Examinada a solicitude de deslindamento formulada polos representantes do monte veciñal en man común (en diante, MVMC) Serra do Quinxo, pertencente á Comunidade de Montes Veciñais en Man Común (en diante, CMVMC) da Pereira, e o MVMC Acevedo, pertencente á CMVMC de Guxinde, no concello de Entrimo, resultan os seguintes
Feitos:
Primeiro. O 11.12.2025, a CMVMC da Pereira presentou un escrito (Rexel 2025/3546434) en que solicita a aprobación dun deslindamento coa CMVMC de Guxinde.
Coa solicitude achegou a seguinte documentación:
• Acta de deslindamento levantada o 6.9.2025.
• Acta de conciliación redactada o 5.12.2025 no Xulgado de Paz de Entrimo.
• Certificacións dos acordos das respectivas asembleas xerais do 22.11.2025.
• Informe e planos do deslindamento.
• Arquivos xeográficos en formato vectorial (shapefile) coa proposta.
Segundo. O informe do Servizo de Montes do Departamento Territorial de Ourense, do 5.2.2026, fai constar que a documentación achegada corresponde ao deslindamento do perímetro estremeiro entre o MVMC Serra de Quinxo, pertencente á CMVMC da Pereira, e o MVMC Acevedo, pertencente á CMVMC de Guxinde, desde o vértice 2 (o situado máis ao S) ata a o vértice 5 (o situado máis ao N), considerando ademais un punto auxiliar (vértice 1) situado no peche dos predios particulares e que permitirá casar o remate real da veciñanza coas previsibles revisións do esbozo que se poidan acometer.
O citado informe considera que a solicitude se axusta ao establecido no artigo 53 da Lei 7/2012, do 28 de xuño, de montes de Galicia, polo que propón ao Xurado Provincial a súa aprobación.
Consideracións legais e técnicas:
Primeiro. Esta resolución dítase ao abeiro do artigo 53 do Regulamento para a execución da Lei 13/1989, do 10 de outubro, de montes veciñais en man común, aprobado polo Decreto 260/1992, do 4 de setembro, e de conformidade co disposto na Lei 39/2015, do 1 de outubro, do procedemento administrativo común das administracións públicas.
Segundo. O artigo 53 da Lei 7/2012, do 28 de xuño, de montes de Galicia, recolle o procedemento que se debe seguir no deslindamento entre montes veciñais en man común e establece que o Xurado Provincial de Montes Veciñais en Man Común, logo do exame da documentación presentada, ditará unha resolución, que será publicada no Diario Oficial de Galicia e notificada ás comunidades interesadas.
De acordo cos feitos e fundamentos de dereito expostos, e tendo en conta o informe favorable do Servizo de Montes do día 5.2.2026, o Xurado Provincial de Montes Veciñais en Man Común acordou por unanimidade, o día 6.10.2026:
Aprobar o acto de conciliación acadado polas xuntas reitoras do MVMC Serra do Quinxo, pertencente á CMVMC da Pereira, e MVMC Acevedo, pertencente á CMVMC de Guxinde, no concello de Entrimo.
Contra esta resolución, que pon fin á vía administrativa, poderase interpoñer un recurso potestativo de reposición perante o Xurado Provincial de Clasificación de Montes Veciñais en Man Común de Ourense no prazo dun mes, ou ben directamente un recurso contencioso-administrativo perante o Xulgado do Contencioso-Administrativo de Ourense, no prazo de dous meses contados desde o día seguinte ao desta notificación, de acordo co disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, e nos artigos 8 e 46 da Lei 29/1998, do 13 de xullo, reguladora da xurisdición contencioso-administrativa.
Ourense, 26 de outubro de 2026
José Antonio Armada Pérez
Presidente do Xurado Provincial de Clasificación
de Montes Veciñais en Man Común de Ourense
