Santiago de Compostela, 29 de outubro de 2024

A directora xeral de Mobilidade, Judit Fontela, trasladou hoxe ao director xeral do Ente Público Estremeño de Servicios Educativos Complementarios, Eduardo Villaverde Torrecilla e ao director xeral de Mobilidade e Transportes en Estremadura, Cristóbal Maza, as vantaxes do transporte compartido e tamén dos servizos baixo demanda, dúas das modalidades incluídas no Plan de Transporte Público de Galicia, considerado referente a nivel nacional.

A Junta de Estremadura amosou o seu interese en poñer en marcha un sistema similar ao do transporte compartido de Galicia ou ao de baixo demanda.

O transporte integrado é un servizo que permite a escolares e demais persoas usuarias compartir autobús. Deste xeito, o Goberno galego contribúe a optimizar o uso das liñas de transporte en zonas de baixa demanda nas que non resulta sostible manter un servizo regular de uso xeral e outro de transporte escolar de maneira independente.

Judit Fontela trasladou que o Plan de Transporte Público de Galicia, considerado un referente a nivel nacional, recibe un importante investimento anual. Nos orzamentos da Xunta para 2025 acadará preto dos 103 millóns de euros para prestar servizo en 3.600 liñas. Desta cifra, incidiu en que 2.200 liñas corresponden precisamente co transporte integrado. Neste 2024, esta modalidade estivo activa nesas máis de 2.200 liñas con máis de 24.700 paradas e máis de 860.000 servizos.

O Plan de Transporte Público de Galicia, a través das súas 3.600 liñas e con máis de 2,3 millóns de servizos anuais, garante que actualmente máis do 97% da poboación galega teña una parada de autobús a menos de un quilómetro do seu domicilio. Este plan tamén xerou interese noutras comunidades e precisamente a directora xeral de Mobilidade xa recibira o pasado xullo ao director xeral de Transportes e Loxística da Generalitat Valenciana, Manuel Ríos, para explicarlle os seus principais fitos.

Nesta liña, cómpre destacar que Galicia foi pioneira na posta en funcionamento do Sistema de Axuda á Explotación (SAE), que permite facer un seguimento exhaustivo da execución das concesión.

Ademais, no marco das mellores levadas a cabo polo Goberno galego coa promoción dunha ampla política de bonificacións Galicia tamén é a única comunidade que ofrece viaxes gratuítas no transporte para menores de 21 anos e maiores de 65 a través da implantación da Tarxeta Xente Nova en 2021 e a Tarifa +65 habilitada este ano. En ambos casos fináncianse ata 60 viaxes mensuais gratuítas na rede de autobuses da Xunta.  

Os preto de 123.000 usuarios que teñen a Tarxeta Xente Nova fixeron entre xaneiro e agosto deste ano máis de 4,2 millóns de viaxes. No mesmo período, os máis de 107.000 beneficiarios da Tarifa +65 realizaron preto de 1,9 millóns de viaxes gratuítas. As dúas medidas supuxeron un aforro para as persoas usuarias de case 9 millóns de euros neste período.