Ourense, 24 de setembro de 2025

“O proxecto de especialización do campus de Ourense arredor dos recursos hídricos ten ao termalismo como punto de referencia, e nesta liña quero destacar que a Goberno autonómico vén de elaborar o Plan de Turismo Termal de Galicia 2025-2028 dotado de 10 millóns de euros para, ademais de consolidar a nosa posición privilexiada neste sector, potenciar os atributos de calidade do termalismo galego, reforzar a profesionalización no turismo termal, e impulsar a actividade turística das contornas rurais”; así principiou a súa intervención o delegado territorial da Xunta, no acto  de inauguración do Congreso Aquaxi´25 que se vai desenvolver no Edificio Politécnico do Campus de Ourense.

O delegado territorial da Xunta en Ourense referiuse ao Campus da Auga “como un centro de referencia e excelencia científica, con capacidade de proxección exterior e de creación de valor económico e social como motor de desenvolvemento territorial na provincia”. 

Puxo en valor Manuel Pardo o convenio que vén de asinar a Xunta e a Universidade de Vigo, para impulsar o Campus Auga tras acadar a súa acreditación como campus de especialización. Con este novo acordo elevan a 11,8M€, o investimento desde 2013 para convertelo nunha das sinerxías científicas de Ourense, situando á cidade na vangarda europea da investigación e da innovación en torno a este recurso natural. 

Tras agradecer ao reitor da Universidade de Vigo a súa presenza no acto, o representante do Goberno galego subliñou que o Campus da Auga xa está a potenciar a singularidade e a especialización que existe en Ourense arredor das temáticas da auga, aproveitando o potencial de Ourense, segunda cidade europea en potencial termal (despois de Budapest) con máis de 4 millóns de litros de auga mineromedicinal.

Neste liña, o representante do Goberno galego lembrou que a Xunta ven de elaborar o Plan de Turismo Termal de Galicia 2025-2028 dotado de 10 millóns de euros para, ademais de consolidar a nosa posición privilexiada neste sector, potenciar os atributos de calidade do termalismo galego, reforzar a profesionalización no turismo termal, e impulsar a actividade turística das contornas rurais e promocionar e comercializar novos produtos turístico.

O Congreso

Aquaxi´25, nace co obxectivo de recoñecer o talento e o esforzo das mozas e mozos investigadores que participarán coas súas contribucións, ás que a organización outorgará diferentes premios (ao mellor póster, comunicación oral e idea innovadora) e tres distincións ao mellor traballo predoutoral (incluíndo grao, mestrado e doutoramento e concedendo unha distinción para cada unha das liñas principais do congreso).

Ao longo dos dous días de celebración, no congreso presentaranse arredor de 25 comunicacións orais e 85 pósters, xirando arredor de tres eixes temáticos, en consonancia coas liñas estratéxicas do Campus Auga. O primeiro é alimentación funcional, abranguendo desde a alimentación sostible, circular e valorización de subprodutos ata a biotecnoloxía, a trazabilidade e a calidade alimentaria. O segundo eixe é agricultura e medio ambiente, abarcando desde as funcións do solo e servizos ecosistémicos ata a agricultura intelixente, de conservación, rexenerativa e resiliente. Por último, está a xestión da auga termal, con temas como a xestión dos seus xacementos e os seus usos indirectos e lúdicos. Complementariamente tamén se abordarán cuestións de intelixencia artificial, economía circular e lexislación agroalimentaria e ambiental.