Santiago de Compostela, 27 de agosto de 2025

Un total de 615 persoas obtiveron ou renovaron ao longo do ano 2024 a súa habilitación como persoal de control de acceso a espectáculos públicos e actividades recreativas a través dos 11 cursos impartidos na Academia Galega de Seguridade Pública (Agasp). Delas, máis de 200 foron mulleres, o que supón un terzo e demostra que cada vez é maior o número de mulleres que se dedican ao exercicio desta profesión. Ademais, no primeiro semestre de 2025, xa foron 385 os alumnos aprobados nos cursos da Agasp que se están a desenvolver este ano.

Entre as funcións do persoal de acceso atópanse as de controlar a entrada das persoas ao establecemento, comprobar a súa idade e identidade, controlar a adquisición da entrada ou localidade, supervisar que non se exceda a capacidade máxima autorizada no recinto, vixiar que as bebidas non sexan sacadas do local, prohibir o acceso fóra do horario de peche e, incluso, se fose necesario, auxiliar ás persoas que se encontren feridas e chamar ao teléfono de emerxencias correspondente.

Os cursos da Agasp consisten en formacións de seis horas lectivas cunha configuración moi práctica sobre os conceptos básicos que o alumnado precisa á hora de desenvolver as súas funcións. Esta formación substitúe as probas de coñecementos anuais e o test psicolóxico que tiñan que superar os aspirantes antes da actualización, no ano 2021, do decreto de 2010.

Simplificación e axilidade nos procesos

Co obxectivo de solicitar a correspondente habilitación da Dirección Xeral de Emerxencias e Interior é necesario superar igualmente unha proba de coñecementos ao remate do curso, pero coa formación mensual de seis horas o proceso acúrtase de forma considerable respecto ás probas anuais anteriores á aprobación do Decreto 48/2021.

O Goberno galego contribuíu co decreto aprobado en 2021 a unha regulación dos requisitos que debe cumprir o persoal de acceso máis práctica e adaptada á realidade e á normativa actual. Deste xeito simplifícanse e axilízanse os procesos tanto para a obtención como para a renovación da habilitación reformulando o temario da proba de coñecemento, que inclúe contidos como a normativa de xogo, as medidas de seguridade, os horarios dos establecementos abertos ao público ou o réxime xurídico das persoas menores de idade.

A Xunta actualizou en varias ocasións a normativa desta materia. De feito, antes do 2009 non existía unha norma propia que regulase o exercicio da actividade de control de acceso. Co Decreto 8/2010 superouse ese baleiro normativo autonómico e a inseguridade xurídica. Sete anos máis tarde continuou o avance nesta liña coa creación dun soporte xurídico de máximo nivel coa Lei 10/2017 de espectáculos públicos e actividades recreativas de Galicia. Unha norma na que, precisamente, se esixía dispoñer de persoal habilitado no servizo de control de acceso a espectáculos públicos e actividades recreativas. E, por último, co decreto aprobado en 2021 axilizouse e adaptouse todo o proceso.