A Xunta concede apoios por 469.000 euros para os proxectos de desenvolvemento tecnolóxico de 37 pemes e autónomos de Lugo

A Xunta de Galicia destina 469.000 euros a impulsar o desenvolvemento tecnolóxico de 37 pemes e autónomos da provincia de Lugo, ao abeiro do programa de axudas á dixitalización Industria 4.0, que convoca a Vicepresidencia segunda e Consellería de Economía, Empresa e Innovación a través do Igape.

O delegado territorial de Lugo, Javier Arias, explicou que esta medida quere apoiar o esforzo que realizan as empresas locais para incorporar as vantaxes dixitais co fin de ser máis competitivas, especialmente no actual contexto económico provocado pola pandemia da covid-19. Neste sentido, sinalou que as achegas -cofinanciadas con fondos Feder- asumen de media o 35% dos gastos realizados polas empresas e comercios beneficiarios, que suman máis de 1,3 millóns de euros.

Máis da metade das entidades beneficiarias están situadas no concello de Lugo, que rexistra 19 axudas por un importe global de 264.200 euros, para un investimento mobilizado de 686.400 euros.

Entre as iniciativas impulsadas nesta convocatoria destacan a implementación de procesos de comercio electrónico, sistemas de xestión integral e sistemas de intelixencia de negocio. Ademais de apoiar a adquisición de equipos e software, as axudas facilitan as colaboracións necesarias para a súa posta en marcha, financiando proxectos colectivos de agrupacións, pemes e iniciativas promovidas a nivel individual. Impúlsase así a interconexión dixital entre empresas vinculadas pola súa actividade e a dixitalización dos seus procesos produtivos.

A intensidade da achega é do 30 % dos investimentos en equipos ou programas para as pequenas empresas, e do 20 % para as medianas. No que respecta aos gastos de colaboracións externas de carácter tecnolóxico ou organizativo -asistencia técnica, consultoría e servizos para a execución do proxecto de dixitalización-, a subvención máxima é do 50%.