Santiago de Compostela, 11 de decembro de 2024

A Consellería do Medio Rural converterá Lugo nun escaparate dos produtos alimentarios galegos de calidade diferenciada cun Mercado de Nadal que terá lugar a vindeira fin de semana -entre a tarde do venres 13 e o domingo 15- nesta cidade. A Praza Horta do Seminario de Lugo acollerá este espazo, no que terán un papel protagonista as producións agroalimentarias galegas de calidade, cun amplo programa de actos de carácter lúdico que inclúe degustacións, demostracións culinarias, sorteos e actividades para os máis cativos.

En total, serán 25 os operadores participantes neste mercado, no que ofrecerán as súas creacións ao público en xeral. En canto ao programa, o venres pola tarde haberá obradoiros infantís de postais, chapas de Nadal ou tatoos. Ademais, farase unha maridaxe de queixos e embutidos con sidra artesá e está tamén prevista unha visita de Papá Noel, que será recibido con degustación de chocolate.

O sábado o mercado abrirá desde as 11:00 ata as 14:00 horas e a partir das 16:00 ata as 20:30 horas. O programa incluirá tamén obradoiros infantís, así como talleres de elaboración de amuletos con miga de pan ou de xeados con queixo artesán. Así mesmo, celebraranse degustacións de derivados cárnicos, unha merenda con ideas para un pique-nique artesán, maxia para todos os públicos e sorteos de lotes de produtos.

Con respecto ao programa do domingo, ademais dos obradoiros para os máis cativos, os sorteos e as degustacións, terán lugar tamén espectáculos de teatro e un monólogo a cargo de Leti da taberna.

Época axeitada

Na presentación deste evento, a conselleira do Medio Rural, María José Gómez, puxo en valor esta iniciativa e o feito de celebrarse nunha época do ano especialmente axeitada para facer promoción dos produtos alimentarios e, nomeadamente, dos de calidade, xa que hai un maior consumo e a cidadanía está disposta a facer un maior esforzo económico na cesta da compra para celebrar as festas.

A montaxe e coordinación deste mercado corresponde á Axencia Galega da Calidade Alimentaria, adscrita a Medio Rural. O seu director, Martín Alemparte, salientou tamén a idoneidade deste tipo de eventos nas datas de Nadal e lembrou que este de Lugo é o terceiro mercado organizado este ano, despois dos que tiveron lugar en Vigo na fin de semana do 22 ao 24 de novembro e en Ribadavia do 6 ao 8 de decembro. A maiores, tamén haberá un en Santiago de Compostela do 20 ao 22 de decembro. Na presentación desta iniciativa participaron tamén o delegado territorial da Xunta en Lugo, Javier Arias, e a vicepresidenta 1ª do Parlamento de Galicia, Elena Candia.

Estes mercados de Nadal, que terán un custo en conxunto de arredor de medio millón de euros, enmárcanse no “Plan Saborea calidade diferenciada de Galicia” que promove a Consellería do Medio Rural para facer promoción das producións agroalimentarias de Galicia.

Listaxe das empresas participantes no mercado de Lugo:

1. CAURELOR
2. ABELLA MEIGA
3. QUEIXOS CASTELO
4. BIOSTORE
5. DANIBERTO
6. EMBUTIDOS VALENTINA
7. MENDUIÑA
8. JAMONES SUÁREZ
9. ACEIROGA
10. EMBUTIDOS SUARNA
11. DO GAITEIRO
12. NELA GOURMET
13. ÁNADES GALICIA
14. MAMÁ TERESA
15. MEL DE LIÑARES
16. SACRAPASTAS
17. BOMBONES MORENO
18. TRASDEZA NATUR
19. CASA MERCHE
20. BISQATO
21. CIENPORCEL
22. PUERTO BASELLA
23. GANDARÍA QUINTIÁN
24. O PODER DAS FLORES
25. CONDADO PARADANTA