polo Real decreto 876/2014, do 10 de outubro, con data do 30 de setembro publicouse o Anuncio do 22 de setembro de 2026, da Dirección Xeral de Enerxías Renovables e Cambio Climático, de información pública sobre os prazos relativos aos servizos de tempada na zona de dominio público marítimo-terrestre do litoral de Galicia correspondentes ao ano 2027 (código de procedemento MT701A).
No devandito anuncio establecíase o seguinte:
«2. Solicitude de prórroga ou de nova autorización por parte de persoas físicas e xurídicas.
As persoas físicas e xurídicas interesadas na explotación de servizos de tempada que pretendan prestarse en terreos de dominio público marítimo-terrestre da Comunidade Autónoma de Galicia poderán solicitar a prórroga da súa autorización (naqueles casos en que non se teña esgotado o prazo de 4 anos) ou unha nova autorización desde o 16 de novembro ata o 31 de decembro de 2026, ambos incluídos.
Exceptúanse os servizos de tempada nos termos municipais cuxos concellos asumisen a súa xestión. Nestes casos, cando non opten pola explotación directa, os concellos tramitarán o procedemento para a adxudicación a terceiros dos servizos, incluída a publicación dos correspondentes anuncios, en que se indicarán os prazos para a presentación de ofertas ou solicitudes de participación.
Antes do inicio do prazo de presentación das solicitudes das persoas físicas, a Dirección Xeral de Enerxías Renovables e Cambio Climático da Consellería de Medio Ambiente e Cambio Climático publicará a relación de concellos que optaron por asumir a xestión dos servizos de tempada para o ano 2027 no enderezo web: https://www.xunta.gal/medio-ambiente/galicia-litoral».
En virtude do anterior, procédese a publicar a relación de concellos que optaron por asumir a xestión dos servizos de tempada para o ano 2027, e que consta como anexo a este anuncio.
Nos restantes concellos costeiros de Galicia as persoas físicas e xurídicas interesadas na explotación de servizos de tempada que pretendan prestarse en terreos de dominio público marítimo-terrestre da Comunidade Autónoma de Galicia poderán solicitar o outorgamento de autorización desde as 12.00 horas do día 16 de novembro ata o 31 de decembro de 2026.
As solicitudes deberán presentarse a través do procedemento MT701A dispoñible na sede electrónica da Xunta de Galicia, debendo presentarse unha solicitude por cada instalación ou servizo para o que se require autorización.
No suposto de concorrencia de varias solicitudes sobre unha mesma zona, o outorgamento efectuarase atendendo, pola seguinte orde, aos seguintes criterios:
a) O carácter de prórroga dunha autorización previamente outorgada, fronte ás solicitudes de novas autorizacións.
b) A orde de presentación das solicitudes.
Con todo, por razóns debidamente xustificadas vinculadas ao maior interese ou utilidade pública das propostas, poderán aplicarse outros criterios de preferencia no outorgamento das autorizacións respectado os principios de publicidade, imparcialidade, igualdade de trato e transparencia.
Considerarase data de presentación válida dunha solicitude aquela na que o expediente sexa presentado completo e conste nel a solicitude e toda a documentación complementaria exixida no devandito procedemento.
Manterán a condición de validamente presentadas aquelas solicitudes respecto das cales a Administración requira unha mera aclaración en relación coa documentación presentada, sempre e cando a documentación achegada na solicitude sexa completa.
A información relativa a este anuncio, así como as guías informativas sobre os servizos de tempada 2027, estarán á disposición das persoas interesadas na seguinte páxina web: https://www.xunta.gal/medio-ambiente/galicia-litoral
Santiago de Compostela, 9 de novembro de 2026
Ignacio Maestro Saavedra
Director xeral de Enerxías Renovables e Cambio Climático
ANEXO
Relación de concellos que optaron por asumir a xestión dos servizos de tempada para o ano 2027
Provincia da Coruña:
1. Concello de Arteixo
2. Concello de Cabanas
3. Concello de Coruña (A)
4. Concello de Dumbría
5. Concello de Miño
6. Concello de Oleiros
7. Concello de Porto do Son
8. Concello de Valdoviño
Provincia de Pontevedra:
1. Concello de Baiona
2. Concello de Cangas
3. Concello de Grove (O)
4. Concello de Guarda (A)
5. Concello de Marín
6. Concello de Nigrán
7. Concello de Sanxenxo
8. Concello de Soutomaior
9. Concello de Vigo
10. Concello de Vilaboa
11. Concello de Vilagarcía de Arousa