Santiago de Compostela, 5 de agosto de 2025

A Consellería do Medio Rural informa da situación dos incendios forestais rexistrados en Galicia con datos recollidos ata as 21.00 horas de hoxe martes.

Activo Camariñas-Xaviña, Activada Situación 2

Está activo un incendio forestal no concello coruñés de Camariñas, parroquia de Xaviña, no que se decretou a Situación 2 como medida preventiva pola súa proximidade ás vivendas, máis concretamente ao núcleo de Pedrouso. O lume iniciouse ás 16.57 horas e afecta unha superficie de arredor de 20 hectáreas. Para a súa extinción mobilizáronse ata o momento 1 técnico, 3 axentes, 3 brigadas, 3 motobombas e 1 helicóptero.

Activo Ponteceso-Corme Aldea, Activada Situación 2

Segue activo o incendio forestal no concello coruñés de Ponteceso, parroquia de Corme Aldea, no que se decretou a Situación 2 como medida preventiva pola súa proximidade ás vivendas da propia aldea. O lume iniciouse ás 14.12 horas de hoxe e, segundo as últimas estimacións, afecta unha superficie de máis de 20 hectáreas.

Ata o momento, para a súa extinción mobilizáronse 1 técnico, 7 axentes, 10 brigadas, 9 motobombas, 2 pas e 3 unidades técnicas de apoio. Ademais, veñen de incorporarse aos labores de extinción 2 avións, que están operando na zona malia que as condicións climatolóxicas non son favorables para os medios aéreos. Tamén se solicitou por parte da Xunta a incorporación aos labores de extinción de efectivos da Unidade Militar de Emerxencias (UME).

Estabilizado Ponteceso-Brantuas

Desde as 23.32 do domingo permanece estabilizado outro incendio neste mesmo concello, parroquia de Brantuas, que segundo as últimas estimacións afecta unha superficie de 170 hectáreas. O lume comezou ás 20.30 horas do pasado sábado e, polo de agora, mobilizáronse para a súa extinción 5 técnicos, 22 axentes, 25 brigadas, 17 motobombas, 2 pas, 3 unidades técnicas de apoio, 3 helicópteros e 11 avións.

Controlado Ponteceso-A Graña

Segue controlado desde as 20.09 de onte o lume forestal da parroquia da Graña, tamén en Ponteceso, que segundo as últimas estimacións afecta unha superficie de preto de 100 hectáreas. O incendio comezou ás 00.30 horas da madrugada do domingo e para a súa extinción mobilizáronse, polo de agora, 3 técnicos, 21 axentes, 24 brigadas, 24 motobombas, 2 unidades técnicas de apoio e 9 helicópteros.

Activo A Fonsagrada-Monteseiro

Mantense activo o incendio forestal no concello lucense da Fonsagrada, parroquia de Monteseiro, que se iniciou ás 15.30 horas de hoxe e o que, segundo as últimas estimacións, afecta arredor de 60 hectáreas. Para a súa extinción mobilizáronse, ata o momento, 3 técnicos, 5 axentes, 8 brigadas, 10 motobombas, 3 pas, 6 helicópteros e 7 avións.

Controlado Mondariz-Riofrío

Controlado desde as 20.25 horas o incendio rexistrado hoxe no concello de Mondariz, parroquia de Riofrío. O lume iniciouse ás 00.20 horas da madrugada deste martes e, segundo as últimas estimacións, afecta unha superficie de arredor de 20 hectáreas. Ata o momento mobilizáronse 1 técnico, 6 axentes, 13 brigadas, 12 motobombas, 2 pa e 1 helicóptero.

Controlado Vilardevós-Terroso

Mantense controlado desde as 21.47 horas de onte o incendio do concello ourensán de Vilardevós, parroquia de Terroso, que segundo as últimas estimacións afecta unha superficie de arredor de 570 hectáreas. Neste incendio foi preciso decretar a Situación 2 pola súa proximidade a núcleos de poboación, unha situación operativa de emerxencia que foi desactivada ás 22.15 horas do domingo.

O incendio iniciouse ás 23.04 horas do pasado venres e para a súa extinción mobilizáronse, polo de agora, 12 técnicos, 56 axentes, 83 brigadas, 54 motobombas, 6 pas, 12 helicópteros e 12 avións. Ademais, tamén participaron nos labores de extinción de efectivos da Unidade Militar de Emerxencias (UME).

A Consellería do Medio Rural lembra que está a disposición da cidadanía o número de teléfono gratuíto 085, ao que deben chamar en caso de detectar algún lume forestal. Ademais, existe un teléfono anónimo e gratuíto para denunciar calquera actividade delituosa incendiaria da que se teña sospeita ou coñecemento: 900 815 085. Así mesmo, toda a información actualizada sobre incendios forestais que acadan as 20 hectáreas poderá ser consultada na conta aberta de X (antigo twitter): @incendios085.