O Vicedo (Lugo), 11 de xuño de 2025

A Xunta de Galicia colabora un ano máis co Concello do Vicedo na organización da Romaxe Viquinga, que se celebrará na praia de San Román os días 25 e 26 de xullo. 

O delegado territorial de Lugo, Javier Arias, participou hoxe na presentación do cartel e das camisetas conmemorativas da presente edición, que tivo lugar na Casa da Cultura da localidade. No acto estiveron tamén o alcalde do Vicedo, Jesús Novo; o debuxante Cristian F. Carucho, responsable do deseño do cartel; e membros da compañía Queiman e Pousa, que levan anos colaborando coa parte artística do evento, entre outros.

Arias subliñou a “rápida consolidación desta cita de recreación histórica, que alcanza a súa oitava edición constituída nun dos principais reclamos turísticos da Mariña”. Ao respecto, destacou “o empuxe do Concello” e lembrou que “contou co apoio do Goberno galego desde o primeiro momento”.

Durante a mañá entregáronse tamén os premios do concurso de debuxo sobre a romaxe viquinga no que participou o alumnado do CEIP do Vicedo.