Santiago de Compostela, 13 de decembro de 2024

A Xunta e o Concello de Pontevedra acordaron manter en 2025 as bonificacións no transporte urbano e as liñas de autobús de interese municipal ata 2028 a través dun convenio asinado hoxe. Prorrógase así a colaboración pola que desde 2021 se activaron descontos nas viaxes de autobús realizadas dentro do municipio e se puxeron en marcha as dúas liñas urbanas que se prestan a través das concesións de transporte público autonómico.

O acordo de mellora das tarifas, que anticipa as actuacións de promoción do transporte público que se implantarán a través da Área de Transporte de Galicia, estenderá a súa duración un ano máis, ata o 31 de decembro de 2025. Así, en canto ás vantaxes económicas para os usuarios, o próximo ano manterase o desconto de 50 céntimos no prezo dos billetes das viaxes con orixe e destino no termo municipal de Pontevedra, así como a bonificación dos transbordos.

Ademais destas melloras nas tarifas activadas mediante o convenio de colaboración co Concello, os usuarios benefícianse dos descontos e bonificacións que se aplican con carácter xeral no transporte público interurbano co pago das Tarxetas de Mobilidade de Galicia. Entre elas figuran a rebaixa directa do 10 % no prezo dos billetes que se paga con esta tarxeta; o desconto adicional do 50 % que a Xunta vén aplicando desde setembro de 2022; a gratuidade para os menores de 21 anos a través da tarxeta Xente Nova; ou a gratuidade para os maiores de 65 anos que se activou o pasado 1 de xaneiro.

Por outra banda, o convenio de colaboración co Concello que implantou as liñas Estacións-A Xunqueira-Monteporreiro (Circular L1) e Praza Galicia-Montecelo-Monteporreiro (Circular L2), como servizos de interese municipal, amplía a súa vixencia por outros catro anos, ata o 31 de decembro de 2028.

O conxunto das medidas de fomento do uso do transporte público da Xunta impulsou un crecemento da demanda nas viaxes urbanas de Pontevedra dun 21 % con respecto ao ano pasado, superando os 600.000 viaxeiros ata setembro, fronte ás 500.000 do mesmo período de 2024. Nos primeiros nove meses do ano, o 83 % dos usuarios das viaxes urbanas de Pontevedra beneficiáronse dos descontos nas tarifas polo pagamento coas Tarxetas de Mobilidade de Galicia, TMG e Xente Nova.

No concello de Pontevedra, máis de 2.900 maiores de 65 anos e máis de 5.400 menores de 21 anos poden viaxar gratis por toda a comunidade grazas á Tarifa +65 e á tarxeta Xente Nova.

Cómpre lembrar que este acordo se suma á prórroga da área de transporte metropolitano de Vigo durante 2025 e aos convenios das áreas da Coruña, Ferrol, Lugo e Santiago de Compostela ata 2028, que veñen de renovarse.