Santiago de Compostela, 19 de setembro de 2024

A Xunta activa este luns, 23 de setembro, unha nova liña de autobús que poderá empregar o alumnado do Centro Integrado de FP de Cantería de Galicia, en Poio, para realizar os seus desprazamentos cara ao centro educativo.

A nova liña, denominada Escola de Cantería-Pontevedra E.A., incluirá cinco paradas, localizándose unha delas nas inmediacións da Escola de Cantería. A duración estimada da viaxe será de 13 minutos.

O itinerario contará con puntos de paso no centro de FP de Cantería, Ponte da Barca, Pontevedra-Avda. Corbaceiras, Residencia de Maiores Campolongo e Pontevedra E.A.

Os servizos estarán operativos de luns a venres en tempada lectiva, con dúas frecuencias diarias. O servizo de ida cara ao centro sairá da Estación de Autobuses de Pontevedra ás 08,05 horas, chegando ao Centro Integrado de FP de Cantería de Galicia ás 08,18 horas. O servizo de regreso partirá do centro educativo ás 15,00 horas, con chegada prevista á Estación de Autobuses de Pontevedra ás 15,13 horas.

Con esta decisión, a Xunta reafirma o seu compromiso coa mellora da rede de transporte público regular de persoas viaxeiras por estrada e cos desprazamentos do alumnado na comunidade. Ademais de optimizar a oferta de servizos, esta iniciativa amplía as opcións de transporte dispoñibles para todos os usuarios e usuarias.

A información relativa aos novos servizos estará dispoñible para a súa consulta na páxina web www.bus.gal.