Santiago de Compostela, 13 de decembro 2024

Máis de 5.000 persoas (5.249) están chamadas a participar esta fin de semana nos procesos selectivos para cubrir 148 prazas da Administración xeral que se realizarán o sábado no Recinto da Feira Internacional Abanca Semana Verde de Galicia e o domingo na Facultade de Dereito da USC.

Deste xeito, o sábado 14 de decembro, ás 9.00 horas terá lugar o primeiro exame para cubrir 15 prazas da escala auxiliar de arquivos, bibliotecas e museos (C2), no que están admitidas 1.048 persoas; e ás 15.30 horas celebrarase o primeiro exame para cubrir 117 prazas da especialidade limpeza e cociña (AP), para o que están admitidas 3.750 persoas.

Pola súa parte, o domingo, ás 9.00 horas, na Facultade de Dereito de Santiago de Compostela, están convocadas 451 persoas para realizar o primeiro exame do proceso da escala auxiliar de recursos naturais e forestais, especialidade de oficial (C2), cun total de 16 prazas para cubrir.

Todos os procesos da fin de semana réxense polo sistema selectivo de oposición.

Operativo de seguridade

Un operativo formado por preto de 200 persoas controla que todos os procesos selectivos se desenvolvan de xeito correcto e con total seguridade. O recinto de Silleda dispón tamén dunha ambulancia, habilitada pola Administración galega para atender calquera incidencia que se puidese producir durante a realización das probas.