A Xunta valoriza na entrega dos premios AJE da Coruña ao emprendemento a Rede de polos coa que Galicia está a impulsar de xeito decidido as iniciativas de negocio

A Coruña, 15 de decembro de 2022

A directora de Emprendemento e Apoio ao Emprego, Margarita Ardao, participou hoxe na entrega de premios ao emprendemento promovidos pola Asociación de Jóvenes Empresarios (AJE) da Coruña, onde agradeceu este recoñecemento á iniciativa emprendedora de mozas e mozos e puxo en valor a aposta da Xunta polo apoio e acompañamento durante o desenvolvemento das ideas de negocio a través da Rede de polos de emprendemento e apoio ao emprego que en 2023 contará con 12 centros que darán cobertura a toda a comunidade.

Tal e como recordou Ardao, Galicia encara con optimismo o futuro socio-laboral galego grazas ao impulso ao emprendemento que está a ofrecer durante todas as etapas da actividade emprendedora, “que se estende e interrelaciona co tamén reforzo aos apoios prestados ao traballo autónomo, coa fórmula que se elixa, desde o mesmo momento do inicio por conta propia ata a súa continuidade (con apoios á solvencia empresarial), o seu crecemento (con apoios á mellora da competitividade), ou mesmo a reformulación do negocio ou actividade empresarial que desenvolve”.

A nova estrutura da Consellería de Promoción do Emprego e Igualdade conta desde hai uns meses coa Dirección Xeral de Emprendemento e Apoio ao Emprego, que supón, indicou Ardao “unha reafirmación da decidida aposta da Xunta de Galicia polas políticas de emprendemento e pola mellora da coordinación de todos os recursos existentes na comunidade”.

Este departamento contará en 2023 con 18,2 millóns de euros de orzamento que, entre outras medidas, permitirán despregar a Rede de Polos de Emprendemento e Apoio ao Emprego iniciada en 2022, ata sumar un total de 12 Polos distribuídos por toda a xeografía galega. No que vai de ano xa están en funcionamento catro deles: o Polo de Ourense Centro e Sur -situado en Verín-, o Polo de Pontevedra Norte -situado en Silleda-, o Polo da Costa da Morte -situado en Coristanco- e o de Lugo Sur- en Monforte de Lemos-. No máis inmediato, antes de que acabe o mes, inaugurarase o quinto, o de Rías Altas e Arco Ártabro, que estará localizado en Ferrol.