A Xunta colabora cos colexios profesionais na prevención do acoso sexual no lugar de traballo que afecta sobre todo ás mulleres

A secretaria xeral da Igualdade, Susana López Abella, inaugurou hoxe por videoconferencia unha xornada formativa sobre a aplicación da perspectiva de xénero no ámbito laboral dentro da campaña de prevención do acoso sexual nos lugares de traballo dirixida aos colexios profesionais que desenvolve a Xunta e que ten carácter pioneiro en España. Segundo manifestou, “o acoso sexual laboral é aínda máis invisible que a violencia de xénero”.

Traballar na aplicación da perspectiva de xénero e do principio de igualdade e non discriminación por razón de sexo no ámbito laboral e a prevención do acoso sexual no traballo son dúas formas de atallar expresións de violencia contra a muller. A formación constitúe un dos piares fundamentais nesta tarefa, tal e como subliñou López Abella. “O acoso sexual supón a vulneración de varios dereitos fundamentais: o dereito á liberdade sexual, á dignidade, á intimidade, e, por suposto, á non discriminación por razón de sexo e á saúde e a seguridade no traballo”, incidiu.

A secretaria xeral avogou pola necesidade de avanzar nunha “maior conciencia e sensibilización de traballadores, traballadoras, empresas, institucións, axentes sociais e cidadanía no seu conxunto” respecto á prevención e erradicación deste tipo de condutas no traballo.

O acoso sexual, tipificado como delito no código penal, afecta con especial incidencia ás mulleres vulnerables, tal e como esgrimiu a secretaria xeral da Igualdade. Neste grupo incluíu “mulleres soas con responsabilidades familiares -nais solteiras, viúvas, separadas e divorciadas-, mulleres que acceden por primeira vez a sectores profesionais ou categorías tradicionalmente masculinas, mulleres novas que acadan o seu primeiro traballo, mulleres con discapacidade, inmigrantes e/ou que pertencen a minorías étnicas, e mulleres con contratos eventuais e temporais ou en réxime de subcontratación”.

As mulleres sofren o 95 % dos casos de acoso sexual no traballo e existe un reducido índice de denuncias rexistrado, apuntou López Abella.

A prevención do acoso sexual atópase entre as medidas que se inclúen no Pacto de Estado contra a Violencia de Xénero. Neste sentido, a Xunta traballa desde 2018 coa Unión Profesional de Galicia e a Asociación Galega de Profesionais da Auditoría de Xénero (Agaxen), con accións encamiñadas á prevención e loita contra a violencia de xénero e, de xeito particular, contra o acoso sexual. Estas entidades representan máis de 50.000 profesionais de todos os ámbitos derivados, sobre todo, de titulacións universitarias.

A Xunta foi a primeira Comunidade en levar a cabo actuacións de prevención e actuacións contra o acoso sexual nos centros de traballo dirixida aos colexios profesionais.