Fernández-Tapias destaca o importante esforzo realizado polo conxunto do complexo mar-industria durante a crise sanitaria

A delegada da Xunta en Vigo, Marta Fernández-Tapias, visitou Frigoríficos Iberport, onde destacou o importante esforzo realizado polo conxunto do complexo mar-industria durante a crise sanitaria e recordou que o Executivo galego puxo a disposición das pemes de transformación dos produtos do mar 16 millóns de euros para investimentos nas súas instalacións. Esta cantidade enmárcase na convocatoria deste ano das achegas destinadas a este fin e que están cofinanciadas co Fondo Europeo Marítimo e de Pesca (FEMP).

Desta contía, seis millóns de euros son para a anualidade 2021 e a cifra restante, 10 millóns de euros, para a anualidade 2022. A través destas achegas, lembrou Fernández-Tapias, apóiase ata o 50% dos investimentos que fagan as pemes que fomenten a sustentabilidade ambiental.

Durante a visita a Iberport, na que estivo acompañada polo seu presidente Manuel Fernández-Carballido, e unha das súas directivas Patricia Fernández, a delegada puxo en valor estas axudas activadas pola Consellería do Mar e das que na convocatoria do ano pasado se beneficiaron seis proxectos da área territorial de Vigo por un importe que roza o millón de euros.

Así, a representante autonómica tivo a oportunidade de coñecer a maquinaria de procesado de peixe e empaquetado que a empresa viguesa adquiriu con cargo a este programa no 2019 e as melloras que está a facer nas instalacións do porto vigués para as que solicitara o apoio do Goberno galego.

Ademais a delegada territorial lembrou que para este ano están previstos apoios ás empresas galegas de transformación para compensar parcialmente a caída de ingresos rexistrada no ano 2020 pola covid-19. Unha medida que, tal e como recordou, se enmarca no plan Avantemar, o programa deseñado polo Executivo autonómico con apoios para adecuar as estruturas produtivas das empresas ás necesidades derivadas da pandemia e a reorientar a produción ás novas demandas comerciais xeradas como consecuencia da mesma.

Frigoríficos Iberport

Frigoríficos Iberport é unha empresa familiar do Porto de Vigo con gran traxectoria profesional no sector pesqueiro desde hai máis de 40 anos. Dedicada á selección, transformación e conxelación de peixe fresco, as súas instalacións frigoríficas no propio porto pesqueiro contan co valor engadido de poder conxelar o produto minutos despois de ser descargado polos barcos. Actualmente exporta a Europa, África, Oriente Medio e China e tamén conta con instalacións no polígono empresarial de Ribadavia.