A Xunta destaca a importancia de visibilizar as oportunidades que ofrece a economía social entre o estudantado galego

A secretaria xeral de Emprego, Covadonga Toca, destacou esta mañá en Santiago de Compostela a importancia que ten dar visibilidade aos valores e oportunidades que ofrece a economía social entre o estudantado galego, durante a súa participación na presentación da 1ª Semana Universitaria da Economía Social na Universidade de Santiago de Compostela.

A iniciativa, que se celebra en 20 universidades españolas, está convocada pola Red Enuies, de centros e institutos universitarios de investigación en economía social -da que forma parte o Centro de Estudos Cooperativos da USC (Cecoop)- e promovida por Ciriec España. Celebrarase do 21 ao 28 de febreiro con accións relacionadas coa economía social, desde exposicións a xornadas, pasando por actividades nas aulas.

Na súa intervención, a secretaria xeral agradeceu este tipo de iniciativas que tratan de achegar a economía social a toda a sociedade, especialmente ao estudantado galego, dando a coñecer as vantaxes, valores e oportunidades que xera este modelo que en Galicia dá emprego directo a 25.000 persoas.

A secretaria xeral lembrou a Estratexia Galega da Economía Social e informou de que, dentro dela, actualmente hai cinco convocatorias de axudas abertas: Aprol economía social, axudas para empresas de inserción, programa para o emprego dirixido a persoas perceptoras da Risga, apoios para entidades da Rede Eusumo e axudas para o funcionamento de entidades deste sector.