Santiago de Compostela, 17 de outubro de 2025

A Xunta vén de autorizar a creación dunha nova parada de autobús no Empalme de Trasmonte, no concello de Oroso, co obxectivo de mellorar a accesibilidade ao transporte público da veciñanza desta zona.

A nova parada intégrase na liña A Coruña – Ordes – Santiago, e funcionará en ambos sentidos. A súa entrada en servizo está prevista para o próximo luns, 20 de outubro.

A implantación da nova parada non aumentará o custo da concesión de transporte e responde á demanda trasladada polo Concello de Oroso, que solicitou esta mellora ante a Administración autonómica para dar resposta a unha petición reiterada da veciñanza.

A Xunta continúa así atendendo as solicitudes dos concellos e adaptando a rede de transporte público ás necesidades reais da cidadanía, no marco do Plan de Transporte Público de Galicia.

A información actualizada da localización exacta da parada así como dos servizos que paren por ela estará dispoñible en bus.gal.