Lugo, 6 de maio 2025

A Delegación territorial da Xunta en Lugo acolleu hoxe a presentación da XXX Mostra de Viños da Ribeira Sacra de Pantón, que se celebra esta fin de semana, do venres 9 ao domingo 11 de maio. Está declarada de Interese Turístico de Galicia dende o ano 2022.

O delegado territorial, Javier Arias, e o alcalde de Pantón, José Luis Álvarez, deron a coñecer o programa xunto con representantes da organización.

A cita deste ano contará coa participación de nove adegas. Ademais haberá dúas catas; a tradicional Festa da Empanada, que cumpre a oitava edición; e actuacións musicais os tres días con varios grupos e orquestras.

Arias destacou a singularidade desta feira, que funciona “como un escaparate excepcional para Pantón ante todos os visitantes que acoden atraídos pola riqueza dos viños da zona”.

A feira comezará o venres ás 19,00 horas coa apertura das casetas no recinto feiral e a primeira cata maridaxe, dirixida polo sumiller Juanjo Figueroa. O sábado haberá outra cata, Experiencia sensorial Pantón... as tres ribeiras, dirixida polo enólogo David Pascual.

Tamén o sábado (a partir das 14,30 horas) será a Festa da Empanada no recinto do Castro, onde se despacharán empanadas e produtos da terra. Outra das actividades previstas é o Brinde do Viño (o mesmo día ás 13,30 horas no campo da feira), que se celebra simultaneamente en distintos territorios vitivinícolas de España para reivindicar o valor dos viños con denominación de orixe.