Santiago de Compostela, 22 de abril de 2025

O conselleiro de Sanidade, Antonio Gómez Caamaño, participou esta mañá no acto de recoñecemento das 70 farmacias que, de xeito pioneiro, se incorporaron á rede sentinela creada pola Xunta co obxectivo de anticipar a evolución dos virus respiratorios na nosa comunidade.

Acompañado pola directora xeral de Saúde Pública, Carmen Durán, os establecementos farmacéuticos que integran a Rede de Farmacias Sentinela de Galicia recibiron unhas placas distintivas coas que o departamento sanitario da Xunta recoñeceu o traballo realizado durante os últimos meses nó ámbito da vixilancia epidemiolóxica.

Un total de 30 farmacias da provincia da Coruña, 10 da provincia de Lugo, 10 da de Ourense e outras 20 da provincia de Pontevedra, no marco do Plan galego de inverno posto en marcha pola Xunta, remitiron semanalmente información puntual sobre a dispensación de test de antíxenos e os medicamentos antigripais máis consumidos, facilitando tanto o seguimento da evolución da gripe, como doutras infeccións respiratorias agudas.

Segundo avanzou Gómez Caamaño, a Consellería está a avaliar a posibilidade de ampliar tanto o número de oficinas que integran a Rede de farmacias sentinela como os ámbitos epidemiolóxicos e as patoloxías a monitorizar.

“Queremos crear unha verdadeira Rede de farmacias sentinela de Saúde Pública”, salientou o responsable sanitario, explicando que os establecementos farmacéuticos tamén poden contribuír a anticipar “o impacto da aerobioloxía nas persoas alérxicas” ou a “ presenza de mosquito tigre ou carrachas”.

Na mesma liña, destacou a capacidade e a proximidade das oficinas de farmacia á hora de difundir os programas de promoción da saúde que a Xunta ten en marcha, como pode ser o programa de prevención do tabaquismo, as diferentes campañas de vacinación ou os programas de cribado poboacionais que leva a cabo a Dirección Xeral de Saúde Pública.

Gómez Caamaño destacou que as oficinas de farmacias son aliadas estratéxicas que permiten anticipar o impacto da gripe e dotar a asistencia dos recursos necesarios e lembrou que esta colaboración entre Xunta e Colexios de Farmacéuticos permite que Galicia se sitúe, unha vez máis, á vangarda da Saúde Pública.