Santiago de Compostela, 29 de xuño de 2025

‘Sete Cidades, Sete Sabores’ poñerá a competir este martes a sete cociñeiros das sete cidades galegas nunha aposta de Turismo de Galicia pola promoción do turismo urbano aderezada pola súa oferta gastronómica e da que sairá elixido o Mellor Cociñeiro de Tapas 2025. O acto terá luga o martes ás 20,00 horas no Museo Centro Gaiás da Cidade da Cultura, en Santiago de Compostela.

Organizada pola Xunta de Galicia, a gala é o peche dunha campaña de Turismo de Galicia para atraer a ese visitante que fai escapadas en diferentes épocas do ano, buscando experiencias culinarias, enfocándose na gastronomía local e a cultura relacionada coa comida.  A gala, que será presentada por Lucía Rodríguez, comezará ás 20:00h na Cidade da Cultura, en Santiago de Compostela. 

‘Sete cidades, sete sabores’ amosará a creatividade da gastronomía galega enmarcando estas experiencias nos recursos turísticos de Ferrol, A Coruña, Santiago de Compostela, Pontevedra, Vigo, Ourense e Lugo, cidades atractivas e dinámicas con historia e cultura propias.

Os chefs representantes de cada cidade son: Álex Martínez e Mar López de Bacelo (Ferrol); Vicenzo Amaddeo de Ama Italiana Contemporánea (A Coruña); Alejandro Ferreiro de O Sendeiro (Santiago de Compostela); Rubén González de El Cafetín de La Alameda (Pontevedra); Daniel Bastos de La Marciana (Vigo); Paco Gómez de Pulpería Asador La Feira (Ourense) e José Luis Pardo de Orixe do Campo (Lugo).e

Cada chef disporá dun máximo de 3 minutos para rematar a súa tapa no escenario. E a orde será: Ferrol, A Coruña, Santiago de Compostela, Pontevedra, Vigo, Ourense e Lugo.

Os sete cociñeiros competirán por dous galardóns. Por unha banda, o premio do xurado profesional, que estará integrado José Paz Gestoso, director do Centro Superior de Hostalaría de Galicia; Álvaro Pérez Blanco de ArteSana Gastrobar, Ana Méndez Gil, directora de Galicia Calidade, Adrián Pérez, chef de Restaurante Sinxelo y Coque Fariña Esperón, @mi_coqueteria, instagramer. Todos eles valorarán cada tapa segundo a presentación, textura, sazón e sabor, concepto e orixinalidade. Por outra parte, o premio do xurado popular, integrado polos invitados á gala, que utilizará un sistema de televotación.

Os asistentes poderán gozar das seguintes demostracións. Por Ferrol, concursará a tapa ‘Os Polos Opostos’ dos chefs  Álex Martínez e Mar Lago de O Bacelo; pola Coruña, será ‘Ravioli recheo de chourizo ceboleiro’ do chef Vicenzo Amaddeo de Ama Italiana Contemporánea; por Santiago de Compostela, será a tapa ‘Bonito, millo e lagostino’ do chef Alejandro Ferreiro de O Sendeiro; por Pontevedra, a proposta leva por título ‘Tomatún’ do chef Rubén González de El Cafetín de la Alameda; por Vigo, será ‘Ondas do mar’ do chef Daniel Bastos de La Marciana; por Ourense, a tapa concursante será ‘Gamba na corte’ do chef Paco Gómez de Pulpería Asador La Feir, e finalmente por Lugo, será a proposta ‘Petisco larpeiro’ do chef José Luis Pardo de Orixe do Campo.