Santiago de Compostela, 17 de xullo de 2025

A Xunta publica no Portal de Contratos Públicos de Galicia a licitación, por importe de 1.857.350 euros, da subministración de equipamento de alta tecnoloxía con destino a diversos hospitais do Servizo Galego de Saúde.

As empresas interesadas nesta licitación teñen ata o 1 de agosto para presentar as súas ofertas.

O equipamento divídese en tres lotes: o primeiro deles correspóndese  cunha sala de raios X dixital robotizada con suspensión de teito; o segundo lote é un equipo de tomografía computarizada multicorte para a súa utilización en Unidade de Radioloxía de Urxencias; e o terceiro dos lotes fai referencia a salas de raios X dixital robotizadas con suspensión de teito e sistema dixital de radioloxía portátil.

O equipamento dos lotes 1 e 2 teñen como destino o Hospital Novo Montecelo de Pontevedra.

O equipamento do lote 3 irá para os hospitais de Barbanza e de Cee, unha sala para cada un destes centros hospitalarios.