Ribeira (A Coruña), 26 de decembro de 2024

O director xeral de Comercio e Consumo, Gabriel Alén, visitou hoxe a praza de abastos de Ribeira e reuniuse con representantes do Viamare Centro Comercial Aberto (CCA) co gallo de apoiar os praceiros e praceiras desta localidade coruñesa, así como os establecementos de comercio polo miúdo, nestas datas festivas tan importantes para incrementar o número de vendas de proximidade. Ademais, na reunión valoraron o programa de actividades que está a desenvolver o CCA no marco do Nadal e tamén comentaron distintos aspectos relacionados co Plan Estratéxico do Comercio de Galicia que o Goberno galego prevé presentar no primeiro trimestre de 2025.

Alén fixo fincapé nos produtos frescos e de calidade que ofrecen os mercados e prazas de abastos galegos de cara a confeccionar as mellores propostas gastronómicas nuns días nos que proliferan as comidas e ceas en familia. Así mesmo, destacou que os comerciantes espallados polo territorio son a mellor garantía de atención próxima que se require en épocas coma esta, de cara a atopar os mellores agasallos.