DOG - Xunta de Galicia -

Diario Oficial de Galicia
DOG Núm. 221 Mércores, 18 de novembro de 2026 Páx. 57491

III. Outras disposicións

Consellería de Medio Ambiente e Cambio Climático

ORDE do 15 de novembro de 2026 pola que se publica a ampliación do crédito da Orde do 20 de novembro de 2025 pola que se establecen as bases reguladoras das axudas para paliar os danos ocasionados polo oso pardo e se convocan axudas para o ano 2026 (código de procedemento MT815A).

No Diario Oficial de Galicia do 2 de decembro de 2025 publicouse a Orde do 20 de novembro de 2025 pola que se establecen as bases reguladoras das axudas para paliar os danos ocasionados polo oso pardo e se convocan axudas para o ano 2026 (código de procedemento MT815A).

No seu artigo 23 establécese a posibilidade de ampliar o orzamento dispoñible para o financiamento da orde en determinados supostos, entre eles, como consecuencia dunha transferencia de crédito.

Así mesmo, e de conformidade coa modificación operada na Lei 9/2007, do 13 de xuño, mediante a Lei 10/2023, do 28 de decembro, de medidas fiscais e administrativas (DOG núm. 246, do 29 de decembro), é posible incrementar o crédito dunha convocatoria no suposto dunha transferencia de crédito, sen necesidade de realizar unha nova convocatoria ou abrir un novo prazo de solicitudes, nos supostos de subvencións convocadas polo procedemento de concorrencia non competitiva, axilizando así a súa tramitación. Neste suposto enmárcase a ampliación de crédito da Orde do 20 de novembro de 2025.

Con esta ampliación de crédito preténdese atender parte das solicitudes recibidas, consonte a súa data de presentación, que non puideron ser atendidas co crédito inicialmente asignado á vista do incremento dos danos ocasionados polo oso pardo, polo que resulta imprescindible atender o maior número de persoas beneficiarias posibles co propósito de garantir a viabilidade desas explotacións gandeiras incluídas no Rexistro Xeral de Explotacións Gandeiras (Rega) de Galicia. Non obstante, e consonte o establecido no artigo 23 da dita orde, as solicitudes que non se poidan conceder por falta de dispoñibilidade orzamentaria atenderanse con cargo á convocatoria do ano seguinte, de se producir.

Segundo o establecido no artigo 30 do Regulamento da Lei de subvencións de Galicia, a ampliación de crédito publicarase nos mesmos medios que a convocatoria, sen que tal publicidade implique a apertura do prazo para presentar novas solicitudes nin o inicio dun novo cómputo do prazo para resolver.

Por todo o exposto, e no uso das facultades que teño atribuídas,

DISPOÑO:

Artigo único

Amplíase a dotación orzamentaria asignada para a concesión das axudas establecidas na Orde do 20 de novembro de 2025 pola que se establecen as bases reguladoras das axudas para paliar os danos ocasionados polo oso pardo e se convocan axudas para o ano 2026 (código de procedemento MT815A), que ten por obxecto compensar as persoas titulares de explotacións gandeiras polos danos ocasionados polo oso pardo.

O importe de 135.000 € inicialmente destinado incrementarase na contía de 68.500 €, polo que o importe total destinado para esta liña de axudas, unha vez ampliada a dotación orzamentaria, é de 203.500 €.

As axudas concedidas ao abeiro desta orde serán financiadas pola Consellería de Medio Ambiente e Cambio Climático con cargo á aplicación orzamentaria 06.04.541.B.470.1, dos orzamentos xerais da Comunidade Autónoma de Galicia para o ano 2026.

Disposición adicional única

Esta orde entrará en vigor o mesmo día da súa publicación no Diario Oficial de Galicia.

Santiago de Compostela, 15 de novembro de 2026

Nicolás Vázquez Iglesias
Conselleiro de Medio Ambiente e Cambio Climático