O conselleiro de Sanidade, xunto coa directora xeral de Recursos Económicos do Servizo Galego de Saúde e o xerente da área sanitaria de Pontevedra e O Salnés, mantivo hoxe un encontro co alcalde de Cambados
A Consellería de Sanidade asumirá o centro de saúde de Cambados ante a caducidade da concesión no mes de xuño
A infraestrutura sanitaria ocupa un edificio de propiedade de Portos de Galicia, cedido ao Concello de Cambados en réxime de concesión
Ante o remate do prazo concesional, o Servizo Galego de Saúde xestionará directamente o centro de saúde, iniciando os trámites precisos
Santiago de Compostela, 26 de maio de 2025
A Consellería de Sanidade asumirá a xestión do centro de saúde de Cambados ante a caducidade da concesión no vindeiro mes de xuño.
Así llo comunicou o conselleiro de Sanidade, Antonio Gómez Caamaño, ao alcalde de Cambados na reunión de traballo que mantiveron esta tarde na que tamén participaron a directora xeral de Recursos Económicos do Servizo Galego de Saúde, Amparo Pousada, e o xerente da área sanitaria de Pontevedra e O Salnés, José Flores.
A infraestrutura sanitaria ocupa un edificio de propiedade de Portos de Galicia que foi cedido ao Concello en réxime de concesión.
Esa concesión remata no mes de xuño polo que o Servizo Galego de Saúde se fará cargo da infraestrutura sanitaria e pasará a xestionar directamente o centro de saúde, para o que nos vindeiros días iniciará os trámites oportunos.
O centro de saúde de Cambados ten adscritas 15.751 tarxetas sanitarias e conta con punto de atención continuada que dá servizo aos concellos limítrofes da Illa de Arousa, Meis e Ribadumia, que engloban 28.000 tarxetas.
Conta con 9 médicos de familia, 11 enfermeiros, 3 pediatras, 3 auxiliares de enfermería, 4 auxiliares administrativos, 1 farmacéutico, 1 odontólogo, 1 hixienista, 1 matrona, 2 celadores e 2 fisioterapeutas.
